1 Polè ri onrongngèro, lisuni Yèsus silaong ana'-ana' gurun-Na ri kampong assalen-Na. 2 Ri esso Saba'è mappammulani mappagguru ri bola assompangngè. Engka maèga tau kuwaro. Wettunna iyaro sining tauwè naèngkalinga pappagguruwanna Yèsus, hèrang senna'ni mennang. Makkedani mennang, "Polè kègai iyaè tauwè lolongeng iya manennaro? Pangissengeng agana rupanna iya engkaè ri Alèna? Pèkkugi naullèi pogau'i anu makalallaingngè? 3 Tenniyaga iyaè panrè ajui, ana'na Maria, sibawa silessurenna Yakobus, Yosès, Yudas sibawa Simon? Na ana'-ana' daranna engkato monro kuwaè. " Rimakkuwannanaro nasampèyangngi mennang. 4 Nakkeda Yèsus lao ri mennang, "Sèddiè nabi ripakalebbii kègi-kègi; sangadinna ri kampong assalenna, sibawa ri yelle'na sumpulolona nenniya kaluwargana. " 5 Ri onrongngèro dè' naullèi Yèsus pogau' anu makalallaing. Sangadinna pajjappai siyagangngarè tau malasa sibawa napalènne bawang liman-Na ri yasè'na mennang. 6 Hèranni dè' namateppe' mennang. Nainappa Yèsus lao ri kampong-kampong ri seddènaro, sibawa mappagguru. 7 Naobbini iya seppulo duwa ana' gurun-Na, nainappa nasuro mennang tadduwa-duwa sibawa nawèrèngngi mennang kuwasa untu' paddèsu'i roh-roh majaè. 8 Nawèrèngngi mennang panunju'èwè lao ri mennang, "Aja' mutiwi aga-aga untu' laommu, sangadinna tekkeng. Aja' mutiwi nanrè, iyarè'ga sèpu-sèpu sidekka, iyarè'ga dowi. 9 Pakèko sapatu iyakiya aja' mupakè duwa waju. " 10 Makkeda towi, "Rèkko muttama'ko ri sèddiè bola, onrono kuwaro narapi musalai iyaro kotaè. 11 Iyakiya rèkko lettu'ko risèddiè onrong, nasining tauwè kuwaro dè' namaèlo tarimako sibawa mèngkalingako, salaiwi iyaro onrongngè. Namuwakkeppikengngi awuè ri ajèmu selaku papparèngngerang lao ri mennang!" 12 Najoppana iyaro seppuloè duwa ana' gurunna Yèsus. Laoni mennang mappallebbangengngi karèbaè makkedaè harusu'i toba' rupa tauwè polè ri dosa-dosana. 13 Iyaro ana'-ana' gurunna Yèsus napaddèsu'ni maèga sètang, nasapuiwi minnya' zaitun tau malasaè sibawa pajjappai mennang. 14 Karèba passalenna iyaro kajajiyangngè lettu toni ri Arung Hèrodès, saba' kalabbani asenna Yèsus kègi-kègi. Engka tau makkeda, "Tuwoni paimeng Yohanès Paccemmè! Iyanaro saba'na nappunnai kuwasa pogau'i iyaro makalallaingngè. " 15 Iyakiya makkedai sining tau laingngè, "Elia. " Engkato makkeda, "Nabiwi, pada-pada sala sèddinna nabiè ri wettu riyolo. " 16 Wettunna naèngkalinga Hèrodès iyaro, makkedani, "Pasti iyaè Yohanès Paccemmè iya uwassuro rette'è ulunna riyolo. Makkekkuwangngè tuwoni paimeng!" 17 Saba' ri yolonaro, purai nasuro Hèrodès tauwè tikkengngi Yohanès, sibawa puttama'i ri laleng tarungkuè. Napogau'i Hèrodès iyaro nasaba Hèrodias, bainèna silessurenna, iyanaritu Filipus. Saba' purani Hèrodès nakawingi Hèrodias, 18 namakkolik-kolinni Yohanès mamparengngi Hèrodès passalenna gau'èro, makkuwaè, "Dè' naweddikko kawing sibawa bainèna silessuremmuro!" 19 Iyanaro saba'na Hèrodias nabenciwi Yohanès sibawa macinna mpunoi, iyakiya dè' naullèi pogau'i gau'èro; nasaba rilawa-lawaiwi ri Hèrodès. 20 Saba' purai Hèrodès nasuro tauwè jagaiwi madècèd-dècèng asalamakenna Yohanès ri tarungkuè, nasaba mètaui ri Yohanès. Naissengngi Yohanès sèddiwi tau iya makessingngè iya risuroè ri Allataala. Na mèmeng rèkko mabbicarai Yohanès napojito Hèrodès mèngkalingai, namuni masèssa senna'i nasaba iyaro. 21 Angkanna lolongenni kasempatang Hèrodias ri wettu esso ajajiyanna Hèrodès. Iyaro wettuè mappèstai Hèrodès untu' iya maneng pajaba' tanrèna akkarungengngè, sining parawirana sibawa sining tomariyolona masaraka'è ri Galilèa. 22 Ri pèstaèro sèrèi ana'darana Hèrodias, na iyaro sèrèna napèsennangi senna'i atinna Hèrodès sibawa undangenna. Nanakkeda Hèrodès ri ana'daraèro, "Aga mupoji, èllau bawanni, nauwèrèkko matu!" 23 Majjancini Hèrodès lao ri ana'daraèro sibawa mattanro. Makkedai Hèrodès, "Agi-agi muwèllau uwèrèkko matu, namuni sitengngana akkarungekku!" 24 Nassuna iyaro ana'daraè makkutana ri indo'na, "Indo', aga makessing harusu' uwèllau?" Nappèbali indo'na, "Ellauwi ulunna Yohanès Paccemmè. " 25 Masitta'ni lisu iyaro ana'daraè ri Hèrodès nakkeda, "Uwèllauwi ulunna Yohanès Paccemmè riwèrèkka makkekkuwangngè ri yasè'na sèddiè baki!" 26 Naèngkalingana iyaro parèllaungngè, messè senna'ni Hèrodès. Iyakiya dè' naullèi sampèyangngi parèllaungngèro nasaba purai mattanro ri yolona sining undangenna. 27 Jaji matteruni naparèntang sèddiè pangawalna nalai ulunna Yohanès Paccemmè. Nalaona iyaro parajuri'è ri tarungkuè, nanarette'i ulunna Yohanès. 28 Nainappa natiwi iyaro uluè ri yasè'na sèddiè baki nanawèrèngngi iyaro ana'daraè. Nainappa iyaro ana'daraè nawèrèng tosi indo'na. 29 Wettunna ana'-ana' gurunna Yohanès naèngkalinga iyaro gau'è, laoni malai ujuna Yohanès, nanakuburu'i. 30 Nainappa lisu paimeng sining rasul iya puraè nasuro Yèsus, namaddeppungeng sibawa Yèsus. Nalaporo'ni ri Yèsus sininna iya puraè napogau' sibawa nappagguruwang. 31 Maèga senna' tau polè sibawa medde', angkanna muwi untu' manrè Yèsus sibawa ana'-ana' gurun-Na dè'tona nadapii. Rimakkuwannanaro makkedani Yèsus lao ri ana'-ana' gurun-Na, "Laono mai talao ri onrong masino-sinoè, naweddikki alè-alètami sibawa wedding tokko mappèsau cinampe'. " 32 Nalaona mennang sibawa mallopi ri onrong masino-sinoè. 33 Iyakiya maèga tau mitai mennang salaiwi iyaro onrongngè, sibawa naissenna niga mennang. Jaji polè ri sininna kotaè ri daèraèro, lari-larini sining tauwè molai laleng pottanangngè poddiyoloiwi Yèsus sibawa ana'-ana' gurun-Na. 34 Wettunna Yèsus nonno polè ri lopiè, naitani tau maègaè. Messèni lao ri mennang, saba' pada-padai mennang bimbala' dè'è nappunnai pakkampi. Nanappammulana mappagguru maèga passaleng lao ri mennang. 35 Mawenninnana, makkedani ana'-ana' gurunna Yèsus lao ri Alèna, "Mawè'ni wenni na onrongngèwè tassubbu. 36 Lebbi kessing muwi tasuroi Pa' iyaè sining tauwè medde, kuwammengngi naelli nanrè ri dèsa-desaè sibawa ri kampong-kampongngè kuwaè. " 37 Iyakiya mappèbaliwi Yèsus, "Iko bawanna mpèrèngngi mennang nanrè. " Nakkeda ana'-ana' gurunna Yèsus, "Wah, harusu'ki'ga lao melli roti duwa ratu dowi pèra' untu' panrèi sining tauwèwè?" 38 Nakkutana Yèsus, "Engka siyaga rotimmu? Coba laoko mitai!" Polènana mennang mitai, makkedani, "Engka lima roti sibawa duwato balè. " 39 Nainappa nasuroni Yèsus sining tauwè tudang makkonro-konrong ri wella-wella manyilaè. 40 Natudanna iyaro sining tauwè sibawa taratoro', makkonro-konrong. Engka sèratu tau sikonrong, sibawa engkato limappulo tau sikonrong. 41 Nainappa nalani Yèsus iyaro limaè roti sibawa duwaè balè, nappa conga ri langiè mattarima kasi ri Allataala. Purairo napuwè'-puwè'ni iyaro rotiè sibawa liman-Na nappa nawèrèng ana'-ana' gurun-Na untu' nabagè-bagè lao ri tau ègaèro. Na iya balè duwaèro nabagè-bagè toni lao ri iya maneng mennang. 42 Manrèni mennang gangka messo. 43 Nainappa iyaro lebbinna nanrè napaddeppungenni ana'-ana' gurunna Yèsus, -- engka seppulo duwa baku penno iya maneng. 44 Tau worowanè iya manrèèngngi iyaro rotiè engka kira-kira limassebbu. 45 Purairo masitta'ni Yèsus suroi ana'-ana' gurun-Na lao sibawa mallopi poddiyoloiwi lao ri Bètsaida ri liweng tappareng, nanasuroi tau maègaèro lisu. 46 Puranana naleppessang tau maègaèro, laoni Yèsus ri bulu-buluè untu' massempajang. 47 Mawenninnana, engkani lopinna ana'-ana' gurunna Yèsus ri tengnga-tengngana tapparengngè, na Yèsus engka mupi ri pottanangngè. 48 Naitani mennang sipanrasa-rasa mpisèi iyaro lopiè nasaba madduppangngi angingngè iyaro lopiè. Rimakkuwannanaro kira-kira pallawangenna tettè tellu sibawa tettè enneng èlèè, laoni Yèsus ri mennang mallaleng ri tompo'na uwai. Najoppa-Na matteru samanna maèloi liwengngi mennang. 49 Wettun-Na mennang naita makkedaè joppai ri tompo'na uwai, nasenni mennang sètang, 50 angkanna kelli'ni mennang nataro tau. Saba' naita manengngi mennang sibawa mètau senna'na. Iyakiya matterui Yèsus mabbicara lao ri mennang, "Tennanno! Iyya Yèsus. Aja' mumètau!" 51 Nainappa mènrè ri lopinna mennang, nasorona angingngè. Hèrang senna'ni ana'-ana' gurunna Yèsus. 52 Iyaro roti limabbatu mappahèrangngè dè'pa napahangngi mennang. Mawatang senna' untu' napahang mennang. 53 Wettun-Na lettu ri liweng tappareng, mallabuni mennang ri wirinna Tappareng Gènèsarèt. 54 Wettunna mennang massu polè ri lopiè, naitani sining tauwè, makkedaè iyaro polè iyanaritu Yèsus. 55 Napada larina mennang lao tulili ri sininna daèraèro, nammulana tiwii tau malasaè ri yasè'na tappèrè lao ri Yèsus. Rèkko naèngkalingai mennang makkedaè engkai Yèsus risèddiè onrong, natiwini mennang tau malasaè kuwaro. 56 Kègi-kègi Yèsus lao -- muwi ri kampongngè iyarè'ga ri kotaè iyarè'ga ri dèsaè -- kuwatoro tuli lao tauwè sibawa taroi sining tau malasana mennang ri tana lapangngè. Nainappa naèllau sibawa masero kuwammengngi iyaro sining tau malasaè ripalaloi gèssai jumbana Yèsus, muwi cappa'na muwa bawang. Sininna gèssaèngngi majjappani.
