1 Saudara-saudara iya puraè riyobbi sibawa iya riyamasèi senna'è ri Allataala Ambo'è, enrengngè rijagaiyè untu' Yèsus Kristus. Selaku atanna Yèsus Kristus, iyya -- Yudas -- saudarana Yakobus, 2 mammènasa: Tennapodo Allataala mabbèrè barakka, pammasè sibawa asalèwangeng lao ri iko sibawa tabbollompollong. 3 Saudara-saudara iya upojiyè! Tonget-tongekka makkatta moki sure' lao ri iko passalenna asalamakeng iya pada puraè tapèneddingi. Iyakiya makkekkuwangngè marasa parelluka untu' pangajariko sibawa iyaè sure'è kuwammengngi mumatteru mèwa untu' ateppereng iya wèkkasisengngènna nabbèrèyang Allataala untu' mannennungeng lao ri umma'-Na. 4 Saba' tenrimaingekiwi, engka tau mattentu iya maccelle'è muttama ri tengnga-tengngata. Mennang tau maja ampè iya putara'balè'èngngi biritta passalenna pammasèna Allataalata, untu' lolongeng kasempatang pallessui napessunna. Nanasampèyangngi mennang Yèsus Kristus, alè-alèna Panguwasa sibawa Puwatta. Riyolopa nariyolo pahukkungeng untu' mennang pura ribotoni ri laleng Kitta'è. 5 Iya manennaro pura muwissenni. Namuni macinnaka parèngngerangiko passalenna pèkkugi Puwangngè passalama'i umma' Israèliè polè ri Masèrè', iyakiya rimunri napaccappui sining tau iya dè'è namateppe' ri yelle'na mennang. 6 Engngerang towi sining malaèka' iya liwengngèngngi pakkasèsèng akuwasanna mennang, angkanna lao salaiwi onronna. Allataala balenggui iyaro sining malaèka'è sibawa rantè mannennungengngè, ri laleng onrong iya mapettangngè ri yawana linoè. Kuwaniro mennang ritahang matteru narapi ripateppa pahukkungengngè ri yasè'na mennang ri Esso iya maseroèro matti. 7 Engngerang towi kota Sodom sibawa Gomora enrengngè kota-kota ri seddèna, iya pabbanuwanaè pogau'i gau'-gau' iya padaè napogau' sining malaèka'èro. Napogau'i mennang gau'-gau' iya mappangaddiè sibawa maja ampè, angkanna risissai mennang sibawa pahukkungeng api mannennungengngè, untu' mancaji papparèngngerang lao ri sininna tauwè. 8 Makkuwatoro sining tauwèro mannawa-nawa angkanna mennang pogau' dosa lao ri watakkalèna muto mennang. Nangga' mariyawai akuwasanna Allataala enrengngè pakatunai sining mahlu' iya malebbiè ri surugaè. 9 Alèna Mikhaèl, iya kapalaiyèngngi sining malaèka'è, dè' naengka napogau'i iya makkuwaèro. Wettunna mappangèwangngi sibawa Ibillisi' ri laleng assisalanna passalenna niga lolongengngi matu ujuna Musa, dè' nabarani Mikhaèl madèlèkiwi Ibillisi' sibawa ada-ada paccella. Banna makkedai Mikhaèl, "Puwangngè gera'ko matu!" 10 Iyakiya nasibawang paccella-paccella, iyaro sining tauwè luruiwi sininna sèuwa-sèuwaè iya dè'è napahangngi mennang. Pada-padai mennang olokolo'è iya dè'è akkalenna, iya missengngèngngi gau'-gau'è sibawa pappèrasanna. Iyakiya mala nasaba gau'-gau'ènnaro nanassabariwi naancuru' mennang. 11 Cilakani mennang! Naccowèriwi mennang laleng iya naolaè Kaing. Kuwammengngi nalolongeng dowi, nassossorengngi alèna ri laleng lompo apusangngè, pada-pada Bilèam. Nariancuru' tona mennang nasaba maronta'i pada-pada Korah. 12 Wettummu pakangka pèsta manrè, kèdo-kèdona iyaro sining tauwè napèjariwi pappèneddingngè ri yelle'mu. Saba' manrèi mennang sibawa mabuwaja temmasiri, enrengngè banna alèna bawang naèngngerang. Pada-padai mennang ritu ellungngè iya nairiè anging, iyakiya dè' napateppa bosi. Pada-pada towi aju-kajungngè iya dè'è napowassèlè' buwa namuni wettu buwa-buwani; sining pong ngaju iya puraè ribèbbu ure'na sibawa matè sisenni. 13 Pada-pada mutowi bombang masekkangngè ri tasi'è iya paompoè busa, makkuwatoniro mennang pabbusai gau'-gau' iya mappakasiri-siriè. Pada-padai mennang sining wèttowingngè iya sollèè enrengngè iya puraè napassadiya Allataala onronna ri laleng pettangngè iya kaminang maseroè untu' mannennungeng. 14 Hènokh, assossoreng mapituè polè ri Adam, riyolo engka naengka nabotoi passalenna sining tauwèro. Makkedai Hènokh, "Itai, maèloi polè Puwangngè sibawa massebbu-sebbu malaèka'-Na iya mapaccingngè 15 untu' madèlèkiwi sininna tauwè. Puwangngè maèlo hukkungngi sining tau majaè nasaba sining pangkaukenna iya majaè. Sibawa maèloi hukkungngi tau madosaè enrengngè madorakaè nasaba sininna ada-ada paccella-cella iya napowadaè mennang. " 16 Iyaro sining tauwè tuli mannoko'-noko' bawang sibawa passalai tau laingngè. Tuwoi mennang situru sining cinnana iya madosaè. Mabboroi mennang passalenna alèna, enrengngè leppe'i tauwè kuwammengngi nalolongeng alabang. 17 Iyakiya Saudara-saudaraku iya upojiyè, èngngerangngi aga riyolo napowada rasul-rasulna Puwatta Yèsus Kristus. 18 Nappaddissengengngi mennang lebbi riyolo lao ri iko makkedaè nacawèkiwi paccappurenna linoè mompoi matu sining tau iya mèllèkèllè'èkko matu, iyanaritu sining tau iya tuwoè situru sining cinnana mennang iya madosaè. 19 Iyanaè mennang sining tau paompoè assisalang, dè' mennang narikuwasai ri Rohna Allataala, sangadinna ri sipa' linona. 20 Iyakiya iko, Saudara-saudaraku, mupiyarai matteru atuwommu situru teppe'mu lao ri Yèsus Kristus, iyaro teppe'mu mapaccing senna'. Namuwassempajatto sibawa akuwasanna Rohna Allataala, 21 sibawa tuli tuwono ri laleng accinaungenna pammasèna Allataala, ri wettu mutajenna pammasèna Puwatta Yèsus Kristus, iya mabbèrè matu lao ri iko atuwong tongengngè iya mannennungengngè. 22 Lao risining tau iya kalèwa'-lèwa'è atinna, sitinajako mappaitangngi paressè babuwaè. 23 Gettengngi tauwè massu polè ri laleng apiè untu' passalama'i mennang. Lao risining tau laingngè sitinajako mappaitangngi paressè babuwaè nasibawang perasaang mètau, iyakiya benciwi pakèyanna mennang iya puraè nacarèpai sibawa cinnana iya madosaè. 24 Allataala, iya mullèngngi jagaiwi kuwammengngi nadè' musempè, sibawa mullèngngi tiwiko lao ri yolo-Na iya malebbiè sibawa mariyo-riyo temmakkècella. 25 Alèna ritu alè-alèna Allataala, Pappassalama'ta naolai Yèsus Kristus Puwatta. Alèna ritu Allataala iya malebbiè, maraja, makuwasa sibawa riyakkitangi riyolopa nariyolo narapi makkekkuwangngè lettu mannennungeng! Aming.
