1 Mappaggurusi Yèsus ri wirinna Tappareng Galilèa. Maèga senna' tau katulungngi. Rimakkuwannanaro laoni tudang ri lalenna sèuwaè lopi iya engkaè ri tompo'na uwai, na iyaro tau maègaè tettongngi ri wirinna tapparengngè. 2 Nanappagguruwanna Yèsus maèga passaleng lao ri mennang sibawa pakè pakkalarapangeng. Mappakkuwiyè paggurui mennang. 3 "Engkalingai! Engka sèddi patani lao mampo binè. 4 Wettunna mampo, engka binè teppa ri lalengngè. Napolèna manu'-manu'è manrèi iyaro binè gangka cappu. 5 Engkato teppa ri onrong mabbatu-batuè, iya cèddè'è tanana. Iyaro binè masitta'i tuwo nasaba makurang tanana, 6 iyakiya wettunnana matanrè essoè, mammulani makelle iyaro cura'-cura'na nainappa marakko sibawa matè nasaba dè' namalamung ure'na muttama'. 7 Engkato binè teppa ri tengngana alekale maddoriè. Tuwoni iyaro alekale maddoriè nanalimpengiwi iyaro cura'-cura'è angkanna dè' naullèi mabbuwa. 8 Iyakiya engkato teppa ri tana macommo'è. Iyaro binè tuwoi, namancaji maloppo nainappa mabbuwa, engka leppe' wèkkatelluppulo, engka enneppulona, sibawa engkato sèratu. " 9 Purana nacurita iyaro pakkalarapangngè, makkedani Yèsus, "Mappunnaikoto daucculing, èngkalingani!" 10 Wettunna Yèsus alè-alènami, polèni sining tau iya puraè mèngkalingai pappagguruwan-Na silaong iya seppulo duwa ana' gurun-Na. Naèllauni mennang pakatajangngi bettuwanna iyaro pakkalarapangngè. 11 Nakkedana Yèsus lao ri mennang, "Purano riwèrèng pammasè untu' missengngi rahasiyana passalenna pèkkugi Allataala mapparènta. Iyakiya sining tau saliwengngè ripaggurui sibawa pakkalarapangeng, 12 kuwammengngi 'Natonget-tongengngi matu mennang makkita, iyakiya dè' nakkita, matterui matu mennang marèngkalinga, iyakiya dè' nappèjeppu, kuwammengngi naaja' mennang nakkita sibawa mappèjeppu naaja' napolè ri Allataala nariyaddampengeng mennang ri Allataala. ' " 13 Nainappa Yèsus makkeda lao ri mennang, "Rèkko dè' mupahangngi pakkalarapangngèro, pèkkugi mullèi pahangngi sining pakkalarapang laingngè? 14 Iyaro pangampoè iyanaritu tau iya mappallebbangengngèngngi karèba polè ri Allataala. 15 Binè iya teppaè ri lalengngè iyanaritu pada-padai sining tau iya mèngkalingaèngngi karèba passalenna pèkkugi Allataala mapparènta. Iyakiya marèngkalingana polèna Ibillisi' malai aga iya puraè riyampo ri laleng atinna mennang. 16 Binè iya teppaè ri onrong mabbatu-batuè sinrupai sining tau iya mèngkalingaèngngi iyaro karèbaè, namatteru natarima sibawa masennang atinna. 17 Iyakiya iyaro karèbaè dè' nakkure' ri laleng atinna mennang, angkanna dè' natahang maitta. Lolongenna mennang anrasa-rasang iyarè'ga paccallang nasaba karèbaèro, matteruna massakka. 18 Binè iya teppaè ri tengngana alekale maddoriè sinrupai sining tau iya mèngkalingaèngngi iyaro karèbaè, 19 iyakiya bata-batai passalenna atuwonna mennang sibawa macinnana tuwo sibawa masennang. Napessunna untu' maddupa-rupang gau' muttama'i ri laleng atinna mennang. Rimakkuwannanaro iyaro karèba polè ri Allataala tassipii ri laleng atinna mennang, angkanna dè' nabbuwa. 20 Sibawa binè iya teppaè ri tana macommo'è sinrupai sining tau iya mèngkalingaèngngi iyaro karèbaè sibawa natarimana, makkèbuwani mennang maèga, engka telluppulo, engka enneppulona, sibawa engka leppe' wèkkasèratu wassèlè'na. " 21 Makkedai paimeng Yèsus, "Engkaga naengka tauwè napalluwa pajjennangeng nainappa natongko baku iyarè'ga nataroi ri yawana onrong atinrongngè? Dè'ga nataroi iyaro pajjennangengngè ri ajè pajjennangengngè? 22 Dè'gaga anu tassubbu iya dè'è napaita matu, sibawa dè'gaga iya rirahasiyakangngè dè' naribongkara' matu. 23 Rimakkuwannanaro, rèkko mappunnaiko daucculing, èngkalingani!" 24 Nainappasi makkeda Yèsus, "Pènessaiwi aga iya muwèngkalingaèwè! Ukkurang iya mupakè untu' tau laingngè, napakè towi matu Allataala untu' iko -- sibawa mala lebbi maègapi. 25 Saba' tau iya mappunnaiyènna, riwèrèngngi matu lebbi ègapa; iyakiya tau iya dè'è nappunnai, cèddè iya engkaè ri alèna, riyala towi matu. " 26 Nasambussi bicaranna Yèsus, "Rèkko mapparèntai Allataala selaku Arung, keadaanna weddingngi riyakkalarapangeng pada-pada sèddiè tau pangampo binè ri dare'na. 27 Matinroi ri wenniè; pèseddingngi ri essoè. Naiyaro sining binè tuwoi matteru sibawa mancaji battowa. Iyakiya pèkkugi carana iyaro sining binè tuwo mancaji battowa, iyaro tauwè dè' naissengngi. 28 Tanaè muto ritu passu wassèlè: bunge'-bunge'na takkèna, nainappa takkè-takkèna, nappa buwana. 29 Narèkko matasa'ni iyaro gandongngè, mappammulani tauwè sangkiwi nasaba narapini wettunna mèngngala. " 30 Nakkutana Yèsus, "Rèkko mapparèntai Allataala, aga wedding ripasibandingengngi? Aga contona wedding ripakè untu' pakatajangngi? 31 Rèkko mapparèntai Allataala, keadaanna pada-padai iyaè pakkalarapangengngè: Sèuwa batu sawi iya nalaè sèddi tau nainappa nataneng ri tanaè. Iyaro batu sawi-sawiè iyanaritu binè kaminang baiccu ri linoè. 32 Iyakiya rèkko tuwoi, mancajiwi pong battowa ri yelle'na tanet-tanengngè. Takkè-takkèna makkuwamani woronna angkanna polèi manu'-manu'è mèbbu sarang ri yawana accinaungenna. " 33 Makkuwaniro Yèsus paggurui tauwè sibawa makkègunang maèga pakkalarapangeng pada-padaèro, situru iya weddingngè napahang mennang. 34 Tuli pakèi Yèsus pakkalarapangeng rèkko napaggurui iyaro sining tauwè. Iyakiya rèkko Alènami sibawa ana'-ana' gurun-Na, napakatajang manengngi lao ri mennang. 35 Iyatoro arawèngngè, nakkeda Yèsus lao ri ana'-ana' gurun-Na, "Laono mai tasompe lao ri liweng tappareng. " 36 Naènrè'na Yèsus ri lopiè, na ana'-ana' gurun-Na salaiwi tau maègaè ri wiring tapparengngè, nainappa mènrè ri lopi iya padaè. Nainappa Yèsus silaong ana'-ana' gurun-Na mappammula sompe. Engkato lopi-lopi laing kuwaro. 37 Dè' namaitta ri munrinna polèni anginrajaè. Naunruni bombang lopiè sibawa muttama' ri laleng angkanna cèddè'pi napenno uwai iyaro lopiè. 38 Na Yèsus mattengngangngi matinro ri borina lopiè sibawa ulun-Na ri yasè'na angkalungungngè. Naritedduna ri ana'-ana' gurun-Na. Makkedai mennang, "Pa' Guru, dè'ga tapaduliwi rèkko nakennaki abala?" 39 Moto'ni Yèsus, nanagera'i iyaro angingngè, nanakkeda lao ri tapparengngè, "Ammekkono, tennanno!" Nasorona angingngè sibawa tennang senna'ni tapparengngè. 40 Nainappa makkeda Yèsus lao ri ana'-ana' gurun-Na, "Magi mumètau? Magi nadè' mumateppe lao ri Iyya?" 41 Namètauna mennang, nakkeda sèddiè lao ri laingngè, "Niga sitongenna iyaè tauwè, namuwi angingngè sibawa bombangngè tunru'to ri Alèna. "
