1 Engka sikalompo' tau Farisi sibawa siyagangngarè guru agama polè ri Yèrusalèm, lao ri Yèsus. 2 Purai naita siyagangngarè ana' gurunna Yèsus manrè sibawa jari dè'è namapaccing situru agamaè, iyanaritu dè' nabissaiwi jarinna lebbi riyolo situru peraturanna agamaè. 3 Sining tau Farisiè, makkuwatoro sininna tau Yahudiè, mapato senna' maccowèriwi ade'na nènè-nènèna mennang. Dè' nanrè mennang, ri wettu dè'napa nabissaiwi jarinna situru cara-carana pura ripattentuè. 4 Aga iya riyelliyè ri pasaè dè' nanrèi rèkko dè' napura nabissai lebbi riyolo. Maèga mupa peraturang laing polè ri nènè-nènèna mennang iya nakkatenning masse'è mennang; padaènna akkalarapanna peraturang mabbissa kaca, mangko, sibawa parèwa-parèwa tembagaè. 5 Rimakkuwannanaro iyaro sining tau Farisiè sibawa guru-guru agamaè makkutanani ri Yèsus, "Magi ana' gurum-Mu nanrè sibawa jari iya dè'è naribissai? Aga saba'na ana'-ana' gurum-Mu dè' naccowèriwi ade'na nènè-nènèta?" 6 Nappèbali Yèsus, "Iko tau munapè'ko! Sicoco' senna' aga naboto Yèsaya passalemmu, iyanaritu, 'Makkuwaiyè adanna Allataala, Iyaro sining tauwè nasompa-Ka sibawa ada-ada, iyakiya atinna mabèlai polè ri Iyya. 7 Percuma mennang sompa-Ka, saba' peraturang tolino mennang nappagguruwang samanna iyaro peraturak-Ku!' 8 Parènta-parèntana Allataala dè' mupogau'i, na peraturang-peraturanna tolinoè muwakkatenningngi masse'-masse'. " 9 Nainappa makkeda Yèsus, "Macca senna'ko sampèyangngi parèntana Allataala kuwammengngi mullèi pattahangngi pappagguruwammu. 10 Purani nabbèrèyang Musa iyaè parèntaè, 'Pakalebbii indo'mu sibawa ambo'mu', sibawa 'Nigi-nigi makkeda-kedaiwi ambo' indo'na, harusu'i rihukkung matè. ' 11 Iyakiya iko muwappagguruwangngi: Rèkko makkedai tauwè lao ri tomatowanna, 'Aga iya harusu'è uwèrèngngi ambo' sibawa indo', purani uwakkasuwiyangeng lao ri Allataala, ' 12 namupaleppe'i iyaro tauwè polè ri kawajibanna tulungngi ambo' indo'na. 13 Jaji pappagguruwammu muto muwabbèrèyang lao risining tauwè, mupaddèi ada-adanna Allataala. Maèga mupa gau' pada-padaèwè mupogau'. " 14 Nainappa Yèsus mobbii tau maègaèro siseppa sibawa makkeda lao ri mennang, "Engkalingai kuwammengngi mupahangngi! 15 Dè'gaga iya polè saliwengngè iya muttama'è ri laleng tauwè mullèi panajisi'i tauwè. Sibalè'na, iya massuè polè risèddiè tau, iyanaritu panajisi'i. [ 16 Jaji, rèkko mappunnaiko daucculing, èngkalingai. ]" 17 Wettunna Yèsus nasalai tau maègaèro sibawa muttama' ri bolaè, makkutanani ana'-ana' gurun-Na ri Alèna passalenna akkattana pakkalarapangngèro. 18 Nakkeda Yèsus lao ri mennang, "Dè'paga mupahangngi? Dè'ga mullèi pahangngi makkedaè iya muttama'è risèddiè tau dè' naullèi panajisi'i tauwè? 19 Saba' iya muttama'èro dè' nalalo ri atiè, iyakiya laloi ri babuwaè, nainappasi massu. " Nasibawang iyaro ada-adaè napannessai Yèsus makkedaè sininna nanrè hallala'i. 20 Nainappasi makkeda Yèsus, "Iya massuè polè ri tauwè, iyanaritu carèpaiwi. 21 Saba' polè ri lalengngi, iyanaritu polè ri laleng ati, mompoi sining akkaleng majaè iya nassabariyè tauwè pogau' mappangaddiè, mènnau, mabbuno, 22 malaweng, mabbellè, mappètenna, sibawa pogau'i sininna majaè, mancaji mangowa, maja ampèna, pangèmpurung, matempo, sibawa mawatang ripagguru. 23 Sininna majaèro mompoi polè ri laleng, na iyanaro pancajiwi tauwè najisi. " 24 Nainappa nasalai Yèsus iyaro onrongngè, nalao ri daèra seddèna kota Tirus. Muttama'ni ri laleng sèddiè bola nadè' namaèlo riisseng ri tauwè makkedaè engkai ri bolaèro. Iyakiya dè' naullèi subbui alèna. 25 Engka sèddi makkunrai, iya nauttamakiyè sètang ana' makkunrainna, naèngkalingani passalenna Yèsus. Laoni ri Yèsus nasuju' ri yolo-Na, 26 nanaèllau towi kuwammengngi napaddèsu'i Yèsus sètangngè polè ri ana'naro. Iyaro makkunraiè tenniya tau Yahudi, jajiwi ri daèra Fènèsia ri Siria. 27 Jaji makkedai Yèsus lao ri makkunraièro, "Harusu'i lebbi riyolo riwèrèng nanrè anana'è. Dè' namakessing riyala nanrèna anana'è untu' riyappèyangengngi asuè. " 28 Nappèbali iyaro makkunraiè, "Puwang, sining asuè iya engkaè ri yawana mèjangngè nanrèi sèsa-sèsana iya napasempè'è anana'è!" 29 Nainappa makkeda Yèsus lao ri makkunraièro, "Nasaba pappèbalimmuro, lisuno, massuni sètangngè polè ri ana'mu!" 30 Lisuni iyaro makkunraiè. Ri bolaè, napolèini ana'na lèwu ri onrong atinrongngè, sibawa massu tongenni sètangngè polè ri ana'èro. 31 Nainappa nasalai Yèsus daèra Tirus, nanapatterui joppa-Na lalo ri Sidon lao ri Tappareng Galilèa. Laleng laloè ri daèra Seppuloè Kota naola. 32 Kuwaniro engka natiwi tauwè lao ri Yèsus sèddi tau mataru-taru sibawa pèpè. Naèllauni mennang ri Yèsus palènne'i liman-Na ri yasè'na tauwèro. 33 Natiwini Yèsus iyaro tauwè massala polè ri tau maègaè nainappa napalènne jarin-Na ri laleng iya duwa daucculinna tauwèro. Nainappa Yèsus mammèccu, nanagèssai lilana iyaro tauwè. 34 Purairo congani Yèsus ri langiè, nainappa mannyawa loppo sibawa makkeda lao ri tauwèro, "Efata, " bettuwanna, "Tabbukkano!" 35 Tabbukani daucculinna iyaro tauwè sibawa masomè'ni lilana paimeng, sibawa mappammulani mabbicara sibawa magampang. 36 Nariyattèyanna mennang ri Yèsus untu' curitai gau'èro lao ri niga-niga. Iyakiya pèdè' nattèyang Yèsus, pèdè' nappallebangeng towi mennang. 37 Nasininna tau iya mèngkalingaèngngiro, hèrang senna'ni. Makkedani mennang, "Napogau' manengngi sibawa makessing! Mala naèbbui tau mataru-taruè marèngkalinga sibawa tau pèpè mabbicara!"
