1 Tèofilus iya makessing atiè, Maègani tau makkuraga mokii sibawa taratoro' passalenna kajajiyang-kajajiyang iya puraè kajajiyang ri tengnga-tengngata. 2 Naokii mennang situru iya ricuritaè lao ri idi polè risining tau iya alènaè pura mitai iyaro sining kajajiyangngè mappammulai pammulanna, nainappa nappallebbangeng karèbanna. 3 Puranana usalidiki madècèd-dècèng iya manennaro polè ri pammulanna, uwasengngi madècèng untu' moki sèddi laporang iya taratoro'è untu' Bapa'. 4 Upogau'i iyaro, kuwammengngi naissengngi Bapa' makkedaè aga iya puraè ripagguruwakki Bapa' mèmeng tongeng. 5 Wettunna Hèrodès mancaji arunna wanuwa Yudèa, engka sèddi imang asenna Zakharia. Muttama'i ri laleng golongang imang-ngimang Abia. Bainèna riyasengngi Elisabèt, wijanna imang towi. 6 Atuwonna mallaibinèro napèsennangiwi atinna Allataala. Iya duwa naturusiwi sininna parèntaè sibawa Hukkunna Puwangngè sibawa tonget-tongeng. 7 Dè' nappunnai mennang ana' saba' manangngi Elisabèt na macowani mennang iya duwa. 8 Risèuwaè esso, wettunna golongang Abia nakenna lèlèng, napajoppani Zakharia jamanna selaku imang ri yolona Allataala. 9 Biyasana riloterèiwi iyaro imang-ngimangngè, na Zakharia rijello untu' muttama' ri lalenna Bolana Puwangngè sibawa mattunu kamennyang. 10 Wettunna napogau' iyaro upacara mattunu kamennyangngè, tau maègaè massempajangngi ri saliweng. 11 Iyaro wettuè, nappaitangngi alèna malaèka'na Puwangngè ri Zakharia. Iyaro malaèka'è tettongngi ri seddè ataunna mèjang onrong mattunu kamennyangngè. 12 Wettunna naita Zakharia iyaro Malaèka'è, malippuni sibawa mètau. 13 Iyakiya makkedai iyaro Malaèka'è, "Aja' mumètau Zakharia! Naèngkalingani Allataala sempajammu. Bainèmu Elisabèt jajiyangngi matu sèddi ana' worowanè. Harusu'ko mpèrèngngi aseng Yohanès. 14 Masennang senna'ko matu sibawa maèga tau mariyo-riyo rèkko jajiwi matu iyaro ana'è! 15 Mancajiwi matu tau maraja manuru' pakkitanna Puwangngè, nadè' matu nainung anggoro iyarè'ga ènungeng maseri. Mappammulai jajinna rikuwasaiwi matu ri Rohna Allataala. 16 Maèga tau Israèl napimping matu lisu ri Allataala, Puwanna mennang. 17 Mancajiwi matu surona Puwangngè iya mawatangngè sibawa makuwasana pada-pada Elia. Napasidamèi matu ambo'è sibawa ana'è, enrengngè tau iya dè'è namatinulu napimpingngi matu lisu ri laleng pikkiranna iya tongengngè. Nanallalengiro napassadiyai matu sèuwa umma' iya sadiyaènna untu' Puwangngè. " 18 Nakkutana Zakharia lao ri Malaèka'èro, "Pèkkugi uwissengngi makkedaè kajajiyangngi iyaro gau'è? Macowana' na bainèku macowa toni. " 19 Nappèbali iyaro Malaèka'è, "Iyya'na Gabrièl! Utumaningiwi Allataala sibawa Alèna ritu suroka palettu'i karèba madècèngngè lao ri iko. 20 Aga upowada, kajajiyangngi matu ri wettunna. Iyakiya nasaba dè' mumateppe, dè' matu mullèi mabbicara; pèpèko matu narapi kajajiyang aga iya upowadangngèkko. " 21 Na iyaro wettuè, sining tauwè matterui natajeng Zakharia. Hèranni mennang magi namaitta makkuwaro ri laleng Bolana Puwangngè. 22 Na wettunna massu, dè'na naullèi mabbicara lao ri mennang. Matteru-teru bawang mabbèrè tanrang sibawa limanna, natette'i pèpè. Naissenni sining tauwè makkedaè purani mita sèuwa pakkitang ri laleng Bolana Puwangngè. 23 Leppe'nana jamanna ri Bolana Puwangngè, lisuni Zakharia ri bolana. 24 Dè' namaitta ri munrinna, mattampu'ni Elisabèt, bainèna, nanaurunni alèna ri bolaè lima uleng ittana. 25 Makkedani, "Angkanna natulukka Puwangngè sibawa naleddai atunangekku. " 26 Wettunna Elisabèt mattampu'ni enneng ulenna, nasuroni Allataala malaèka' Gabrièl lao ri Nazarèt, sèuwa kota ri daèra Galilèa. 27 Risuroi Gabrièl lao risèddiè ana'dara, riyasengngè Maria. Iyaro ana'daraè mattunangangngi sibawa sèddiè tau riyasengngè Yusuf, wijanna Arung Daud. 28 Iyaro malaèka'è laowi ri Maria sibawa makkeda, "Salama'ko, iko iya nabarakkakiyè Puwangngè iya dè'è padanna! Puwangngè sibawakko!" 29 Naèngkalingana adanna iyaro malaèka'è, tassèlenni Maria, angkanna makkutana ri laleng ati, aga akkattana iyaro bèrèsellengngè. 30 Nanakkeda iyaro Malaèka'è lao ri Maria, "Aja' mumètau Maria, saba' nasitujuiko atinna Allataala. 31 Mattampu'ko matu sibawa jajiyang sèddi ana', iya harusu'è muwaseng Yèsus. 32 Mancajiwi matu maraja nariyaseng Ana'na Allataala Iya Pommatanrè. Napancajiwi matu Puwang Allataala arung pada-pada Arung Daud, nènè-nènèna. 33 Nanapparènta matu selaku arung ri wijanna Yakub mannennungeng. Nadè' cappuna matu akkarungenna. " 34 Nakkeda Maria lao ri Malaèka'èro, "Iyakiya parawang mupa', pèkkugi iyaro gau'è wedding kajajiyang?" 35 Nappèbali iyaro Malaèka'è, "Polèi matu Rohna Allataala ri iko, sibawa akuwasanna matu Allataala salipuriko. Iyanaro saba'na ana' iya mujajiyangngè matu riyasengngi matu Mapaccing, Ana'na Allataala. 36 Engngerangngi: Elisabèt, sumpulolomuro, ennenni uleng mattampu'na, namuni macowani sibawa makkedanna tauwè makkedaè manangngi. 37 Saba' ri Allataala dè'gaga mustahèlè'. " 38 Nanakkeda Maria, "Iyya'è atannaka Allataala, leppessanni kajajiyang pada-pada mupowadaè. " Nalaona iyaro malaèka'è salaiwi Maria. 39 Dè' namaitta puranaro, laoni Maria risèuwaè kota ri Yudèa ri daèra buluna. 40 Laoni ri bolana Zakharia, na wettunna muttama', nabèrèsellengini Elisabèt. 41 Na wettunna naèngkalinga Elisabèt bèrèsellenna Maria, kèdoni iyaro anana' ri laleng parèmmananna Elisabèt. Narikuwasaina Elisabèt ri Rohna Allataala, 42 nanagora, "Ikona kaminang ribarakkaki ri yelle'na sininna makkunraiè! Memmuwarè' ribarakkakiwi iyaro anana' mujajiyangngè matu! 43 Niga iyya'è nanalaowika indo'na Puwangngè? 44 Uwèngkalingana bèrèsellemmu, anana' ri laleng parèmmanakku kèdoi nataro rennu. 45 Masenna'ko, nasaba mateppe'ko makkedaè aga napowada Puwangngè ri iko kajajiyangngi matu!" 46 Nakkeda Maria, "Atikku pojiwi Puwangngè, 47 sibawa mariyo-riyoi nyawaku nasaba Allataala Pappassalama'ku. 48 Naèngngerakka atan-Na iya matunaè! Mappammulai makkekkuwangngè sininna bangsaè makkedai mariyo-riyoka. 49 Nasaba Allataala Iya Pommakuwasaè pogau'i gau'-gau' battowaè ri alèku. Mapaccingngi asen-Na. 50 Abbijangeng lao ri abbijangeng mamasèi Puwangngè lao ri tau mètauè ri Alèna. 51 Nasibawang liman-Na iya mawatangngè napassara-sarangngi tau matempoè, sibawa nakacauwi rancanana mennang. 52 Napanonnoi sining arungngè polè ri akkarungen-Na sibawa napakatanrèi tau matunaè. 53 Napèsennangiwi tau malupuè sibawa sininna adècèngengngè tau sugiè napaddèsu'i sibawa kosong. 54 Natulungngi Israèliè, atan-Na, situru janci iya Naèbbuè sibawa nènè-nènèta. 55 Dè' Nallupaiwi jancinna Puwangngè, namasèiwi Abraham sibawa wijanna lettu mannennungeng. " 56 Kira-kira tellumpuleng ittana Maria monro ri Elisabèt, nainappa lisu ri bolana. 57 Narapini wettunna Elisabèt untu' mèmmana'. Najajiyanni sèddi ana' worowanè. 58 Sining balibolana sibawa sumpulolona naèngkalingani pèkkugi kessinna Puwangngè lao ri Elisabèt, nanaccowèna marennu silaong Elisabèt. 59 Wettunna iyaro ana'loloè makkèumuru aruwa essona, polèni mennang untu' sunna'i. Maèloi mennang masengngi iyaro ana'loloè Zakharia situru asenna ambo'na, 60 iyakiya makkedai indo'na, "Dè'! Harusu'i riwèrèng aseng Yohanès. " 61 Nakkeda mennang ri Elisabèt, "Nadè'gaga polè ri sumpulolomu riyaseng makkuwatu. " 62 Nakkutana mennang sibawa tanra-tanrang lao ri Zakharia, aseng aga maèlo nawèrèngngi ana'na. 63 Naèllauna Zakharia sèddi pèpeng batu nainappa maroki, "Asenna Yohanès. " Hèrang manenni mennang. 64 Iyatoro wettuè naullèni paimeng Zakharia mabbicara sibawa pojiwi Allataala. 65 Mètauni sining balibolana, nanallebbanna iyaro karèbaè ri sininna daèra buluna Yudèa. 66 Sininna tau mèngkalingaèngngi iyaro gau'è makkutanani ri laleng ati, "Mancaji agai matu iyaro ana'è?" Saba' risibawangngi ri Puwangngè. 67 Zakharia, ambo'na iyaro anana'è, rikuwasaini ri Rohna Allataala angkanna napalettu paseng polè ri Puwangngè. Nakkeda, 68 "Laono mai tapojiwi Puwangngè, Allataalana bangsa Israèliè! Polèni tulungngi umma'-Na sibawa paleppe'i mennang. 69 Nawèrèkki pappassalama' iya baraniè, wijanna Daud, atan-Na. 70 Riyolopa nariyolo naolai nabi-nabi Napilè, purani nabbèrèyang Puwangngè jancin-Na 71 untu' passalama'ki polè ri balitta sibawa polè ri akuwasanna sining tau iya benciyèkki. 72 Untu' mappaitangngi asèmpowatin-Na lao ri toriyolota, jancin-Na iya mapaccingngèro Narupaiwi matu. 73 - 74 Purani mattanro ri Abraham, ambo'ta, sibawa majjanci untu' passalama'ki polè ri balitta, kuwammengngi dè' tamètau tumaningiwi 75 tuli sompai Alèna sibawa pèsennangiwi atin-Na gangka tuwota. 76 Iko, èh ana'ku, riyasekko matu nabinna Allataala Iya Pommatanrè. Risuroko poddiyoloiwi Puwangngè untu' sarakengngi laleng Alèna. 77 Untu' mabbirittangngi lao ri umma'-Na sibawa ripassalama'i matu mennang, rèkko purani naddampengeng Allataala dosa-dosana mennang. 78 Masèmpo atiwi Puwatta namakacuwa; polèi untu' passalama'ki. Pada-pada mata essoè mompoè ri èlèè. 79 Makkuwani ritu mabbèrèyangngi tajan-Na lao ri sininna tauwè iya tuwoè ri laleng apettangengngè sibawa amètaurengngè. Napimpikki ri laleng iya mattujuè ri adamèngengngè. " 80 Napèdè' battowana iyaro ana'na Zakharia sibawa pèdè' mawatang rohna. Monroi ri padang kessi'è, narapi lettu wettunna nappaissengeng alèna lao ri bangsa Israèliè.
