1 Ri esso Aha'è, maèlè senna'ni iyaro sining makkunraiè lao ri tampungngè tiwi rampa-rampa iya puraè napassadiya mennang. 2 Lettu'nana ri tampungngè, napolèini mennang batu pattongkona pura rigalèttè. 3 Namuttama'na ri laleng tampungngèro, iyakiya dè' naruntu'i ujuna Yèsus kuwaro. 4 Ri wettu tettonna mupa mennang kuwaro sibawa pusana pikkiri'i iyaro gau'è tappa engka duwa tau tettong ri seddèna sibawa millakkillang pakèyanna. 5 Mètau senna'ni mennang, nainappa suju' lettu ri tanaè, nakkeda iya duwa tauwèro lao ri mennang, "Magi musappai tau tuwoè ri yelle'na tau matè? 6 Dè'ni kuwaè; moto'ni! Engngerangngi aga pura Napowada lao ri iko wettunna mupa ri Galilèa, 7 makkedaè, 'Ana'na Tolinoè harusu'i riyabbèrèyang lao ri tau madosaè; nainappa risalli, na ri esso matelluè tuwoi matu paimeng. ' " 8 Naèngngeranni sining makkunraièro ada-adanna Yèsus. 9 Lisunnana polè ri tampungngèro, nacuritani mennang sininna iyaro kajajiyangngè lao ri seppuloè sèddi rasul sibawa sininna tau maccowè laingngè. 10 Sining makkunrai iya powadangngèngngi iya manennaro lao ri ana'-ana' gurunna Yèsus, iyanaritu: Maria Magdalèna, Yohana sibawa Maria indo'na Yakobus, enrengngè sining makkunrai laingngè iya silaongngè mennang. 11 Iyakiya iyaro rasul-rasul-è nasemmi iyaro sining makkunraiè maccurita bawammi. Dè' natepperiwi mennang curitana iyaro sining makkunraiè. 12 Iyakiya tokkongngi Pètrus nalari lao ri tampungngè. Nabbukku makkita lilaleng, nanaitani bannami kaing pawwalunna bawang kuwaro. Hèrang senna'ni Pètrus, nainappa lisu sibawa penno pakkutana ri laleng atinna passalenna aga pura kajajiyang. 13 Iyatoro essoè, engka duwa tau maccowè ri Yèsus iya joppaè lao risèddiè dèsa iya riyasengngè Emaus, kira-kira seppulo sèddi kilo bèlana polè ri Yèrusalèm. 14 Ri laleng joppana mennang nabicarai passalenna sininna gau'è iyaro puraè kajajiyang. 15 Ri wettu mabbicara-bicarana mennang pada passui pallolongenna, alènana Yèsus polè joppa silaong mennang. 16 Naitani mennang Yèsus, iyakiya engka mèbbui mennang nadè' narupai Alèna. 17 Nakkeda Yèsus, "Passaleng aga mubicara ri tengnga laleng onna'?" Mappèsauni mennang sibawa masussa tappana. 18 Na sèddi polè ri mennang, iya riyasengngè Klèopas, makkutana ri Yèsus, "Bapa'ga bawang alè-alèna topolè-polè ri Yèrusalèm dè' naissengngi gau' iya kajajiyangngè kuwaro cèddè-cèddè'èwè?" 19 Nakkutana Yèsus, "Gau' agaro?" Nappèbali mennang, "Gau' kajajiyangngè lao ri Yèsus, tau polè ri Nazarèt. Nabiwi; ada-adan-Na sibawa pangkauken-Na makuwasa senna'i -- muwi situru pakkitanna Allataala muwi situru pakkitanna sininna tauwè. 20 Kapala-kapala imangngè sibawa sining pamimpinna bangsata mabbèrèyangngi untu' rihukkung matè, na-Nasallii mennang! 21 Padahal riyammènasaiwi makkedaè Alèna ritu paleppe'i matu Israèliè! Na iyaè essoè, esso matellunnani sipongenna kajajiyang gau'èro. 22 Na engka topa siyagangngarè makkunrai polè ri yelle'ta mèbbuki tassèleng. Maèlè senna' mupa nalao mennang ri tampungngè, 23 iyakiya dè' naruntu'i uju-Na kuwaro. Nalisu mennang powadai makkedaè mitai mennang malaèka', na iyaro malaèka'è powadai makkedaè tuwoni Yèsus. 24 Siyagangngarè tau polè ri idi lao ri tampungngè nanapolèini makkedaè aga napowada sining makkunraièro makkuwa mèmengngi, iyakiya dè' naitai Yèsus. " 25 Nakkeda Yèsus lao ri mennang, "Mèmeng madonggoko! Matengnge senna'ko matepperiwi sininna iya puraè napowada nabi-nabiè! 26 Dè'ga na Arung Pappassalama'è harusu'i napèneddingi riyolo' anrasa-rasangngè, nainappa nalolongeng alebbiren-Na?" 27 Nainappa napakatajang Yèsus lao ri mennang aga tarokiè ri laleng sininna Kitta'è passalenna Alèna, mappammulai ri Kitta'-kitta'na Musa enrengngè Kitta'na sining Nabiè. 28 Namacawè'na mennang ri dèsa iya nakkattaiyè. Najjaini Yèsus maèlo joppa matteru, 29 iyakiya ritahangngi ri mennang. Nakkeda mennang, "Onrono ri onrotta, mammulani wenni sibawa mammula toni mapettang. " Nauttama'na Yèsus untu' mabbenni ri onronna mennang. 30 Ri wettu tudanna mennang manrè, malani Yèsus roti, Nasukkuru' ri Allataala, nainappa Napuwè-puwè iyaro rotiè, na-Nawèrèngngi lao ri mennang. 31 Namainge'na mennang makkedaè Yèsus iyaro. Iyakiya lennye'i polè ri pakkitanna. 32 Nakkeda mennang sèddiè lao ri laingngè, "Dè'ga nasamanna luwang atitta wettunna mabbicara ri idi ri tengnga laleng, wettunna napakatajang lise'na Kitta'è lao ri idi?" 33 Iyatoro wettuè natettong nalisu lao ri Yèrusalèm. Napolèini mennang kuwaro iya seppuloè sèddi ana' gurunna Yèsus maddeppungeng sibawa laingngè. 34 Nakkedana mennanro, "Mèmeng tongeng, tuwoni paimeng Puwangngè! Purani nappaitang Alèna lao ri Simon!" 35 Iya duwa tau maccowèriyèngngi Yèsus iya nappa polèro nacuritani pangalamanna mennang ri tengnga allalengenna, sibawa pèkkugi mennang rupai Puwangngè ri wettu Napuwè'-puwè'na rotiè. 36 Ri wettu maccuritana mupa mennang, tappa engka muni Yèsus tettong ri tengnga-tengngana sibawa makkeda, "Salèwangekko!" 37 Tassèlenni mennang sibawa mètau, nasaba nasengngi mennang mita sètang. 38 Iyakiya makkedai Yèsus, "Magi mumètau? Magi naompo abata-batangngè ri laleng atimmu? 39 Itai limak-Ku sibawa ajè-Ku. Issenni, makkedaè Iyya'naè! Karawani sibawa pènessaini, nasaba sètangngè dè' nappunnai juku iyarè'ga buku, pada-pada iya muwitaè ri Iyya. " 40 Makkeda makkuwairo Yèsus nanappaitang towi lao ri mennang limanna sibawa ajè-Na. 41 Na riwettu dè'na mupa namateppe' mennang, nasaba marennu senna'na sibawa hèranna, makkutanani Yèsus ri mennang, "Engkaga nanrè muwappunnai kuwaè?" 42 Riwèrènni ri mennang sipolo balè pura nasu. 43 Nalani Yèsus iyaro balè, nananrèi ri yolona mennang. 44 Purairo makkedani lao ri mennang, "Iyanaè gau'-gau' iya puraè Upowadakko wettuk-Ku sibawa mupo: makkedaè tungke' gau' iya tarokiè passalenna Iyya ri laleng Kitta'na Musa, sining Nabiè, sibawa Mazmur-è, harusu'i kajajiyang. " 45 Nanatimpa'ni Yèsus akkalenna mennang untu' pahangngi akkattana Kitta'è. 46 Nakkeda Yèsus lao ri mennang, "Ri laleng Kitta'è tarokii makkedaè Arung Pappassalama'è harusu'i manrasa-rasa, sibawa harusu'i moto' paimeng polè ri amatènna ri esso matelluè. 47 Makkuwatoro ri laleng asenna iyaro Arung Pappassalama'è harusu'i riyabbirittang lao ri sininna bangsaè makkedaè harusu'i toba' rupa tauwè, sibawa Allataala maddampengengngi dosaè. Na iyaro karèbaè harusu'i riyabbirittang mappammulai ri Yèrusalèm. 48 Ikona ritu sabbi'-sabbinna iya manenro. 49 Na alè-Ku maèlo kiringngi lao ri iko aga pura najjanciyang Ambo'è. Iyakiya harusu'ko tette mattajeng ri kotaèwè narapi akuwasang polè ri Allataala pennoiko. " 50 Purairo natiwini Yèsus mennang massu ri saliweng kota lettu ri Bètania. Kuwaniro nakka liman-Na, na-Nabarakkakiwi mennang. 51 Ri wettu Napogau'naro, tarakkani mènrè ri surugaè, nassaran-Na sibawa mennang. 52 Suju'ni mennang sompai, nainappa lisu ri Yèrusalèm sibawa marennu senna'na atinna, 53 sibawa matteru-terui pojiwi Allataala ri Bolana Puwangngè.
