1 Iyanaè Karèba Madècèng passalenna Yèsus Kristus, Ana'na Allataala. 2 Iyaro Karèba Madècèngngè napammulaiwi pada-pada iya naokiè Nabi Yèsaya, makkuwaèwè: " 'Iyanaè suro-Ku, ' adanna Allataala, 'Usuroi lebbi riyolo naiya Iko, kuwammengngi natimpakek-Ko laleng. ' 3 Engka tau gora-gora ri padang kessi'è, 'Passadiyangengngi laleng Puwangngè; paratai sining laleng iya maèloè Nalaloi. ' " 4 Pada-pada iya tarokièro, makkuwatoniro mompoi Yohanès ri padang kessi'è. Nacemmèi tauwè sibawa napalettu'i karèba polè ri Allataala. Makkedai Yohanès, "Harusu'ko toba' polè ri dosa-dosamu sibawa harusu'ko ricemmè, kuwammengngi naddampengekko Allataala. " 5 Sininna tauwè polè ri wanuwa Yudèa sibawa kota Yèrusalèm lao mèngkalingai Yohanès. Nangakuini mennang dosa-dosana, nappa ricemmè ri Yohanès ri Salo Yordan. 6 Pakèyang iya napakè Yohanès polèi ri bulu untaè. Babbanna polèi ri bingkulangngè, sibawa anrèna incalè nenniya cani' ale'. 7 Nappallebbangenni karèbaèwè, "Ri munrikku matu, polèi matu sèddi tau iya lebbi battowaè na iyya. Dè' usitinaja cuku' lukkai tulu sapatun-Na. 8 Iyya ucemmèko sibawa uwai, iyakiya iyaro Nacemmèko matu sibawa Rohna Allataala. " 9 Iyaro wettuè engkani Yèsus polè ri Nazarèt daèrana Galilèa, naricemmè-Na ri Yohanès ri Salo Yordan. 10 Massuna Yèsus polè ri saloèro, Naitani tabbukka langiè sibawa Rohna Allataala nonno ri yasè'na pada-pada jangang-jangangngè. 11 Nainappa naèngkalinga saddanna Allataala makkeda, "Ikona Ana'-Ku iya Uwamasèiyè. Mupèsennangi atik-Ku. " 12 Puranaro, matteruni Yèsus ritiwi ri Rohna Allataala ri padang kessi'è. 13 Naonrona kuwaro patappulo essona ricobai ri Ibillisi'. Engkato kuwaro olokolo liya naèwa sibawang, naritumaningi ri malaèka'è. 14 Ritarungkunnana Yohanès, laoni Yèsus ri Galilèa, nanappagguruwangngi kuwaro Karèba Madècèng polè ri Allataala. 15 Adan-Na, "Dè'na namaitta napammulaiwi Apparèntanna Allataala. Toba'no polè ri dosa-dosamu, sibawa mateppe'no ri Karèba Madècèng polè ri Allataala!" 16 Wettunna Yèsus joppa ri wirinna Tappareng Galilèa, Naitani duwa pakkaja, iyanaritu Simon sibawa Andrèas anrinna. Mattengngangngi mennang jala. 17 Nakkeda Yèsus lao ri mennang, "Accowèno ri Iyya. Maèlo-Ka pagguruko majjala tau. " 18 Matteruni mennang nasalai jalana nainappa naccowèri Yèsus. 19 Joppani matteru Yèsus, naitasi duwa tau massilessureng laingngè, iyanaritu Yakobus sibawa Yohanès, ana'-ana'na Zèbèdèus. Engkai mennang ri lopiè, pedècèngiwi jalana. 20 Natteruna Yèsus mobbii mennang. Nanasalaini ambo'na ri laleng lopiè silaong sining tau napagajiè. Nainappa lao maccowèriwi Yèsus. 21 Lettu'ni Yèsus sibawa ana'-ana' gurun-Na ri kota Kapernaum. Ri esso Saba' rappina, muttama'ni Yèsus ri bola assompangngè nanappammula mappagguru. 22 Hèranni sininna tau iya mèngkalingaèngngi cara-Na mappagguru. Saba' mappaggurui sibawa kuwasa, dè' napada guru-guru agamaè. 23 Iyaro wettuè engka sèddi tau nauttamai roh maja muttama' ri laleng bola assompangngè, nagora, 24 "Oh Yèsus, tau Nazarèt-è, aga maèlo Mugaukekki? Polè-Koga untu' pabbinasaki? Uwisseng niga Iko: Ikona suro mapaccingngè iya polè ri Allataala!" 25 Nagara'ni Yèsus iyaro roh-è, "Ammekkoko! Assuko polè ri tauwèro!" 26 Naiyaro roh majaè nagottanni iyaro tauwè sibawa masero, nainappa massu polè ri tauwèro nanagorato. 27 Hèrang senna'ni sininna tauwè, angkanna makkeda sèddiè lao ri laingngè, "Wah, aga iyaè? Sèuwa pappagguruwang baru! Nasuroi massu roh-roh majaè sibawa kuwasa, namatinulu ri Alèna!" 28 Nallebbanna masitta iyaro karèbaè passalenna Yèsus lao risininna daèrana Galilèa. 29 Nasalaini Yèsus sibawa ana'-ana' gurun-Na iyaro bola assompangngè, nalao ri bolana Simon sibawa Andrèas. Nalaoto Yakobus sibawa Yohanès silaongengngi mennang. 30 Matuwa makkunrainna Simon masemmengngi ri onrong atinronna. Jaji wettunna Yèsus sibawa ana'-ana' gurun-Na muttama' ri bolaèro, ripowadanni Yèsus iyaro gau'è. 31 Nalaona Yèsus ri matuwa makkunrainna Simon, nanakkatenningngi limanna, nanatulungngi moto'. Soroni semmenna, nanatumaningiwi mennang. 32 Arawènnana, labunana essoè, natiwini sining tauwè lao ri Yèsus iya maneng tau malasaè sibawa tau nauttamakiyè sètang. 33 Maddeppungenni sininna pabbanuwana kotaèro ri yolona bolaèro. 34 Nanapajjappani Yèsus maèga tau iya nakennaè maddupa-rupang lasa, sibawa napaddèsu' towi maèga sètang. Dè' napalaloi iyaro sining sètangngè mabbicara, saba' naissengngi mennang niga Yèsus. 35 Pappa bajanana, subu-subu mupa, moto'ni Yèsus nanasalaiwi bolaè. Nalao ri onrong masino-sinoè ri saliweng kota, nassempajang kuwaro. 36 Iyakiya Simon sibawa sellao-sellaona laowi sappai Alèna. 37 Naruntu'na-Na mennang, makkedani, "Sininna tauwè sappaki Pa'. " 38 Iyakiya mappèbaliwi Yèsus, "Laono mai tapatterui joppatta lao ri kota-kota laingngè kuwaè mattulili. Harusu' tok-Ka makkatobba kuwaro, saba' iyanaro akkattana Ulao kumaiyè. " 39 Rimakkuwannanaro laoni Yèsus kègi-kègi ri sininna Galilèa, nanakkatobba risining bola assompangngè enrengngè napaddèsu'i sining sètangngè. 40 Engka sèddi tau malasa oli iya mappakatau-tauè lao ri Yèsus. Makkaluttuni iyaro tauwè, nakkeda, "Rèkko naèloriwi Bapa', naullè Bapa' pajjappaka'. " 41 Namessèna Yèsus ri tauwèro. Jaji nakarawani iyaro tauwè, nanakkedato, "Uwèloriwi, ajjappano!" 42 Iyatoro wettuè nateddèng lasana najjappa. 43 Nainappa Yèsus suroi lao sibawa papparèngngerangngèwè, 44 "Jaga-jagako, aja' mucuritai lao ri nigi-nigi, iyakiya laoko ri imangngè, namuwèllauwi untu' pattentui makkedaè majjappano. Nainappa untu' ajjappammuro, akkasuwiyangekko akkarobangeng situru napparèntangngè Musa, selaku butti lao risining tauwè makkedaè tonget-tongenno majjappa. " 45 Iyakiya iyaro tauwè laoni, sibawa matteru-terui nacurita kajajiyangngèro kègi-kègi, angkanna dè'na naullèi Yèsus muttama' ri kotaè sibawa mannessa-nessa. Ri saliweng kota bawang monro ri onrong-ngonrong masino-sinoè. Iyakiya matteru-teru mupi tauwè lao ri Alèna polè kègi-kègi.
