1 Risèuwaè esso, Yèsus mappagguru sibawa mabbirittangngi Karèba Madècèng polè ri Allataala lao risining tauwè ri laleng Bolana Puwangngè. Napolèna kapala-kapala imangngè, guru-guru agamaè silaong sining pamimpinna Yahudiè 2 namakkeda lao ri Yèsus, "Coba powadakki aga nallalengi na-Mupogau'i iya manennaro? Niga mpèrèk-Ko iyaro ha'è?" 3 Nappèbali Yèsus, "Macinnaka makkutana. Coba powadak-Ka, 4 nasibawang ha' niga Yohanès maccemmè? Allataala iyarè'ga tolinoè?" 5 Nappammulana mennang barunding, "Rèkko makkedaki, 'Sibawa ha'na Allataala, ' makkedai matu, 'Rèkko makkuwaitu, magi nadè' mumateppe ri alèna?' 6 Iyakiya rèkko makkedaki, 'Sibawa ha'na tolinoè, ' nagenrukki matu batu sininna tauwè saba' mateppe'i mennang makkedaè Yohanès sèddiwi nabi. " 7 Jaji mappèbaliwi mennang, "Dè' taissengngi. " 8 Nakkeda Yèsus lao ri mennang, "Rèkko makkuwaitu, Iyya dè'to Umaèlo powadakko nasibawang ha' niga Upogau'i iya manennaè. " 9 Nacuritani Yèsus lao risining tauwèro, pakkalarapangengngèwè, "Engka sèddi tau iya tanengiyèngngi sèuwa dare'è anggoro. Iyaro dare'è nappassèwangngi lao ri siyagangngarè paddare, nainappa lao ri wanuwa laingngè namaitta monro kuwaro. 10 Narapinana wettunna maccèppu buwa anggoro, nakirinni pattumaninna iyaro punna dare'è lao risining pajjamana iyaro dare' anggoro'è untu' tarimai bagiyanna. Iyakiya iyaro sining pajjama dare' anggoro'è naunrui iyaro pattumaniè sibawa nasuroi lisu sibawa kosong limanna. 11 Naiyaro punna dare'è kirissi sèddi pattumani laingngè; iyakiya ribarasa' towi sibawa rituna-tunai risining pajjamana dare' anggoro'èro, nainappa nasuro lisu sibawa kosong limanna. 12 Nainappa iyaro punna dare'è kirissi pattumani mabbèkkatelluè. Iyakiya iyaro pattumaniè ribarasa' towi risining pajjamana dare' anggoro'èro sibawa riyabbèyang massu ri saliweng dare'èro. 13 Angkanna iyaro punna dare'è makkeda, 'Agana harusu' upogau'? Maèloka kiringngi ana' riyalèku iya uwamasèiyè. Pasti napakalebbii matu mennang!' 14 Iyakiya wettunna iyaro sining pajjama dare' anggoro'è naita iyaro ana'na punna dare'è, makkedani mennang sèddiè lao ri laingngè, 'Iyanaè ahli warisi'na. Laono mai taunoi, kuwammengngi talolongengngi manana. ' 15 Nanassarènrèngenni massu ri saliweng dare'èro nainappa nauno. " Nainappa makkutana Yèsus, "Nah, rèkko lisui iyaro punna dare'è, agana nagaukengngi matu iyaro sining pajjama dare'è? 16 Pasti polèi matu sibawa naunoi pajjama-pajjama dare'èro, nainappa iyaro dare'è nabbèrèyangngi lao risining pajjama-pajjama dare' laingngè. " Naèngkalingana iyaro, makkedani sining tauwè lao ri Yèsus, "Sitonget-tongenna dè'!" 17 Nakkitana Yèsus lao ri mennang, nainappa makkeda, "Rèkko makkuwaitu, aga bettuwanna aya'na Kitta'èwè? 'Batu iya dè'è napakèi tukang bangunangngè, mancajiwi batu iya poko'è. ' 18 Sininna tauwè iya sempè'è ri batuèro ancuru'i matu; sibawa nigi-nigi nageppa iyaro batuè nalèlui matu mancaji awu. " 19 Naissenni guru-guru agamaè sibawa kapala-kapala imangngè makkedaè iyaro pakkalarapangengngè napattujui Yèsus lao ri mennang. Rimakkuwannanaro macinnani mennang tikkengngi Yèsus iyaro wettuè, iyakiya mètaui lao ri tau maègaè. 20 Jaji sappani kasempatang iya makessingngè. Nanasogo'ni mennang tauwè untu' majjaiwi selaku tau lempu, nanasuroi sining tauwèro untu' palaiwi siyo-siyo Yèsus sibawa pakkutana-pakkutanana, kuwammengngi naullèi mabbèrèyangngi lao ri akuwasanna gubernur-è. 21 Nasining tau iya puraè risogo'ro makkedani lao ri Yèsus, "Pa' Guru, irissenni makkedaè sininna napowadaè sibawa nappagguruwangngè Bapa' tongengngi. Irisseng towi Bapa' mappaggurui sibawa terus terang passalenna napuwèloè Allataala lao ri tolinoè, saba' dè' nappilè bulu Bapa'. 22 Rimakkuwannanaro coba Bapa' powadakki, manuru' peraturanna agamata, weddikki'ga makkamaja sima lao ri Kaisar Roma iyarè'ga dè'?" 23 Iyakiya naissengngi Yèsus akkattana mennang. Rimakkuwannanaro makkedai, 24 "Coba paitak-Ka sèddi dowi pèra'. Gambara sibawa asenna niga iyaè?" Nappèbali mennang, "Kaisar. " 25 Nakkeda Yèsus lao ri mennang, "Rèkko makkuwaitu, wèrèngngi Kaisar, aga nappunnangi Kaisar sibawa lao ri Allataala, aga nappunnangi Allataala. " 26 Angkanna ri yolona tau maègaèro dè' naullèi mennang lolongeng muwi sèddi asalang ri Yèsus. Mammekko bawammi mennang sibawa bengnga lao ri pappèbalin-Naro. 27 Engka siyagangngarè tau polè ri golongang Sadukiè lao ri Yèsus. (Mennang iyanaritu golongang iya mappunnaiyè pallolongeng makkedaè tau matè dè' naoto paimeng. ) Makkutanai mennang ri Yèsus, 28 "Bapa' Guru, naokirekki Musa hukkungngèwè: Rèkko sèddiè worowanè matèi nadè' nappunnai ana', iyaro padaorowanèna harusu'i kawingiwi jandana kuwammengngi nawèrèngngi wija-wijanna tau iya matèènnaro. 29 Engka naengka pitu tau mappadaorowanè. Bottingngi iya macowaè, namatè temmappunnai ana'. 30 Nainappa jandana rikawingiwi ri maduwaè, iyakiya matè towi temmappunnai ana'. 31 Gau' padaè kajajiyang towi sibawa padaorowanèna matelluè narapi mapituè. 32 Angkanna matèto iyaro makkunraiè. 33 Ri esso ripatuwona matu paimeng tau matè, nigana punna bainè iyaro makkunraiè? Saba' iya pitu pura kawingiwi?" 34 Nappèbali Yèsus, "Sining tau iya tuwoè makkekkuwangngèwè bottingngi, 35 iyakiya sining tau matè iya sitinajaè ripaoto', sibawa tuwo ri wettu mangoloè, dè'na mennang nabotting. 36 Keadaanna mennang pada-padai malaèka'è, sibawa dè'na naullèi matè. Ana'-ana'na Allataala mennang ritu. Saba' purani mennang ripaoto' paimeng polè ri amatèngngè. 37 Alèna Musa pakatajangngi sibawa manessa makkedaè ripaoto'i paimeng tau matè. Ri laleng sure'na passalenna iyaro alekale' malluwa'è nateppui Puwangngè selaku 'Allataalana Abraham, Allataalana Ishak sibawa Allataala Yakub. ' 38 Naiyaro Allataalaè, tenniya Allataalana tau matè! Allataalanai sining tau tuwoè! Saba' untu' Allataala, sininna tauwè tuwoi. " 39 Engka siyagangngarè guru agama makkeda, "Makessing senna' pappèbalinna Bapa' Guru. " 40 Rimakkuwannanaro dè'na nabaranina makkutanangngi agi-agi lao ri Yèsus. 41 Nakkutana Yèsus lao ri mennang, "Pèkkugi wedding ripowada makkedaè Arung Pappassalama'è wijannai Daud? 42 Padahal alèna Daud makkeda ri laleng kitta Mazmur, 'Puwangngè makkeda ri Puwakku: Tudanno ri seddè atauk-Ku, 43 narapi Uwèbbu sining balim-Mu tunru' ri Iko. ' 44 Jaji rèkko Daud teppui iyaro Arung Pappassalama'è 'Puwang', pèkkugi wedding wijannai Daud?" 45 Wettunna sining tauwè naèngkalinga Yèsus mabbicara, makkedani Yèsus lao ri ana'-ana' gurun-Na, 46 "Atutuko lao ri guru-guru agamaè. Napoji joppa sibawa jumba iya malabbuè, sibawa napoji ripakalebbi ri pasaè. Napoji onrong malebbiè ri laleng bola assompangngè sibawa ri pèsta-pèstaè. 47 Nabellèi mennang sining jandaè sibawa narampasa' i bolana. Na untu' tongkoi jana mennanro, massempajangngi mennang sibawa malampè'! Matane' matu pahukkungenna mennang!"
