1 Rikuwasaini Yèsus ri Rohna Allataala wettunna nasalai Salo Yordan. Ripimpinni ri Rohna Allataala lao ri padang kessi'è. 2 Nakkuwanaro ricobai ri Ibillisi' patappulo esso ittana. Ri lalenna wettuèro, dè' agaga nanrè. Jaji paccappurenna malupuni. 3 Nakkeda Ibillisi' ri Alèna, "Ana'na-Koto Allataala? Jaji suroni iyaè batuè mancaji roti. " 4 Nappèbali Yèsus, "Ri laleng Kitta'è tarokii, 'Rupa tauwè dè' naullèi tuwo polè ri rotiè bawang. ' " 5 Nainappa Ibillisi' natiwi Yèsus ri onrong iya matanrè, na ri laleng sikèdè mata nappaitangngi Ibillisi' lao ri Yèsus sininna akkarungengngè ri linoè. 6 Nakkeda Ibillisi' lao ri Yèsus, "Iya manennaè akuwasangngè sibawa asugirengngè uwabbèrèyangngi matu lao ri Iko, saba' iya manennaro purani riwèrèkka, naweddikka mabbèrèyangngi lao ri nigi-nigi iya upojiyè mpèrèngngi. 7 Iya manennaro mancajiwi appunnangem-Mu matu, rèkko suju'-Ko sompaka. " 8 Nappèbali Yèsus, "Ri laleng Kitta'è tarokii, 'Sitinajako pakalebbii Puwang Allataalamu sibawa tumaningiwi Alèna bawang!' " 9 Nainappa Ibillisi' natiwi Yèsus ri Yèrusalèm, nanataroi ri yasè'na coppo'na Bolana Puwangngè, nanakkeda lao ri Yèsus, "Ana'na-Koto Allataala? Jaji luppe'no polè kuwaè. 10 Saba' ri laleng Kitta'è tarokii, 'Nasuroi matu Allataala sining malaèka'-Na jagai-Ko madècèd-dècèng. ' 11 Sibawa topa, 'Natimak-Ko matu sining malaèka'è sibawa limanna mennang, kuwammengngi aja' nanatabbuttu ajè-Mu ri batuè. ' " 12 Nappèbali Yèsus, "Ri laleng Kitta'è tarokii, 'Aja' mucobaiwi Puwang, Allataalamu. ' " 13 Puranana Ibillisi' nacobai Yèsus sibawa maddupa-rupang cara, nasalaini Yèsus namattajeng wettu makessingngè. 14 Nainappa lisuni Yèsus ri Galilèa, narikuwasaina ri Rohna Allataala. Karèba passalenna Alèna tassiyani ri sininna daèraèro. 15 Mappagguruni risining bola assompangngè, na sininna tauwè pojiwi Alèna. 16 Laosi paimeng Yèsus ri Nazarèt, onron-Na ripawekke. Ri esso Saba'è, situru abiyasan-Na laoni ri bola assompangngè. Tettonni untu' bacai Kitta'è, 17 nariwèrèng kitta'na Nabi Yèsaya. Natimpa'ni kitta iya rilulungngèro, na-Nalolongengngi aya'èwè, 18 "Engkai Rohna Puwangngè ri Iyya, saba' pura-Ka nalanti' untu' mabbirittangngi Karèba Madècèngngè lao ri tau kasiyasiè. Nasuro-Ka untu' mappallebbangengngi aleppekengngè lao ri tau ritawangngè sibawa ajjappang lao ri tau butaè; untu' paleppe'i tau iya ripanrasa-rasaè 19 sibawa mabbirittangngi apolènna wettunna Puwangngè passalama'i umma'-Na. " 20 Nalulunni paimeng Yèsus iyaro kitta'è, napalisui ri pajagaè, nainappa tudang. Sininna tauwè ri laleng bola assompangngèro mitai Alèna. 21 Nappammulana Yèsus mabbicara lao ri mennang, makkuwaè, "Iyaè aya'-aya'na Kitta'è ripaddupani iyaè essoè ri wettu muwèngkalingana. " 22 Ada-ada iya Napowadaè makessing senna', angkanna bengnga mennang sibawa nasokon-Na. Makkedani mennang, "Tenniyaga iyaè ana'na Yusuf?" 23 Nakkeda Yèsus lao ri mennang, "Pasti mupakèi iyaè warèkkadaè lao ri Iyya, 'Eh dottoro', pajjappai alè-Mu. Anu makalallaing riyèngkalingaè iya Mupogau'è ri Kapernaum, pogau' toni ri kampong assalem-Mu. ' " 24 Natambaiwi Yèsus, "Engngerangngi dè' gaga nabi ripakalebbi ri kampong assalenna. 25 Iyakiya èngkalingai: ri wettunna Elia, wettunna dè' nateppa bosiè tellut taung sitengnga ittana, polèi akkadèrengngè iya masero senna'è ri sininna wanuwaè. Iyaro wettuè engka maèga janda ri Israèliè. 26 Namuni makkuwaro, Allataala dè' nasuroi Elia lao risala sèddinna polè risining jandaèro sangadinna banna lao risèddiè janda ri Sarfat ri daèrana Sidon. 27 Makkuwatoro ri wettunna Nabi Elisa engka maèga tau ri Israèliè malasa oli iya mappakatautauè, iyakiya dè' sèddi polè ri mennang ripajjappa; sangadinna Naaman tau Siriaèro. " 28 Sininna tauwè ri bola assompangngèro macai senna'ni wettunna naèngkalinga gau'èro. 29 Tettonni mennang nainappa narukka Yèsus massu ri saliweng kota, sibawa natiwii ri èmpenna buluè, naonroiyè napatettong kotana mennang. Akkattana mennang maèloi sorongngi ri laleng peppingngè. 30 Iyakiya nalullu'i Yèsus iyaro tau maègaè nainappa lao. 31 Nainappa Yèsus lao ri Kapernaum ri Galilèa. Kuwaniro napagguru sining tauwè ri esso Saba'è. 32 Bengngani mennang mitai carana mappagguru, saba' mabbicarai sibawa akuwasang. 33 Kuwaro ri bola assompangngè engka sèddi tau iya nakuwasaiyè sètang. Iyaro tauwè kelli'-kelli'ni, 34 "Eh Yèsus, tau Nazarèt, aga maèlo Mugaukekki? Polè-Koga maèlo pabbinasaki? Uwisseng nigako, iko suro polè ri Allataala iya mapaccingngè!" 35 Naggera' Yèsus lao ri sètangngèro, "Ammekkoko! Assuko polè ri tauwèwè!" Nainappa iyaro sètangngè naggeppuwangngi iyaro tauwè ri yolona maneng mennang, nainappa massu polè ri tauwèro dè'na napeddiriwi. 36 Hèrang manenni tauwè, nakkeda sèddiè lao ri laingngè, "Tenniya culè-culè ada-adan-Na. Nasibawang akuwasang, nasuroi roh-roh majaè massu, namassu tona mennang!" 37 Na karèba passalenna Yèsus tassiyani ri sininna daèraèro. 38 Nasalaini Yèsus iyaro bola assompangngè, nanalao ri bolana Simon. Matuwa makkunrainna Simon mattengngangngi masemmeng, nasining tauwè napaissengini Yèsus gau'èro. 39 Nalaona Yèsus ri onrong atinronna makkunraièro, napaddèsu'i iyaro semmengngè. Nasorona iyaro semmengngè, naoto'na matuwa makkunrainna Simon nanatumaningiwi mennang. 40 Wettunna labu essoè, natiwini sininna tauwè lao ri Yèsus silessu-silessurenna iya nakennaè maddupa-rupang lasa. Napalènne'ni limanna Yèsus ri yasè'na mennang tungke'-tungke' nanapajjappai. 41 Nassuna sining sètangngè polè ri tau maègaè, nagora-gorato, "Ikona Ana'na Allataala!" Iyakiya rigera'i mennang ri Yèsus sibawa dè'naripalalo mennang mabbicara, saba' naissengngi mennang makkedaè Alèna ritu Arung Pappassalama'è. 42 Wettunna mammula mompo matanna essoè, nasalaini Yèsus iyaro kotaè nanalao risèuwaè onrong iya masino-sinoè. Nappammulana tauwè sappai Alèna, na wettunna mennang naruntu', makkuragani kuwammengngi aja' narisalai mennang. 43 Iyakiya makkedai Yèsus, "Karèba Madècèng passalenna Allataala sibawa Apparèntanna harusu' towi Uwabbirittang ri kota-kota laingngè, saba' untu' iyanaro narisuro-Ka muttama' ri linoè. " 44 Iyanaro saba'na nakkatobba Yèsus ri laleng sining bola assompangngè ri sininna wanuwa Yudèa.
