1 Ramè-ramè Roti Dè'è Raginna iya riyasengngè Paska macawè'ni. 2 Kapala-kapalana imangngè sibawa guru-guru agamaè sappani laleng untu' mpunoi Yèsus secara mammekko-mekko nasaba mètaui mennang ri tau maègaè. 3 Namuttama'na Ibillisi'è ri Yudas iya riyasengngètto Iskariot, iyanaritu sèddiwi polè riseppuloè duwa ana' gurunna Yèsus. 4 Rimakkuwannanaro laoni Yudas barunding sibawa kapala-kapala imangngè sibawa sining kapala pengawalna Bolana Puwangngè passalenna pèkkugi naullèi mabbèrèyangngi Yèsus lao ri mennang. 5 Masennang senna'ni mennang sibawa majjanci maèlo mpèrèngngi dowi. 6 Nasitujuini Yudas, nammulana sappa kasempatang untu' mabbèrèyangngi Yèsus lao ri mennang, sibawa dè' naissengngi tauwè. 7 Narapini essona Ramè-ramè Roti Dè'è Raginna makkedaè bimbala' untu' nanrè Paskaè rigèrè. 8 Nasuroni Yèsus Pètrus sibawa Yohanès, "Laono mupassaniyasangekki nanrè Paska. " 9 Nakkutana mennang, "Kègai taèlori Bapa' ripassaniyasa?" 10 Nappèbali Yèsus, "Ri wettu muttama'mu ri kotaè, siruntu'ko matu sèddi worowanè iya tiwiè sèuwa kendi mallise' uwai. Accowèriwi lao ri bola nauttamakiyè, 11 sibawa powadangngi iyaro punna bolaè: Makkedai Guruè, 'Kègai onronna ana'-ana' guruk-Ku sibawa Iyya manrè nanrè Paska?' 12 Nanajellokekko matu iyaro punna bolaè sèuwa bili' battowa ri lotèngngè, sakke' sibawa parèwanna. Passaniyasa manenni kuwaro. " 13 Nalaona Pètrus sibawa Yohanès, nanapolèi manenni pada-pada iya napowadaè Yèsus. Napassaniyasani mennang nanrè Paskaèro. 14 Narapinana wettunna manrè nanrè Paska, tudanni Yèsus silaong sining ana' gurun-Na ri onrong perjamuwangngè. 15 Nakkeda lao ri mennang, "Macinna senna'-Ka sisamako manrè nanrè Paskaèwè riwettu dè'napa Uwanrasa-rasa. 16 Saba' ateppe'no: Dè'na uwanrèi matu iyaè narapi bettuwanna perjamuwangngèwè ripannessa ri Lino Barunna Allataala. " 17 Purairo nakkani Yèsus ènungeng anggoro'è, nainappa massempajang sukkuru' lao ri Allataala, nanakkeda, "Alani iyaè, sibawa abbagè-bagèyangngi; 18 nasaba issenni: mappammulai makkekkuwangngè dè'na Uwènungngi matu iyaè anggoro'è narapi Allataala makuwasai manengngi. " 19 Purairo nalani Yèsus rotiè. Napuranana massempajang sukkuru', Napuwè'-puwè'ni iyaro rotiè sibawa liman-Na, nainappa nawèrèng mennang, sibawa makkeda, "Iyanaè tubuk-Ku [iya riyabbèrèyangngè untu' iko. Pogau'ni iyaè untu' sènge'-Ka. " 20 Makkuwatoro purana manrè, Nabbèrèyanni ènungeng anggoro'è lao ri mennang sibawa makkeda, "Iyaè ènungengngè iyanaritu assijancingenna Allataala iya mabaruè, iya risahkangngè sibawa dara-Ku -- dara iya ripatabbollongngè untu' iko. ]" 21 "Iyakiya itai! Tau iya bali'bellariyèk-Ka engkai kuwaè sibawak-Ka! 22 Mèmeng matèi matu Ana'na Tolinoè pada-pada pura napattentuè Allataala; iyakiya cilakai tau iya bali'bellariyèngngi!" 23 Nappammulana mennang makkutana sèddiè lao ri laingngè, niga polè ri yelle'na mennang iya pogau'èngngi matu gau'èro. 24 Naompona appangèwangeng ri yelle'na ana'-ana' gurunna Yèsus, passalenna niga polè ri yelle'na mennang harusu' riyangga' kaminang battowa. 25 Nakkeda Yèsus lao ri mennang, "Sining arunna bangsaè iya dè'è naissengngi Allataala napanrasa-rasai ra'ya'na, sibawa sining tomakuwasaè riyasengngi 'Pallinrunna Ra'ya'è. ' 26 Iyakiya iko dè' naweddikko makkuwaro. Sibalè'na, tau iya kaminang battowaè ri yelle'mu harusu'i mancaji pada-pada iya kaminang baiccu'è, sibawa pamimpingngè harusu'i mancaji pada-pada pattumaniè. 27 Niga lebbi battowa: tau iya tudangngè manrè ri mèjangngè, iyarè'ga tau iya tumaningiyèngngi? Tentu tau iya tudangngè. Iyakiya Iyya engkaka ri yelle'mu selaku pattumani. 28 Ri laleng sininna asussak-Ku, tuli musibawak-Ka. 29 Pada-pada Ambo'è pura mpèrèk-Ka ha' untu' mapparènta, makkuwatoniro Uwèrèkko matu iyaro ha'è. 30 Narimakkuwannanaro weddikko maccowè massennas-sennang sibawa Iyya ri wettuk-Ku mancaji Arung. Natudakko matu ri yasè'na seppuloè duwa kadèra akkarungengngè untu' parèntai seppuloè duwa suku bangsana Israèliè. " 31 "Simon, Simon, èngkalingai! Purani ripalalo Ibillisi'è untu' mojiko; pada-pada gandongngè ripallaing polè ri olina, makkuwatoniro iya madècèngngè ripallaing matu polè ri majaè. 32 Iyakiya purana massempajangekko, Simon, kuwammengngi aja' nalollo teppe'mu. Sibawa narèkko lisuno ri Iyya, harusu'ko pèwatangiwi silessu-silessuremmu. " 33 Nappèbali Pètrus, "Puwang, sadiyaka muttama' tarungkuè sibawa matè silaong Idi Puwang!" 34 Nakkeda Yèsus, "Ateppe'no Pètrus, riwettu dè'napa naoni manu'è iyaè essoèwè, wèkkatelluni muwassakkarek-Ka. " 35 Purairo makkedani Yèsus lao ri mennang, "Riyolo wettunna Usuroko sibawa dè' Upalaloko tiwi tase'-tase', sèpu iyarè'ga sapatu, engkaga akurangemmu?" Nappèbali mennang, "Dè'!" 36 Nakkeda Yèsus, "Iyakiya makkekkuwangngè niga mappunnai tase'-tase' iyarè'ga sèpu, harusu'i natiwi; sibawa niga dè' nappunnai peddang, harusu'i nabalu' jumbana untu' melli peddang. 37 Saba', ateppe'no, aya'na Kitta'è iya makkedaè, 'Riyangga'i matu selaku sèddi tau maja, ' harusu'i kajajiyang ri alè-Ku. Saba' aga taroki ri lalenna Kitta'è passalenna Iyya, kajajiyanni makkekkuwangngèwè. " 38 Nakkeda ana'-ana' gurunna Yèsus, "Puwang, itai, engka duwa peddang kuwaè. " Nappèbali Yèsus, "Sikuna!" 39 Nasalaini Yèsus kotaè nalao pada-pada biyasaè ri Bulu-bulu Zaitun, nalaoto ana'-ana' gurun-Na silaongengngi. 40 Lettu'nana kuwaro, makkedani lao ri mennang, "Assempajakko kuwammengngi aja' mupèneddingiwi paccobangngè. " 41 Nalaona Yèsus mabèla-bèla cèddè polè ri mennang, kira-kira sipaggenrungeng, nainappa makkaluttu massempajang, 42 adan-Na, "Ambo', rèkko weddingngi, pabèlaiwi polè ri Iyya anrasa-rasang iya harusu'è Upèneddingi. Iyakiya aja' nasituru èlo-Ku, sangadinna situru èlona Ambo' bawang. " [ 43 Engka sèddi malaèka' lao ri Alèna pèwatangiwi. 44 Manrasa-rasa senna'ni Yèsus secara batèng, angkanna pèdè' matonget-tongenni massempajang. Puse'-Na pada-padai daraè tetti ri tanaè. ] 45 Puranana massempajang, lisuni Yèsus ri ana'-ana' gurun-Na. Napolèini mennang matinro nasaba messè senna'i. 46 Nakkeda lao ri mennang, "Magi mumatinro? Oto'no namuwassempajang, kuwammengngi dè' nakennako paccobang. " 47 Ri wettu mabbicarana mupa Yèsus, polèni sirombongang tau. Ripimpingngi mennang ri Yudas, sala sèddinna ana' gurunna Yèsus. Nalaona Yudas ri Yèsus nanabauwi. 48 Iyakiya makkedai Yèsus lao ri Yudas, "Yudas, maèlokoga bali'bellariwi Ana'na Tolinoè sibawa pabbau?" 49 Wettunna ana'-ana' gurunna Yèsus iya engkaè kuwaro naita aga iya maèloè kajajiyang, makkedani mennang, "Puwang, rilurui bawanni sibawa peddang!" 50 Na sala sèddinna polè ri mennang munrui atanna imang lompoè sibawa peddang angkanna pettu daucculing ataunna. 51 Iyakiya makkedai Yèsus, "Sikuna!" Nainappa nakarawa daucculinna iyaro tauwè sibawa napajjappai. 52 Nanakkeda Yèsus lao ri kapala-kapala imangngè sibawa sining parawira pangawalna Bolana Puwangngè, enrengngè sining pamimpinna Yahudiè iya engkaè kuwaro untu' tikkengngi, "Tau maja-Ka'ga, namupolè sibawa peddang nenniya tarasulu untu' tikkek-Ka? 53 Esso-essoka sibawa ri Bolana Allataala, magi nadè' mutikkek-Ka? Iyakiya iyanaè wettunna tinda'ko, sibawa wettunna pettangngè makkatenning akuwasang. " 54 Natikkenni mennang Yèsus nanatiwii ri bolana imang lompoè. Maccoweni Pètrus polè mabèla. 55 Ri tengnga-tengngana seddè bolaèro ripalluwa'ni api appuluè, nalaona Pètrus tudang silaong sining tau iya tudangngè mattulilingiwi. 56 Sala sèddinna pattumani makkunrai mitai Pètrus tudang ri seddèna apièro; naiyaro pattumani makkunraiè napènessaini Pètrus, nainappa makkeda, "Iyaè tauwè silaong towi onna' Yèsus!" 57 Iyakiya massakkai Pètrus. Nanakkeda, "Dè' sises-siseng uwissengngi iyaro tauwè!" 58 Dè' namaitta ri munrinna, engka sèddi tau laing mitai Pètrus sibawa makkeda, "Ikoto sala sèddinna polè ri mennang!" Iyakiya mappèbaliwi Pètrus, "Dè', tenniyaka!" 59 Kira-kira sijang ri munrinna, engka sèddi tau laissi makkeda sibawa sadda battowa, "Mèmeng iyaè tauwè ana' gurunnai Yèsus, saba' tau Galilèa towi!" 60 Iyakiya mappèbaliwi Pètrus, "Aga akkattamu, dè' uwissengngi!" Iyatoro wettuè, ri wettu mabbicarana mupa Pètrus, naonina manu'è. 61 Nagilinna Yèsus nanaitai Pètrus. Nanaèngngeranni Pètrus, pura makkedai Puwangngè ri alèna, "Riwettu dè'napa naoni manu'è iya essoèwè, wèkkatelluni muwassakkarek-Ka. " 62 Nassuna Pètrus polè kuwaro nateri tassènge'-sènge'. 63 Sining tau iya jagaiyèngngi Yèsus, nacculè-culèini sibawa nababbai. 64 Natongkoi mennang matan-Na sibawa makkutana ri Alèna, "Coba teppui niga barasa'-Ko!" 65 Maèga mupa ada-ada paccella iya napowadaè lao ri alèna. 66 Elènana, sining pamimpinna Yahudiè, kapala-kapala imangngè, sibawa guru-guru agamaè maddeppungeng, nainappa Yèsus ritiwi ri yolona Mahkama Agamana mennang. 67 Nakkeda mennang ri Alèna, "Paissengiki, Arung Pappassalama'-Koga?" Nappèbali Yèsus, "Muwi Upowadakko, dè'to mumateppe matu. 68 Narèkko makkutana-Ka ri iko, dè'to mumappèbali matu. 69 Iyakiya mappammulai makkekkuwangngè, Ana'na Tolinoè tudangngi matu ri seddè ataunna Allataala Iya Pommakuwasaè. " 70 Makkeda manenni mennang, "Rèkko makkuwaitu, Ana'na-Ko Allataala?" Nappèbali Yèsus, "Makkuwaitu adammu. " 71 Nakkeda mennang, "Dè'na naparelluki sabbi! Riyèngkalingani polè ri tèmun-Na!"
