1 Dè' namaitta ri munrinna, laoni Yèsus ri kota-kotaè sibawa ri kampong-kampongngè, untu' mabbirittangngi Karèba Madècèngngè makkedaè Allataala mappammulani mapparènta selaku Arung. Iya seppulo duwa ana' gurun-Na maccowè towi silaongengngi. 2 Makkuwatoro siyagangngarè makkunrai iya puraè ripajjappa polè ri roh majaè sibawa lasaè. Iyanaritu Maria iya riyasengngè Magdalèna (pitu sètang pura ripassu polè ri alèna); 3 makkuwatoro Yohana, bainèna Khuza, pegawè saorajana Hèrodès; Susana sibawa maèga mupa makkunrai laingngè. Nanabantui mennang Yèsus sibawa ana'-ana' gurun-Na sibawa ongkoso' alèna. 4 Matteru-terui sining tauwè lao ri Yèsus polè rimaddupa-rupang kota. Na wettunna maègani tau maddeppungeng, nacuritani Yèsus lao ri mennang pakkalarapangeng makkuwaèwè: 5 "Engka sèddi pangampo lao mampo binè. Wettunna mampo, engka binè teppa ri lalengngè. Sibagiyang nalèjja tauwè na laingngè nanrèi manu'-manu'. 6 Engkato teppa ri onrong mabbatu-batuè. Wettunna massu cura'-cura'na iyaro binè, makelle'i nasaba marakkoi tanana. 7 Engkato binè teppa ri tengngana alekale' maddoriè. Iyaro alekale' maddoriè tuwoi silaong iyaro binè, sibawa nalimpenginna angkanna dè' naullèi mabbuwa. 8 Iyakiya engkato binè teppa ri tana macommo'è, natuwo sibawa powassèlè' buwa leppe' wèkkasèratu. " Puranana nacurita pakkalarapangengngèro, makkedani Yèsus, "Rèkko mappunnaiko daucculing, èngkalingai!" 9 Nakkutanana ana'-ana' gurunna Yèsus lao ri Yèsus aga bettuwanna pakkalarapangngèro. 10 Nappèbali Yèsus, "Purano riwèrèng pammasè untu' missengngi rahasiyana pèkkugi Allataala mapparènta selaku Arung. Iyakiya tau laingngè ripaggurui sibawa pakkalarapangeng, kuwammengngi napènessaiwi, iyakiya dè' naissengngi aga iya kajajiyangngè; sibawa marèngkalingai, iyakiya dè' napahang. " 11 "Iyanaè bettuwanna iyaro pakkalarapangngè: Iyaro binè iyanaritu ada-adanna Allataala. 12 Binè iya teppaè ri lalengngè sinrupai sining tau iya mèngkalingaèngngi ada-adaèro. Iyakiya polèi Ibillisi' nanarampasa'i iyaro karèbaè polè ri atinna mennang, kuwammengngi naaja' namateppe' sibawa ripassalama'. 13 Binè iya teppaè ri onrong iya mabbatu-batuè sinrupai tau iya ri wettu naèngkalingana iyaro karèbaè, natarimai sibawa masennang atinna. Iyakiya iyaro karèbaè dè' nakkure' ri laleng atinna. Cinampe'mi bawang mateppe', ri wettu polèna paccobangngè massakkai mennang. 14 Binè iya teppaè ri tengngana alekale' maddoriè sinrupai tau iya mèngkalingaèngngi iyaro karèbaè, iyakiya bata-batai passalenna atuwonna mennang enrengngè macinnana tuwo massennas-sennang sibawa napojinna ri laleng linoèwè. Iya manennaro sipii mennang angkanna dè' napowassèlè' buwa iya matasa'è. 15 Binè iya teppaè ri tana macommo'è sinrupai tau iya mèngkalingaèngngi iyaro karèbaè, sibawa natarona ri laleng atinna iya makessingngè namalempu. Mattahangngi mennang narapi powassèlè' buwa. " 16 "Dè'gaga tau palluwa pajjennangeng nainappa natongko baku, iyarè'ga nataroi ri yawana onrong atinrongngè. Iyakiya nataroi ri yasè'na ajè pajjennangengngè, kuwammengngi tau iya muttama'è naullèi mitai tajanna. 17 Dè'gaga tassubbu dè' napaita matu; sibawa dè'gaga rirahasiyakang dè' naribongkara' sibawa riisseng matu. 18 Rimakkuwannanaro pènessaiwi madècèd-dècèng aga muwèngkalinga. Saba' tau iya mappunnaiyènna riwèrèngngi matu lebbi maègapa; iyakiya tau iya dè'è nappunnai, cèddè iya engkaè ri alèna riyalai matu. " 19 Laoni ri Yèsus indo'na sibawa silessu-silessuren-Na, iyakiya dè' naullèi lettu ri Yèsus nasaba maèga senna' tau. 20 Na engka sèddi tau makkeda ri Yèsus, "Pa', indo'-Mu sibawa silessu-silessuremmu Pa' engkai ri saliweng. Macinnai sita Bapa'. " 21 Iyakiya makkedai Yèsus lao ri mennang, "Sining tau iya mèngkalingaèngngi ada-adanna Allataala sibawa napogau'na, iyanaritu indo' sibawa silessu-silessurek-Ku. " 22 Risèuwaè esso, Yèsus sibawa ana'-ana' gurun-Na mallopiwi. Nakkeda Yèsus lao ri mennang, "Laono mai talliweng ri tapparengngè. " Najoppana mennang. 23 Mattengngangngi mennang sompe, namatinro Yèsus. Tappa natappo' muni anginraja iyaro tapparengngè. Mammulani muttama' uwai ri laleng lopiè, angkanna bahaya manenni mennang. 24 Laoni ana'-ana' gurunna Yèsus ri Yèsus nateddui. Makkedani mennang, "Pa' Guru, Pa' Guru, nakennaki abala!" Moto'ni Yèsus nanagera'i angingngè sibawa bombangngè iya siyappo-appo'è. Napajana angingngè sibawa bombangngè, tennang senna'ni iyaro tapparengngè. 25 Nakkeda Yèsus lao ri ana'-ana' gurun-Na, "Magi nadè' mumateppe lao ri Iyya?" Hèranni mennang sibawa mètau. Nakkedana mennang sèddiè lao ri laingngè, "Niga sitongenna iyaè tauwè, nariturusi parèntana ri angingngè sibawa bombangngè!" 26 Sompe'ni Yèsus sibawa ana'-ana' gurunna matteru lettu ri daèra Gerasa ri liwenna Tappareng Galilèa. 27 Wettunna Yèsus nonno ri pottanangngè, rilokkaini risèddiè tau worowanè iya nauttamakiyè roh maja. Iyaro tauwè polèi ri kotaè. Maittani dè' naengka nappakèyang sibawa dè' namaèlo monro ri bolaè. Ri gowa-gowaè bawang onrong attampungengngè maèlo monro. 28 Wettunna naita Yèsus, gorani nainappa suju' ri yolona Yèsus sibawa mangobbi, "Yèsus Ana'na Allataala Iya Pommatanrè! Maèlo-Ko magaka? Uwèllauwi aja' mucallaka!" 29 Iyaro tauwè makkeda makkuwairo nasaba Yèsus suroi iyaro sètangngè massu polè ri alèna. Biyasani rikuwasai ri sètangngèro, angkanna muni risiyo limanna kuwaèttopa ajèna sibawa rantè nenniya rijagainna tonget-tongeng, naullèto pettuiwi iyaro rantè nainappa ritiwi ri sètangngèro ri padang kessi'è. 30 Nakkutana Yèsus lao ri tauwèro, "Niga asemmu?" Nappèbali iyaro tauwè, "Asekku 'Legiun', " -- saba' engka maèga sètang muttama' ri laleng alèna. 31 Iyaro sining sètangngè naèllauwi sibawa masero kuwammengngi dè' naripaddèsu' ri Yèsus lao ri laleng Balorang Amatèngngè. 32 Ri seddèna onrongngèro engka maèga senna' bawi iya mattengngangngè makkinanrè ri èmpenna bulu-buluè. Iyaro roh-roh majaè naèllauwi sibawa masero lao ri Yèsus kuwammengngi na ripalalo muttama' ri laleng sining bawièro. Nanasitujuini Yèsus. 33 Nanassuna iyaro roh-roh majaè polè ri tauwèro nanauttama ri laleng sining bawièro. Nainappa iyaro sining bawiè larini nanaluppe polè ri wiring balorangngè muttama' ri tapparengngè, natallemme. 34 Naitanana iyaro sining panganrowang bawiè aga kajajiyang, larini nanappallebbangengngi iyaro karèbaè ri kotaè sibawa ri dèsa-dèsaè ri seddèna. 35 Nanassuna sining tauwè untu' mitai aga kajajiyang. Laoni mennang ri Yèsus, nanapolèini mennang kuwaro tau iya puraè ripaleppe' polè risining sètangngè tudang ri seddè ajèna Yèsus, mappakèyanni sibawa mainge'ni. Mètauni mennang. 36 Nacuritani mennang iya mitaèngngi kajajiyangngèro lao risining tauwè pèkkugi iyaro tauwè ripajjappa. 37 Nainappa iyaro sininna pabbanuwana Gerasa naèllauni sibawa masero kuwammengngi nasalaiwi Yèsus iyaro onrongngè, saba' mètau senna' manenni mennang. Jaji mènrè'ni Yèsus ri lopiè maèlo lisu. 38 Tau iya puraè ripaleppe' polè risining sètangngèro naèllauwi ri Yèsus kuwammengngi naweddingngi maccowè. Iyakiya Yèsus suroi lao, adanna, 39 "Lisuno namuwabbirittangngi aga pura napogau' Allataala lao ri iko. " Nanalaona iyaro tauwè mappaissengengngi ri kotaè, aga pura napogau' Yèsus lao ri alèna. 40 Wettunna Yèsus lisu ri liweng tappareng, masennanni sining tauwè duppaiwi nasaba ritajengngi ri mennang. 41 Napolèna sèddi tau, kapalana bola assompangngè ri onrongngèro. Asenna Yairus, suju'ni ri yolona Yèsus naèllauwi sibawa masero kuwammengngi nalao Yèsus ri bolana, 42 nasaba sèddi-sèddinna ana' makkunrainna iya seppuloè duwa taung umuru'na cèddè'pi namatè. Wettunna Yèsus joppa lao ri bolana Yairus, sining tauwè redde'i Yèsus polè tulili. 43 Na ri yelle'na engkato sèddi makkunrai iya seppuloènna duwa taung malasa maddara. Purani napaccappu sininna appunnangenna untu' mabbura ri dottoro'è, iyakiya dè'gaga mullèi pajjappai. 44 Iyaro makkunraiè naddeppèrini Yèsus polè monri, nanagèssai cappa jumbana. Iyatoro wettuè nappèsau massu darana iyaro makkunraiè. 45 Nakkutana Yèsus, "Niga gèssaka?" Nassakka maneng tauwè. Nanakkeda Pètrus, "Pa', maèga senna' tau mattulilingiwi Bapa'; naredde'i mennang Bapa'!" 46 Nakkeda Yèsus, "Iyakiya engka tau gèssaka. Uwisseng saba' engka awatangeng massu polè ri Iyya. " 47 Naissenni iyaro makkunraiè makkedaè riissenni pangkaukenna. Jaji laoni sibawa tènrè nasuju' ri yolona Yèsus. Nacuritani ri yolona sininna tauwè, magi nagèssai Yèsus, sibawa majjappana lasana iyatoro wettuè. 48 Nakkeda Yèsus lao ri makkunraièro, "Ana'-Ku, nasaba mateppe'ko ri Iyya, majjappako. Laono sibawa salama'. " 49 Ri wettu mabbicarana mupa Yèsus, engkasi sèddi tau risuropa polè ri bolana Yairus. Makkedai lao ri Yairus, "Matèni Puwang ana' makkunraitta. Aja'na tasussaiwi Bapa' Guru. " 50 Wettunna Yèsus naèngkalingaro, makkedani lao ri Yairus, "Aja' mumètau. Ateppe'no bawang pasti majjappa matu ana'mu. " 51 Lettu'nana ri bolana Yairus, dè' napalaloi Yèsus muwi sèddi tau muttama' sibawa alèna sangadinna Pètrus, Yohanès, Yakobus sibawa indo' ambo'na iyaro ana'è bawang. 52 Teri maneng tauwè sibawa mpating nasaba matènana iyaro ana'è. Iyakiya makkedai Yèsus, "Aja' muteri. Iyaro ana'è dè' namatè, matinromi bawang!" 53 Nacawa-cawaini mennang Yèsus, nasaba naissenni mennang matèni iyaro ana' makkunraiè. 54 Nainappa nakkatenninni Yèsus limanna iyaro ana'è sibawa makkeda, "Oto'na na'!" 55 Lisuni nyawana iyaro ana'è, na iyatoro wettuè naoto. Purairo nasuroni Yèsus mennang mpèrèngngi nanrè iyaro ana'è. 56 Hèrang senna'ni tomatowanna ana'èro. Iyakiya riyattèyangngi ri Yèsus nappaissengengngi gau'èro lao ri nigi-nigi.
