1 Naobbini Yèsus iya seppulo duwa ana' gurun-Na, nainappa nawèrèng mennang akuwasang untu' paddèsu'i sètangngè sibawa pajjappai lasaè. 2 Nainappa nasuro mennang lao pajjappai tau malasaè sibawa mappallebbangengngi pèkkugi Allataala mapparènta selaku Arung. 3 Nakkeda Yèsus lao ri mennang, "Aja' mutiwi agi-agi untu' laommu. Aja' mutiwi tekkeng, iyarè'ga sèpu-sèpu passidekka, iyarè'ga nanrè, iyarè'ga dowi, iyarè'ga pakèyang duwallampa. 4 Kègi-kègiko ritarima, onrono kuwaro narapi musalai iyaro kotaè. 5 Nakègi-kègi dè' naritarimako, wettunna musalai kotaèro, akkeppiyangngi awuè ri palakajèmu, selaku papparèngngerang lao ri mennang. " 6 Najoppana ana'-ana' gurunna Yèsus, nalao ri dèsa-desaè untu' mabbirittangngi Karèba Madècèngngè sibawa pajjappai tau malasaè kègi-kègi. 7 Wettunna Hèrodès iya mapparèntaè ri Galilèa, naèngkalinga passalenna iya maneng gau'èro, bengngani. Saba' engka makkeda makkedaè tuwoi paimeng Yohanès Paccemmè. 8 Engkato powadai makkedaè momposi paimeng Elia. Tau laingngè powadai makkedaè sèddi nabi polè ri nabi-nabiè riyolo tuwoni paimeng. 9 Makkedai Hèrodès, "Purani usuro tauwè rette'i ulunna Yohanès. Iyakiya iyaè tauwè, niga sitongen-Na? Maègani pura uwèngkalinga passalenna Alèna. " Nanakkuragana Hèrodès untu' mitai Yèsus. 10 Lisunnana sining surona Yèsus, nacuritani lao ri Yèsus iya maneng puraè napogau'. Naèrani Yèsus mennang lao silaong massala ri kota Bètsaida. 11 Iyakiya wettunna sining tauwè naisseng passalenna gau'èro, naccowèrini mennang Yèsus. Natarimani mennang, nainappa mabbicara lao ri mennang passalenna pèkkugi Allataala mapparènta selaku Arung. Enrengngè Napajjappa towi tau malasaè ri yelle'na mennang. 12 Wettunna labuni essoè, polèni iya seppulo duwa ana' gurunna Yèsus ri Alèna sibawa makkeda, "Pa' iyaè onrongngè tassubbu. Lebbi kessing muwi Bapa' suroi sining tauwèro lao, kuwammengngi naweddingngi sappa anrè sibawa onrong mappèruma ri kampong-kampongngè sibawa dèsa-dèsaè ri onrongngèwè. " 13 Iyakiya mappèbaliwi Yèsus, "Iko bawanna panrèi mennang. " Nakkeda ana'-ana' gurunna Yèsus, "Lima bawang roti riyappunnai sibawa duwa balè. Harusu'ki'ga lao melli anrè untu' iya maneng tauwèwè?" 14 (Engka kira-kira limassebbu tau worowanè kuwaro. ) Nakkeda Yèsus lao ri ana'-ana' gurun-Na, "Suroi iyaè tauwè tudang makkonro-konrongeng kira-kira limappulo tau sikonrong. " 15 Napogau'ni ana'-ana' gurunna Yèsus iya napowadaè Yèsus lao ri mennang. 16 Nainappa nalani Yèsus iyaro limaè roti sibawa duwaè balè, nanaconga ri langiè mattarima kasi ri Allataala. Purairo napuwè'-puwè'ni rotiè nenniya balèro sibawa liman-Na nainappa nawèrèng ana'-ana' gurun-Na untu' nabbagè-bagèyang lao ri tau maègaèro. 17 Manrè manenni mennang gangka messo. Nainappa ana'-ana' gurunna Yèsus paddeppungengngi lebbinna iyaro anrè ègana seppulo duwa baku. 18 Risèuwaè esso, wettunna Yèsus massempajang alè-alèna, polèni ana'-ana' gurun-Na. Makkutanani Yèsus lao ri mennang, "Manuru' adanna tauwè, niga Iyya'è?" 19 Nappèbali mennang, "Engka makkeda Yohanès Paccemmè. Engkato makkeda Elia, iya laingngè makkedai sala sèddinna nabiè riyolo iya tuwoènna paimeng. " 20 Nakkeda Yèsus, "Iyakiya manuru' alèmu, niga Iyya'è?" Nappèbali Pètrus, "Bapa' iyanaritu Arung Pappassalama' iya najjanciyangngè Allataala. " 21 Nanakkeda Yèsus lao ri ana'-ana' gurun-Na, "Aja' sises-siseng muwappaddissengengngi iyaro gau'è lao ri nigi-nigi. " 22 Makkeda towi Yèsus, "Mèmeng Ana'na Tolinoè harusu'i manrasa-rasa sibawa riyèwa risining pamimpingngè sibawa kapala-kapala imangngè, enrengngè guru-guru agamaè. Riyunoi matu, iyakiya ri esso matelluè ripatuwoi matu paimeng. " 23 Nainappa makkeda Yèsus lao ri iya maneng engkaè kuwaro, "Tau iya maèloè maccowèri-Ka harusu'i nallupai apentingeng alèna, naèssangngi sallina esso-esso sibawa matteruna maccowèri-Ka. 24 Saba' tau iya maèloè mèwaiwi atuwonna, ateddèngengngi matu atuwong. Iyakiya tau iya makkarobangengngèngngi atuwonna untu' Iyya, napassalama'i matu. 25 Aga sarona lao risèddiè tau rèkko sininna linoèwè mancajiwi appunnangenna, iyakiya nasolangiwi sibawa ateddèngengngi atuwonna? 26 Rèkko masirii tauwè mangakui-Ka sibawa pappagguruk-Ku, Ana'na Tolinoè masiri towi matu mangakuiwi iyaro tauwè ri wettu polèna matti sibawa akuwasan-Na, kuwaèttopa akuwasanna Ambo'è, enrengngè akuwasanna sining malaèka' mapaccingngè! 27 Issenni: polè ri yelle'mu kuwaè engka matu dè' namatè riwettu dè'napa naitai matu Allataala mapparènta. " 28 Kira-kira siminggu purana nappagguruwang Yèsus gau'-gau'èro, natiwini Pètrus, Yohanès sibawa Yakobus ri yasè'na sèddiè bulu untu' massempajang. 29 Ri wettu massempajanna Yèsus kuwaro, tappinrani tappa-Na sibawa pakèyan-Na mancaji maputè millakkillang. 30 - 31 Tappa engka duwa tau, iyanaritu Musa sibawa Elia mappaitangngi alèna sibawa cahaya polè ri surugaè. Mabbicarani mennang sibawa Yèsus passalenna amatèn-Na iya dè'ènna namaitta napèneddingiwi ri Yèrusalèm. 32 Iyaro wettuè Pètrus sibawa sellao-sellaona matinroni, iyakiya tennasenna-sennani moto, nanaitai Yèsus maccahaya sibawa iya duwa tauwèro tettong silaong Yèsus. 33 Wettunna iya duwa tauwèro maèlo salaiwi Yèsus, makkedani Pètrus ri Yèsus, "Bapa' Guru, manyameng senna'ki kuwaè. Madècèngenni patettokki tellu kèma: sèddi untu' Bapa', sèddi untu' Musa, sibawa sèddito untu' Elia. " (Makkeda makkuwairo Pètrus, dè' napahangngi aga napowada. ) 34 Ri wettu mabbicarana mupa Pètrus, polèni sèuwa ellung, nanasalipuriwi mennang. 35 Na polè ri ellungngèro, naèngkalingai saddaè makkeda, "Iyanaè Ana'-Ku iya Upilè. Engkalingai Alèna!" 36 Pajanana saddaèro, naitani Yèsus alè-alèna mani kuwaro. Mammekko bawammi ana'-ana' gurunna Yèsus passalenna iya manennaro, sibawa dè' nappaissengengngi lao ri niga-niga aga pura naita mennang. 37 Pappa bajanana nonnoni Yèsus sibawa iya tellu ana' gurun-Na polè ri buluèro, na polèna tau maègaè ri Yèsus. 38 Engka kuwaro sèddi tau worowanè polè ri tengnga-tengngana tau maègaèro gora, "Pa' Guru, tulukka taitai ana'ku -- iyaro bawang alè-alèna ana'ku! 39 Rèkko riluruiwi ri roh majaè, tappa gora sibawa matojo watakkalèna angkanna mabbusa bawanna. Iyaro roh-è matteru-terui napanrasa-rasa sibawa dè' namaèlo massu polè ri alèna! 40 Purani uwèllau ana'-ana' gurunna Bapa' untu' paddèsu'i iyaro roh-è, iyakiya dè' naullèi mennang. " 41 Nappèbali Yèsus, "Tenniya culè-culè ikoè! Lao sala tongekko iko sibawa dè' mumateppe! Gangka kègi harusu'ka monro sibawakko sibawa sabbara' lao ri iko? Tiwii iyaro ana'mu kumaiyè!" 42 Ri wettu joppana mupa iyaro ana'è lao ri Yèsus, iyaro roh majaè naggeppuwangngi iyaro ana'è sibawa napatojoi watakkalèna. Iyakiya nagera'i Yèsus iyaro roh-è sibawa napajjappai iyaro ana'è. Nainappa nabbèrèyang paimeng lisu iyaro ana'è lao ri ambo'na. 43 Hèrang maneng tauwè mitai akuwasanna Allataala iya maraja makkuwaèro. Ri wettu pada hèrang manenna mupa sining tauwèro mitai sininna iya napogau'è Yèsus, makkedani Yèsus lao ri ana'-ana' gurun-Na, 44 "Pènessai madècèd-dècèng sibawa aja' muwallupaiwi ada-adak-Kuè: Ana'na Tolinoè riyabbèyangngi matu lao ri akuwasanna tolinoè. " 45 Iyakiya iyaro ana'-ana' gurunna Yèsus dè' napahangngi iyaro adaè. Iyaro gau'è rirahasiyakangngi lao ri mennang kuwammengngi dè' napahangngi. Iyakiya mètaui makkutanangngi iyaro gau'è ri Yèsus. 46 Naompona appangèwangeng ri yelle'na ana'-ana' gurunna Yèsus passalenna niga polè ri mennang iya kaminang battowaè. 47 Naissengngi Yèsus pikkiranna mennang, rimakkuwannanaro malani sèddi ana' baiccu nanasuroi tettong ri seddè-Na. 48 Nainappa makkeda lao ri ana'-ana' gurun-Na, "Tau iya tarimaèngngi iyaè ana'è nasaba Iyya, bettuwanna natarima-Ka. Sibawa tau iya tarimaèk-Ka, natarima towi iya suroèk-Ka. Saba' tau iya kaminang baiccu'è ri yelle'mu, iyanaritu kaminang battowa!" 49 Nakkeda Yohanès, "Puwang, idi mitai tauwè paddèsu'i sètangngè ri laleng asenna Puwang, nariyattèyangngi, saba' dè' napolè ri idi. " 50 Nakkeda Yèsus lao ri Yohanès sibawa ana'-ana' gurun-Na laingngè, "Aja' muèwai, saba' tau iya dè'è naèwako, bettuwanna maccowèi ri iko. " 51 Wettunna macawè'è senna'ni Yèsus riyakka mènrè ri surugaè, malani apettung untu' lao ri Yèrusalèm. 52 Nasuroni tauwè poddiyoloiwi. Sining tau iya Nasuroè lao, muttama'ni risèuwaè kampong ri Samaria kuwaniro napassadiya sini-sininnaè untu' Yèsus. 53 Iyakiya iyaro sining tauwè ri kampongngè dè' namaèlo tarimai Yèsus, saba' manessa senna'i mattengngangngi lao ri Yèrusalèm. 54 Ri wettunna ana'-ana' gurunna Yèsus, iyanaritu Yakobus sibawa Yohanès naisseng passalenna gau'èro, makkedani mennang, "Puwang, maèloki'ga Puwang, riyèllauwi apiè nonno polè ri langiè untu' pabbinasai sining tauwèwè?" 55 Gilinni Yèsus, nanacairiwi mennang. 56 Purairo laoni mennang ri kampong laingngè. 57 Wettunna Yèsus sibawa ana'-ana' gurun-Na patterui joppana, engka tau makkeda lao ri Yèsus, "Pa', maèloka maccowèriwi Bapa' kègi-kègi!" 58 Nappèbali Yèsus, "Asu ale'è mappunnai kalebbong, sibawa manu'-manu'è mappunnai sarang, iyakiya Ana'na Tolinoè dè' nappunnai onrong lèwu. " 59 Nakkeda Yèsus lao risèddiè tau laing, "Accowèno ri Iyya. " Iyakiya makkedai iyaro tauwè, "Pa', palalona riyolo' lisu untu' kuburu'i ambo'ku. " 60 Nappèbali Yèsus, "Leppessangngi siya tau matè kuburu'i taunna matè. Iyakiya iko laono namuwappallebbangengngi karèbaè makkedaè mappammulani Allataala mapparènta. " 61 Engkato tau laing makkeda, "Pa', maèloka maccowèriwi Bapa', iyakiya palaloka lisu riyolo' untu' massimang. " 62 Nakkeda Yèsus lao ri tauwèro, "Tau iya mappammulaènna maddakkala, nagiling limonri, dè' nasitinaja mancaji anggotana umma'na Allataala. "
