1 Nakkeda Yèsus lao ri ana'-ana' gurun-Na, "Engka sèddi tau sugi. Mappunnaiwi sèddi pakkatenning dowi iya marusu'èngngi asugirenna. Iyaro tau sugiè lolongengngi laporang makkedaè iyaro pakkatenning dowina nallabowangngi dowina. 2 Jaji naobbini iyaro pakkatenning dowiè, nakkeda, 'Aga iyaè uwèngkalingaè passalemmu? Makkekkuwangngè, wèrèkka laporanna passalenna jama-jamammu murusu'i asugirekku. Dè'na naweddikko mancaji pakkatenning dowiku. ' 3 Nappikkiri'na iyaro pakkatenning dowiè, 'Aga harusu' upogau' makkekkuwangngè? Maèloi Puwakku palèssoka. Nadè' uwullèi mabbèngkung, sibawa masirika marèllau-èllau. 4 Engka akkalekku; rèkko ripalèssoka, harusu'ka mappunnai maèga sellao iya maèloè pappèrumaka ri bolana!' 5 Jaji iyaro pakkatenning dowiè naobbini tungke' tau iya makkinrengngè ri puwanna. Nakkeda lao ri mammulangngè, 'Siyaga inremmu ri puwakku?' 6 Nappèbali iyaro tauwè, 'Sèratu bèmpa minnya' zaitun. ' Nakkeda iyaro pegawaiè lao ri tauwèro, 'Iyaè sure' inremmu. Tudanno namumapperi-peri mokii: limappulo. ' 7 Nainappa makkeda ri tau maduwaè, 'Na iko saudara, siyaga inremmu?' Nappèbali iyaro tauwè, 'Sisebbu karung gandong. ' Nakkeda iyaro pakkatenning dowiè, 'Iyaè sure' inremmu. Okini: aruwa ratuna. ' 8 Na iyaro ponggawana pegawè pakkatenning dowi dè'è namalempu napojini iyaro pegawèna nasaba pangkaukenna iya maccaèro; saba' sining tolinoèwè lebbi accai matoro'i urusanna mennang naiya sining tau iya tuwoè ri laleng tajangngè. " 9 Nabbicarasi Yèsus, adan-Na, "Engkalingai! Pakèi asugirenna linoèwè untu' lolongeng sellao, kuwammengngi riwettu dè'na gaga angke'na asugirenna linoè, ritarimako matu ri onrong appèrumang mannennungengngè. 10 Tau iya weddingngè riyatepperi ri laleng gau'-gau' iya baiccu'è, wedding towi riyatepperi ri laleng gau'-gau' iya battowaè. Iyakiya tau iya dè'è nawedding riyatepperi ri laleng gau'-gau' iya baiccu'è, dè'to nawedding riyatepperi ri laleng gau'-gau' battowaè. 11 Jaji rèkko passalenna asugirenna linoè dè'na naweddikko riyatepperi, niga maèlo paddettangiko asugireng batèngngè? 12 Sibawa rèkko passalenna barang nappunnangiyè tau laingngè, pabuttiwi dè' naweddikko riyatepperi, niga maèlo mpèrèkko aga iya mancajiyè appunnangemmu? 13 Dè' sèddi tau mullèi majjama untu' duwa ponggawa; saba' lebbi namasèiwi matu sèddiè naiya laingngè; iyarè'ga lebbi matinului matu lao ri ponggawa sèddiè naiya laingngè. Makkuwatoniro iko. Dè' mullèi majjama untu' Allataala sibawa untu' waramparangngètto. " 14 Naèngkalingani sining tau Farisiè iya napowadaè Yèsus. Nainappa mennang cawa-cawaiwi, saba' napoji mennang dowiè. 15 Iyakiya makkedai Yèsus lao ri mennang, "Ikona ritu tau iya tongengngè rita ri yolona tau laingngè, iyakiya naissengngi Allataala lise' atimmu. Saba' aga naseng matanrè rupa tauwè, naita mariyawai Allataala. 16 Hukkunna Musa sibawa pappagguruwanna nabi-nabiè, iya manenna tette'i ripajoppa narapi wettunna Yohanès Paccemmè. Mappammulai wettuèro Karèba Madècèng passalenna pèkkugi Allataala mapparènta selaku Arung riyabbirittangngi matteru. Nakkuraga tauwè passai alèna untu' mancaji anggotana umma'na Allataala. 17 Iyakiya lebbi gampangngi lennye' langiè sibawa linoè, naiya sèddiè hurupu' ri laleng Hukkunna Allataala riledda. 18 Niga massarang bainèna nainappa kawing sibawa makkunrai laingngè, malawengngi iyaro tauwè. Sibawa tau iya kawingiyèngngi makkunrai iya massarangngè, malaweng towi. " 19 "Engka sèddi tau sugi. Pakèyanna masuli, sibawa masennang atuwo-tuwonna esso-esso. 20 Ri yolona tange'na bolana ripalènne'i sèddi tau kasiyasi riyasengngè Lazarus. Watakkalèna pennoi sibawa lettang. 21 Macinnai lisekiwi babuwana sibawa barubbu-barubbu roti iya sempè'è polè ri mèjanna tau sugièro. Iyakiya mala asuè polèi lèpekiwi iyaro lettanna. 22 Namatèna iyaro tau kasiyasiè naritiwi ri malaèka'è ri onrong malebbiè ri surugaè ri seddèna Abraham. Namatè tona iyaro tau sugiè sibawa ritampung. 23 Namanrasa-rasa senna'na ri linona tau matè. Na wettunna makkita polè kuwaro lao ri yasè', naitani Abraham ri onrong iya mabèlaè sibawa Lazarus engka ri seddèna Abraham. 24 Nagorana iyaro tau sugiè, 'Bapa' Abraham! Amasèika. Suroi Lazarus remmèi jarinna ri laleng uwai nainappa lao bèsa'i lilaku. Manrasa-rasa senna'ka ri lalenna apièwè!' 25 Iyakiya mappèbaliwi Abraham, 'Engngerangngi ana'ku: sillampè umuru'mu purani mulolongeng maneng iya makessik-kessingngè, na Lazarus lolongengngi iya majaè. Makkekkuwangngè masennangngi kuwaè na iko manrasa-rasa. 26 Ri lainnaè ritu, ri pallawangemmu sibawa idi purani riyèbbu sèddi balorang battowa, kuwammengngi tau engkaè kuwaè dè' naullèi lao kuwatu sibawa tau engkaè kuwatu dè' naullèi lao kumaiyè. ' 27 Nakkeda iyaro tau sugiè, 'Rèkko makkuwaitu Pa', uwèllauwi sibawa masero tasuroi Bapa' Lazarus lao ri bolana ambo'ku. 28 Engka lima silessurekku kuwaro. Suroi Lazarus parèngngerangiwi mennang, kuwammengngi aja' mennang nasempè ri onrong paccallangngèwè. ' 29 Nappèbali Abraham, 'Naengka mennang nappunnai kitta'-kitta'na Musa sibawa sining nabiè! Leppessanni siya naturusi aga taroki ri laleng sining kitta'èro!' 30 Iyakiya mappèbaliwi iyaro tau sugiè, 'Dè' nagenne iyaro, Bapa' Abraham. Iyakiya rèkko engka tau matè tuwo paimeng sibawa lao ri mennang, toba'i matu mennang polè ri dosa-dosana. ' 31 Iyakiya makkedai Abraham, 'Rèkko mennang dè' nabati-batiwi parèntana Musa sibawa nabi-nabiè, tentuni mennang dè'to namateppe' matu, namuni engka tau matè tuwo paimeng. ' "
