1 Wettunna nasalai Yèsus Bolana Puwangngè, engka sèddi polè ri ana'-ana' gurun-Na makkeda, "Bapa' Guru, cobasai mitai iyaro bangunangngè. Pènessaiwi batu-batunna. Anengka makkuwa kessinna!" 2 Nappèbali Yèsus, "Muwitaga iyaro sining bangunang iya battowaè? Muwi sèddi dè'to gaga batu bangunangngèro monro tassusung ri onronna. Riruttung manengngi matu. " 3 Nainappa Yèsus lao ri Bulu-bulu Zaitun, natudang ri onrong iya siyolongngè Bolana Puwangngè. Nainappa Pètrus, Yakobus, Yohanès, sibawa Andrèas polèni ri Yèsus untu' mabbicara mammessam-messang. 4 Nakkeda mennang ri Yèsus, "Coba Bapa' powadakki uppanna iya manennaro nakajajiyang matu? Sibawa tanra-tanrang aga mappaitangngi makkedaè narapini wettunna?" 5 Nappèbali Yèsus, "Atutuko, aja' narapiko ribengnguwang. 6 Maèga tau matu polè sibawa pakèi asek-Ku sibawa makkeda, 'Iyya'naè!' nanabengnguwangngi maèga tau. 7 Rèkko muwèngkalingani oni-oni ammusurengngè sibawa karèba-karèba ammusurengngè, aja' mumètau. Iyaro gau-gau'è harusu'i kajajiyang, iyakiya iyaro tenniya bettuwanna makkedaè narapini wettunna kiyame'. 8 Bangsa sèddiè mammusui matu mèwai bangsa laingngè. Wanuwa sèddiè namusui matu wanuwa laingngè. Kègi-kègi kajajiyangngi matu mpèwangngi tanaè sibawa polèi akkadèrengngè. Iya manennaro nappai pammulanna bawang, pada-pada peddi napèneddingiyè sèddiè makkunrai maèloè mèmmana'. 9 Harusu'ko matutu, saba' ritikkekko matu nariyassarènrèngeng lao ri mahkamana agamaè. Ribarasa'ko matu risining bola assompangngè. Ritiwiko matu mangolo risining tomakuwasaè sibawa sining arungngè nasaba ana' guruk-Kuko. Na iyanaro kasempatammu untu' mabbèrè asabbiyang passalenna Iyya lao ri mennang. 10 Karèba Madècèng polè ri Allataala harusu'i ripallebbang riyolo' lao ri sininna bangsaè. 11 Narèkko ritikkekko sibawa ritiwi ri pengadilangngè, aja' mubata-bata passalenna aga harusu' mupowada. Rèkko narapini wettunna untu' mabbicara, powada bawanni aga iya ripowadangngèkko ri wettunna. Nasaba ada-ada iya mupowadaèro tenniya ada-adammu muto, sangadinna polèi ri Rohna Allataala. 12 Nabali'bellariwi matu tauwè silessurenna untu' riyuno. Nakajajiyang towi iyaro ri yelle'na ambo'è sibawa ana'na. Ana'-ana'è naèwai matu indo' ambo'na sibawa nabbèrèyangngi mennang untu' riyuno. 13 Nabenciko matu sininna tauwè nasaba ana' guruk-Kuko. Iyakiya tau mattahangngè lettu ri paccappurengngè, ripassalama'i matti. " 14 "Muwitai matu, 'Ja iya Paancuru'è' tettong ri onrong iya riyattèyangngè untu' alèna. (Catatan untu' pabbacaè: Pènessai aga bettuwanna!) Iyaro wettuè, tau iya engkaè ri Yudèa harusu'i lari lao ri buluè. 15 Tau iya engkaè ri pabbingeng bolaè aja' nanonno sibawa muttama' ri lalempola untu' malai agi-agi. 16 Tau iya engkaè ri dare'è aja' nalisu untu' malai jumbana. 17 Temmaka mappakatau-tauna iyaro essoè lao ri makkunrai mattampu'è sibawa indo' iya pasusuè mupi ana' lolona! 18 Assempajakko kuwammengngi iyaro gau'è aja' nakajajiyang ri wettu pabosiè. 19 Ri esso-esso iya mappakatau-tauèro, engka matu asussang iya dè'èppa naengka nakajajiyang, sipongenna napancaji Allataala linoè lettu makkekkuwangngè, sibawa dè'tona nakajajiyang matti. 20 Ebara'na Allataala dè' naponcokiwi iyaro wettuè, dè'gaga sèddi tau salama'. Iyakiya nasaba umma'-Na naponcokiwi Allataala iyaro wettuè. 21 Rèkko iyaro wettuè engka tau makkeda ri iko, 'Itai, iyaro Arung Pappassalama'è engkai kuwaè!' iyarè'ga 'Itai, engkai kuwaro!' -- aja' mumateppe lao ri tauwèro. 22 Saba' maèga pappassalama' palsu sibawa nabi-nabi palsu polè matu. Napogau'i matu pangkaukeng-pangkaukeng dè'è padanna sibawa mappahèrangngè untu' pabengnguwang rèkko naullèi, umma'na Allataala. 23 Jaji, atike'ko! Pura manenno Upowadang iyaro ri wettu dè'napa nakajajiyang gau'èro. " 24 "Puranana wettu asussangngèro, mapettanni matu matanna essoè, sibawa dè'na nattappa kètengngè. 25 Sempè'i matu sining wèttowingngè polè ri langiè, sibawa sining makuwasaè ri bètaraè sipalu-paluni matu. 26 Iyaro wettuè paitai matu Ana'na Tolinoè polè ri lalenna ellungngè sibawa akuwasanna battowaè nenniya marajaè. 27 Nasuroi matu malaèka'-malaèka'è untu' paddeppungengngi umma'-Na polè ri eppaè sulapa'na linoè, polè ri cappa'-cappa'na langiè. " 28 "Alako pappagguruwang polè ri pong araè. Rèkko manyilai takkè-takkèna sibawa masomè, enrengngè mammulai maccolli, muwissengngi makkedaè macawè'ni wettu tikkaè. 29 Makkuwatoniro rèkko muwitai gau'-gau'èro kajajiyang, muwissennitu makkedaè macawè'è senna'ni wettunna. 30 Issenni! Iya manenna gau'èwè kajajiyangngi matu riwettu dè'napa namatè maneng sining tau iya tuwoè makkekkuwangngè. 31 Lennye'i matu langiè sibawa linoè, iyakiya ada-adak-Ku tette'i mannennungeng. " 32 "Namuni makkuwaro, dè'to sèddi tau missengngi uppanna essona iyarè'ga tettè siyaganna. Malaèka'-malaèka'na ri surugaè dè, sibawa Ana'na dè'to, banna Ambo'è bawang missengngi. 33 Jaji harusu'ko jaga-jaga sibawa matike', saba' dè' muwissengngi uppanna wettunna. 34 Keadaanna sinrupai sèddiè tau iya salaiyèngngi bolana nalao ri onrong mabèlaè. Nasuroi sining pattumaninna murusu'i bolana, sibawa nawèrènna tungke'-tungke' jamang. Lao ri panganrowang tange'è, mappasengngi kuwammengngi najaga madècèd-dècèng. 35 Rimakkuwannanaro harusu'ko jaga-jaga, saba' dè' muwissengngi uppanna matu lisu punna bolaè -- naullè ri arawèngngè, naullè ri tengnga benniè, naullè ri subuè, iyarè'ga naullè ri wettu mompona essoè. 36 Rèkko polèi tenrisenna-senna, aja' lalo napolèiko matinro. 37 Aga iya Upowadaèwè ri iko, Upowada towi lao ri sininna tauwè: jaga-jagako!"
