1 Duwangngessopi na Esso Paskaè sibawa Ramè-ramè Roti Dè'è Raginna. Mammekko-mekkoni sining imangngè sibawa guru-guru agamaè sappa laleng untu' tikkengngi Yèsus maèlo mpunoi. 2 Nakkeda mennang, "Iyakiya aja' tapogau'i ri wettu ramè-ramè, saba' mompoi matu ronta'è. " 3 Wettunna Yèsus engka ri Bètania, ri bolana Simon iya nakennaè riyolo lasa oli iya mabbahayaè, engka sèddi makkunrai lao ri Alèna. Tiwii sèddi botolo' iya mallise'è minnya' wangi iya masuliè, riyèbbui polè ri ure' wangiè. Wettunna Yèsus tudang manrè, iyaè makkunraiè nareppa'i iyaro botolo'è nanabolorengngi iyaro minnya' wangiè ri tompo' ulunna Yèsus. 4 Siyagangngarè tau iya engkaè kuwaro macai sibawa makkeda sèddiè lao ri laingngè, "Aga gunana iyaro minnya' wangiè riyallabowang? 5 Iyaro minnya'è wedding ribalu' sibawa lebbi telluratu dowi pèra' ellinna; na ellinna riyabbèrèyangngi lao ri tau kasiyasiè!" Namacaina mennang lao ri makkunraièro. 6 Iyakiya makkedai Yèsus, "Leppessangngi siya! Magi musussaiwi? Napogau'i anu makessingngè sibawa ripojiyè lao ri Iyya. 7 Tau kasiyasiè tuli engkai ri yelle'mu. Tungke' wettu rèkko maèloko, wedding mutulung mennang. Iyakiya Iyya dè' namatteru-teru-Ka sibawakko. 8 Iyaè makkunraiè napogau'i aga iya naullè pogau'. Pura-Ka napassadiya sibawa minnya' wangi untu' attampungek-Ku sangadi dè'napa wettunna. 9 Ateppe'no! Ri sininna linoè, kègi-kègi Karèba Madècèng polè ri Allataala riyabbirittang, pangkaukenna iyaè makkunraiè ricurita towi matu selaku passènge' ri alèna. " 10 Nainappa Yudas Iskariot, sèddiwi polè riseppuloè duwa ana' gurunna Yèsus, laoni ri kapala-kapala imangngè akkattana bali'bellariwi Yèsus lao ri mennang. 11 Masennang senna'ni mennang mèngkalingai pappèddarangngèro, namajjancina maèlo mpèrèngngi dowi lao ri Yudas. Nammulana Yudas sappa kasempatang untu' bali'bellariwi Yèsus. 12 Ri esso pammulanna ri laleng Ramè-ramè Roti Dè'è Raginna -- wettunna tauwè gèrèi bimbala' Paskaè -- makkutanani ana'-ana' gurunna Yèsus ri Alèna, "Kègai nacinnai Bapa' passadiyaki nanrè Paska untu' Bapa'?" 13 Nasuroni Yèsus duwa tau polè ri yelle'na mennang, "Laono ri kotaè, kuwaro engka sèddi worowanè mattengngang tiwi sèuwa kendi mallise' uwai, muwèwa matu siruntu'. Accowèriwi 14 lao ri bola iya nauttamakiyè namupowadangngi iyaro punna bolaè, 'Makkutanai Pa' Guru, kègai onronna Alèna sibawa ana'-ana' gurun-Na maèlo manrè nanrè Paska. ' 15 Iyaro tauwè najellorekko matu sèuwa bili' ri lotèngngè iya battowaè. Iyaro bili'è taratoro'ni, sakke' sibawa parèwanna. Tassadiya manenni kuwaro untu' idi. " 16 Nalaona iya duwaro ana' gurunna Yèsus ri kotaè. Napolèini mennang kuwaro iya manenna pada-pada iya napowadaè Yèsus. Nanapassadiyani nanrè Paskaè. 17 Wenninnana, polèni Yèsus sibawa iya seppulo duwa ana' gurun-Na. 18 Namattengngang mennang tudang manrè, makkedani Yèsus, "Engkalingai: sèddi polè ri yelle'mu, iya makkekkuwangngè mèwa-Ka sisama manrè bali'bellari-Ka matu. " 19 Naèngkalinganaro, messè senna'ni ana'-ana' gurunna Yèsus. Nainappa mammula tassèddi-sèddi makkutana ri Yèsus, "Tentu tenniya iyya naseng Bapa'?" 20 Nappèbali Yèsus, "Iyaro sala sèddinna polè ri iko seppuloè duwa, iya manrè sèddi pennè Uwadduwai. 21 Mèmeng Ana'na Tolinoè matèi matu pada-pada tarokiè ri laleng Kitta'è. Iyakiya temmaka cilakana tau iya bali'bellariyèngngi Ana'na Tolinoè! Lebbi kessing muwi rèkko iyaro tauwè dè' naengka narijajiyang siseng!" 22 Wettunna mennang manrè, nalani Yèsus rotiè nanassempajang sukkuru' ri Allataala. Nainappa Napuwè'-puwè' iyaro rotiè sibawa liman-Na, na-Nawèrèngngi ana'-ana' gurun-Na nanakkedato, "Alai namuwanrèi, iyanaè tubuk-Ku!" 23 Purairo, malani sèuwa ènungeng anggoro. Nassempajang sukkuru' ri Allataala, nainappa nabbèrèyang iyaro ènungengngè lao ri ana'-ana' gurun-Na. Nainappa naènung manenni mennang iyaro anggoro'è. 24 Purairo makkedani Yèsus, "Iyanaè dara-Ku iya paessaèngngi assijancingenna Allataala, dara iya ripatabbolloè untu' maèga tau. 25 Ateppe'no: Dè'na Uwènungngi iyaè anggoro'è, narapi wettunna Uwènung anggoro baruè sibawa iko ri Lino Barunna Ambo'-Ku. " 26 Nainappa mennang makkèlong sèuwa pappojiyang. Napurairo laoni mennang ri Bulu-bulu Zaitun. 27 Nainappa makkeda Yèsus lao ri mennang, "Lari manekko matu salai-Ka. Saba' tarokii ri laleng Kitta'è, 'Naunoi matu Allataala pakkampina, natassiya-siyana matu bimbala'na. ' 28 Iyakiya pura-Kuna ripaoto' paimeng, Upoddiyoloiko matu lao ri Galilèa. " 29 Nappèbali Pètrus, "Dè', muwi iya manenna mennang salaiwi Bapa', dè' sises-siseng iyya. " 30 Nakkeda Yèsus, "Engngerangngi, iyato wenniè, riwettu dè'napa naoni manu'è wèkkaduwa, wèkkatelluni muwassakkarek-Ka. " 31 Namatedde'na pappèbalinna Pètrus, "Muwi harusu'ka matè silaong Bapa', dè' sises-siseng uwakkeda matu makkedaè dè' uwissengngi Bapa'!" Namakkeda makkuwatoro ana'-ana' gurun-Na laingngè. 32 Lettu'ni mennang risèuwaè onrong iya riyasengngè Gètsèmani, nanakkeda Yèsus lao ri ana'-ana' gurun-Na, "Tudanno kuwaè, ri wettu lao-Ku massempajang. " 33 Nanaèrani Yèsus Pètrus, Yakobus sibawa Yohanès, lao silaong Alèna. Mammulani tassinnau sibawa masèssa. 34 Nakkeda Yèsus lao ri mennang, "Tassinnau senna'i atik-Ku, samanna pappèneddikku maèlona matè. Onrono kuwaè sibawa jagano!" 35 Laoni Yèsus mabèla-bèla cèddè nakkaluttu ri tanaè massempajang. Ri laleng sempajan-Na Naèllauwi rèkko weddingngi aja'na napèneddingiwi anrasa-rasangngèro. 36 Adanna, "Ambo', oh Ambo', dè' gaga mustahèlè' ri Ambo'. Akkani anrasa-rasangngèwè polè ri Iyya. Iyakiya aja' taccowèriwi èlo-Ku, sangadinna èlona Ambo. " 37 Purairo lisuni Yèsus, nanapolèini ana'-ana' gurun-Na matinro. Makkedani ri Pètrus, "Simon, matinrokoga? Sijang bawang dè' muwullèi jaga?" 38 Nanakkeda Yèsus lao ri mennang, "Jaga-jagano, sibawa assempajanno kuwammengngi dè' mupèneddingiwi paccobangngè. Mèmeng rohmu maèlo pogau'i iya tongengngè, iyakiya dè' mullèi saba' sipa'na tolinoè malemmai. " 39 Siseppi Yèsus lao massempajang sibawa powada-adai ada-ada padaè. 40 Purairo lisuni lao ri ana'-ana' gurun-Na, nanapolèisi mennang matinro, nasaba cakkaruddu senna'i. Dè'na naissengngi mennang aga harusu' napowada lao ri Yèsus. 41 Wettunna Yèsus lisu ri mennang untu' mabbèkkatellunna, makkedani, "Matinro mupoga sibawa passauwi tekkomu? Genne'ni! Narapini wettunna Ana'na Tolinoè riyabbèrèyang ri limanna sining tau madosaè. 42 Oto'no, talao. Itai! Polèni tau iya bali'bellariyèk-Ka!" 43 Ri wettu mabbicarana mupa Yèsus, polèni Yudas, sèddiwi polè riseppuloè duwa ana' gurun-Naro. Namaèga tau silaongengngi iya tiwiè peddang sibawa tarasulu. Risuroi mennang ri kapala-kapala imangngè, guru-guru agamaè sibawa sining pamimpinna Yahudiè. 44 Naiyaro Yudas pura napattentuni sèddi tanrang lao ri mennang. Adanna lao ri mennang, "Tau iya ubauwè, Alèna ritu taun-Na. Tikkenni Namutiwii sibawa jagaiwi madècèd-dècèng. " 45 Wettunna polè Yudas, matteruni lao ri Yèsus nakkeda, "Bapa' Guru!" Nainappa nabau Yèsus. 46 Nainappa iyaro sining tau polè silaong Yudas natikkenni Yèsus nanabalenggui. 47 Iyakiya sala sèddinna iya engkaè kuwaro narampui peddanna nanawettai atanna imang lompoè angkanna pettu dauccinna. 48 Nakkeda Yèsus lao ri mennang, "Tau maja-Ka'ga, namupolè sibawa peddang nenniya tarasulu untu' tikkek-Ka? 49 Esso-esso-Ka mappagguru ri Bolana Puwangngè ri yolomu, nadè' mutikkek-Ka. Iyakiya mèmeng harusu'i makkuwaro, kuwammengngi nakajajiyang aga iya tarokiè ri laleng Kitta'è. " 50 Lari manenni ana' gurun-Na salaiwi Yèsus. 51 Engka sèddi kallolo, iya pakè silampa kaing lènang bawang untu' tongkoi watakkalèna, maccowèriwi Yèsus. Sining tauwè maèloi tikkengngi, 52 iyakiya naleppessangngi iyaro kainna, nainappa lari mallusu-lusu. 53 Ritiwini Yèsus ri bolana imang lompoè. Maddeppungengngi kuwaro sininna kapala imangngè, pamimpinna Yahudiè sibawa guru agamaè. 54 Maccowèrini Pètrus Yèsus polè mabèla lettu muttama' ri laleng seddè bolana imang lompoè. Natudanna kuwaro pellaiwi watakkalèna ri seddèna apiè silaong pengawal-pengawal-è. 55 Kapala-kapala imangngè sibawa sininna Mahkama Agamaè makkuragani lolongeng butti-butti iya passalaèngngi Yèsus kuwammengngi naullèi pakennaiwi pahukkungeng matè ri Alèna. Iyakiya dè'gaga sèddi butti nalolongeng mennang. 56 Maèga sabbi riyobbi untu' mabbèrè sabbi bellè lao ri Yèsus, iyakiya asabbiyanna mennang sisalai sèddiè lao ri laingngè. 57 Nainappa siyagangngarè sabbi tettong sibawa mabbèrè asabbiyang bellèwè passalenna Yèsus, 58 "Riyèngkalingai iyaè tauwè makkeda, 'Maèlo-Ka ruttungngi iyaè Bolana Allataala iya naèbbuè tolinoè, na ri esso matelluè, maèlo-Ka patettong laingngè iya tenniyaè èbbu tolino. ' " 59 Iyakiya iyaro asabbiyanna tauwè sisala towi sèddiè sibawa laingngè. 60 Natettonna imang lompoè ri yolona mennang nanakkutana ri Yèsus, "Dè'ga Mubaliwi iyaro riteppuwangngèk-Ko?" 61 Iyakiya mammekko bawammi Yèsus. Dè' sises-siseng nappèbali. Nanakkutanapa siseng iyaro imang lompoè ri Yèsus, "Ikonaga Arung Pappassalama'è, Ana'na Allataala Pommapaccingngè?" 62 Nappèbali Yèsus, "Iyya'na, namuwita maneng matu Ana'na Tolinoè tudang ri seddè ataunna Allataala Iya Pommakuwasaè enrengngè polè ri laleng ellungngè ri langiè!" 63 Nasapè-sapè'ni pakèyanna imang lompoè sibawa makkeda, "Dè'na naparellu sabbi! 64 Alèmuna mèngkalingai ada-adan-Na iya cella-cellaèngngi Allataala. Makkekkuwangngè aga apettummu?" Napettui manenni mennang makkedaè pasalai Yèsus, sibawa sitinajai rihukkung matè. 65 Nasiyagangngarè tau mammulani mammèccuiwi Yèsus, sibawa nasampoi matan-Na enrengngè nabarasa'i nappa makkeda, "Coba teppui niga barasa'-Ko?" Iyaro pengawal-pengawal-è maccowè toni leppa'i Yèsus. 66 Wettunna Pètrus engka mupa ri seddè bolaè, sala sèddinna pattumani makkunrainna imang lompoè lao kuwaro. 67 Wettunna naita Pètrus maddellang ri seddèna apiè, napènessaini madècèd-dècèng tappana Pètrus nainappa makkeda, "Dè'ga musibawato Yèsus tau Nazarèt-èro?" 68 Iyakiya massakkai Pètrus. Nakkeda lao ri pattumanièro, "Dè' uwissengngi sibawa dè' upahangngi akkattamu. " Nainappa Pètrus lao ri pintu gerbanna bolana imang lompoèro. [Iyaro wettuè, monini manu'è. ] 69 Iyaro pattumani makkunraiè naitasi Pètrus, nanakkedato lao risining tau engkaè kuwaro, "Iyaè mèmeng sala sèddinna polè ri mennang!" 70 Iyakiya massakkasi Pètrus. Dè' namaitta rimonrinna, sining tauwè kuwaro makkedasi lao ri Pètrus, "Dè'na wedding riyassakkareng, mèmeng iko sala sèddinnato polè ri mennang, saba' polè tokko ri Galilèa!" 71 Nappammulana Pètrus mattanro-tanro, "Matèka, dè' uwissengngi tau iyaro muwasengngè!" 72 Iyatoro wettuè naoni manu'è mabbèkkaduwanna. Nanaèngngeranni Pètrus makkedaè purai makkeda Yèsus ri alèna, "Ri wettu dè'napa naoni manu'è wekkaduwa, wèkkatelluni muwassakkarek-Ka. " Naterina Pètrus tassènge'-sènge'.
