1 Ri taung maseppulona lima apparèntanna Kaisar Tibèrius, Pontius Pilatus mancaji gubernur ri Yudèa, sibawa Hèrodès mapparènta ri Galilèa. Filipus, silessurenna Hèrodès mapparèntai ri daèrana Iturèa sibawa Trakhonitis, na Lisanias mapparèntai ri Abilènè. 2 Iya mancajiyè imang-ngimang lompo iyanaritu Hanas sibawa Kayafas. Ri taungngènnaro nabbicara Allataala ri padang kessi'è lao ri Yohanès, ana'na Zakharia. 3 Nalao tulilina Yohanès ri sininna daèrana Salo Yordan sibawa palettu'i karèba polè ri Allataala. Nagora Yohanès, "Toba'no polè ri dosa-dosamu sibawa harusu'ko ricemmè, kuwammengngi naddampengekko Allataala. " 4 Iyaro siturui iya riyokiè ri laleng kitta'na Nabi Yèsaya: "Engka tau gora-gora ri padang kessi'è, 'Passadiyangengngi laleng Puwangngè, paratangengngi laleng untu' Alèna. 5 Tungke' lompo' sitinajai ritèmpung, tungke' bulu sibawa bulu-buluè riparatai. Laleng mallèko-lèkoè sitinajai ripallempu, sibawa laleng makkalebbok-kalebbongngè riparatai. 6 Sining tauwè ri sininna linoè naitai matu Allataala passalama'i tolinoè!' " 7 Maèga tau lao ri Yohanès untu' ricemmè. Makkedai Yohanès lao ri mennang, "Tau majako iko! Niga powadai makkedaè mullè leppe' polè ri pahukkungenna Allataala iya mangoloè? 8 Appaitanni ri laleng pangkaukemmu makkedaè toba'no polè ri dosa-dosamu! Aja' muwakkeda makkedaè Abraham iyanaritu nènè-nènèmu. Engngerangngi! Polè ri batu-batuèwè, naullèi Allataala pinru wija-wijanna untu' Abraham! 9 Sadiyani wasè untu' tubbangngi pong ajuè lettu ri ure'-ure'na. Tungke' pong aju iya dè'è napowassèlè' buwa makessing ritubbangngi matu naribuwang ri laleng apiè. " 10 "Jaji, aga harusu' ripogau'?" pakkutanana sining tauwè lao ri Yohanès. 11 Nappèbali Yohanès, "Tau iya mappunnaiyè duwallampa waju, harusu'i nawèrèng silampa iya dè'è nappunnai; sibawa tau iya mappunnaiyè anrè, harusu'i nabagè. " 12 Polè toni passinge'-singe' simaè ri Yohanès untu' ricemmè. Makkutanani mennang, "Bapa' Guru, aga harusu' ripogau'?" 13 Nappèbali Yohanès, "Aja' musinge'i lebbi maèga naiya pura ripattentuè. " 14 Engkato parajuri' makkutana, "Pèkkugitosi idi'è? Aga harusu' ripogau'?" Nappèbali Yohanès, "Aja' mupanrasa-rasai muwi niga-niga, sibawa aja' murampasa' dowi nasaba pètenna'-pètenna' dè'è natongeng. Asennanno sibawa gajimmu!" 15 Iyaro wettuè mammulani sining tauwè makkutana, aga Yohanès Arung Pappassalama' natajengngè mennang. 16 Iyanaro saba'na nakkeda Yohanès lao ri sininna mennang, "Iyya ucemmèko sibawa uwai, iyakiya polèi matu tau iya lebbi battowaè na iyya. Muwi lukkai tulu sapatun-Na dè'to usitinaja. Nacemmèko matu sibawa Rohna Allataala sibawa api. 17 Ri liman-Na engka pattapi untu' tapiwi sininna gandonna gangka mapaccing. Napaddeppungengngi matu gandongngè ri laleng lappoè, iyakiya sininna awanna Natunui matu ri laleng api iya dè'è nawedding peddè!" 18 Makkuwaniro Yohanès pangajariwi sining tauwè sibawa maddupa-rupang cara, ri wettu nappallebbangenna Karèba Madècèngngè. 19 Iyakiya Hèrodès, iya makuwasaè ri Galilèa, riyamparengngi ri Yohanès passalenna akawingenna sibawa Hèrodias, bainèna silessurenna, sibawa passalenna sininna ja laingngè iya puraè napogau'. 20 Iyakiya mala Hèrodès natambaiwi sining jana ri laleng naputtama'na Yohanès ri laleng tarungkuè. 21 Puranana ricemmè maneng iyaro tauwè, ricemmè toni Yèsus. Na wettunna massempajang, tattimpa'ni langiè, 22 na Rohna Allataala nonnoni ri yasè'-Na sinrupa jangang-jangangngè. Nanaèngkalingai saddanna Allataala makkeda, "Ikona Ana'-Ku iya Uwamasèiyè. Mupèsennangi atik-Ku. " 23 Wettunna Yèsus napammulai jama-jaman-Na, umuru'-Na kira-kira telluppulo taung. Manuru' pallolongenna tauwè, Alèna ana'na Yusuf, ana' Eli, 24 ana' Maat, ana' Lèwi, ana' Malkhi, ana' Yanai, ana' Yusuf, 25 ana' Matica, ana' Amos, ana' Nahum, ana' Hèsli, ana' Nagai, 26 ana' Matat, ana' Matica, ana' Simèi, ana' Yosèkh, ana' Yoda, 27 ana' Yohanan, ana' Rèsa, ana' Zèrubabel, ana' Sèaltièl, ana' Nèri, 28 ana' Malkhi, ana' Adi, ana' Kosam, ana' Elmadam, ana' Er, 29 ana' Yèsua, ana' Elièser, ana' Yorim, ana' Matat, ana' Lèwi, 30 ana' Simèon, ana' Yèhuda, ana' Yusuf, ana' Yonam, ana' Elyakim, 31 ana' Mèlèa, ana' Mina, ana' Matata, ana' Natan, ana' Daud, 32 ana' Isai, ana' Obèd, ana' Boas, ana' Salmon, ana' Nahason, 33 ana' Aminadab, ana' Admin, ana' Arni, ana' Hèzron, ana' Pèrès, ana' Yèhuda, 34 ana' Yakub, ana' Ishak, ana' Abraham, ana' Tèrah, ana' Nahor, 35 ana' Sèrug, ana' Rèhu, ana' Pèlèg, ana' Eber, ana' Salmon, 36 ana' Kènan, ana' Arpakhsad, ana' Sèm, ana' Nuh, ana' Lamèkh, 37 ana' Mètusalah, ana' Hènokh, ana' Yarèd, ana' Mahalalèèl, ana' Kènan, 38 ana' Enos, ana' Sèt, ana' Adam, ana' Allataala.
