1 Iyakiya laowi Yèsus ri Bulu-bulu Zaitun. 2 Pappa bajanana maèlè senna'ni laosi ri Bolana Allataala, namaèga tau lao ri Alèna. Tudanni Yèsus, nappammula paggurui mennang. 3 Na iyaro wettuè, guru-guru agamaè sibawa sining tau Farisiè natiwini ri Yèsus sèddi makkunrai iya napolèiyè malaweng. Nasuroni mennang iyaro makkunraiè tettong ri tengnga-tengnga, 4 nainappa makkeda ri Yèsus, "Bapa' Guru, iyaè makkunraiè ripolèiwi malaweng. 5 Ri laleng Hukkunna Musa engka peraturang makkedaè, makkunrai makkuwaèwè harusu'i rigenrung batu gangka matè. Pèkkugi pallolongenna Bapa'?" 6 Makkutana makkuwairo mennang untu' palaiwi siyo-siyo Yèsus, kuwammengngi weddingngi mennang passalai. Iyakiya cuku' bawammi Yèsus, nanaroki sibawa liman-Na ri tanaè. 7 Wettunna mennang maddessa matteru, congani nakkeda lao ri mennang, "Tau iya dè'è nappunnai dosa ri yelle'mu, iyanaritu bunge' genrungngi batu iyaro makkunraiè. " 8 Purairo cuku'ni Yèsus paimeng marokisi ri tanaè. 9 Naèngkalingana Yèsus makkeda makkuwaro, laoni mennang tassèddi-sèddi nasalaiwi onrongngèro, mammulai ri iya macowaè. Angkanna Yèsus mani alè-alèna monro kuwaro sibawa iyaro makkunraiè tettong mupi ri onronna. 10 Nanacongana Yèsus sibawa nakkeda lao ri makkunraièro, "Kèga manenni mennang? Dè'ga gaga hukkukko?" 11 Nappèbali, "Dè'gaga Pa'. " Nakkeda Yèsus, "Madècènni, Iyya dè'to uhukkukko. Laono makkekkuwangngè, aja' mumadosa paimeng. "] 12 Nabbicarasi Yèsus lao ri tau maègaè, adan-Na, "Iyya'naè tajanna linoè. Tau iya maccowèriyèk-Ka dè' matu najoppa ri laleng pettangngè, iyakiya nappunnangiwi tajanna atuwongngè. " 13 Nakkeda sining tau Farisièro lao ri Yèsus, "Makkekkuwangngè mabbèrèko asabbiyang passalenna alèmu. Iyaro asabbiyam-Mu dè' natongeng. " 14 Nappèbali Yèsus, "Namuni mabbèrè-Ka asabbiyang passalenna alè-Ku, iyaro asabbiyak-Ku tongengngi; saba' Uwisseng kèga-Ka polè sibawa kèga-Ka maèlo lao. Dè' muwissengngi kèga-Ka polè sibawa kèga-Ka lao. 15 Iko muwadèlèkiwi tauwè sibawa cara tolino; na Iyya dè' Uwadèlèkiwi muwi sèddi tau. 16 Iyakiya èbara'na Uwadèlèkiwi tauwè, apettuk-Ku adèlè'i saba' tenniya-Ka alè-alè-Ku; Ambo' iya suroèk-Ka engkai sibawak-Ka. 17 Ri laleng Hukkunna Musa tarokii makkuwaè: Asabbiyang tongengngè iyanaritu asabbiyang iya polè ri duwa tau. 18 Iya mabbèrè asabbiyang passalenna alè-Ku engka duwa -- Iyya sibawa Ambo' iya suroèk-Ka. " 19 Nakkeda mennang, "Kègani Ambo'-Muro?" Nappèbali Yèsus, "Iko dè' muwissek-Ka sibawa Ambo'-Ku. Akkalarapanna muwissek-Ka, pasti muwisseng towi Ambo'-Ku. " 20 Iya manennaro napowadai Yèsus wettunna mappagguru ri Bolana Allataala ri seddèna petti-petti dowi pakkasuwiyangengngè. Iyakiya dè' muwi sèddi tau tikkengngi, saba' dè'pa narapii wettunna. 21 Makkedasi Yèsus lao ri mennang, "Maèlo-Ka lao, namusappa-Ka matu, iyakiya matèko matu ri laleng dosa-dosamu. Ri onrong Ulaoiyè, dè' mullèi lao. " 22 Nakkeda sining panguwasana Yahudiè, "Naullè kapang maèloi mpunoi Alèna, saba' makkedai, 'Ri onrong Ulaoiyè dè' mullèi lao. ' " 23 Nakkeda Yèsus lao ri mennang, "Iko polè ri yawako; iyakiya Iyya polè ri yasè'ka. Iko polè ri linoè; Iyya dè' upolè ri linoè. 24 Iyanaro saba'na Uwakkeda lao ri iko, makkedaè matèko matu ri laleng dosa-dosamu. Namèmeng matèko matu ri laleng dosa-dosamu, rèkko dè' mumateppe makkedaè 'Iyya'na iya riteppuè IYYA ENGKA. ' " 25 Nakkutana mennang, "Niga sitonget-tongenna iko?" Nappèbali Yèsus, "Untu' aga mabbicarasi sibawa iko! 26 Maèga mupa passaleng iya maèloè Upowada sibawa madèlèki. Iyakiya iya suroèk-Ka wedding riyatepperi. Na Iyya paissengiwi linoè aga Uwèngkalinga polè ri Alèna. " 27 Dè' napahangngi mennang makkedaè mabbicarai lao ri mennang passalenna Ambo'è. 28 Rimakkuwannanaro makkedai Yèsus lao ri mennang, "Matu rèkko purani mupakalebbi Ana'na Tolinoè, muwissenni matu makkedaè 'Iyya'naè iya riteppuè IYYA ENGKA', sibawa muwisseng toni matu makkedaè dè' sèddi iya Upogau'è polè ri alè-Ku. Iya bawang Upowada iya napagguruwangngèkka Ambo'è. 29 Naiya suroèk-Ka engkai sibawak-Ka. Dè' naengka naleppessakka alè-alèku, saba' tuli upogau'i iya pèsennangiyèngngi atinna. " 30 Purana napowada Yèsus iya manennaro, maègani tau mateppe' ri alèna. 31 Nainappa Yèsus mabbicara lao risining tau Yahudiè iya mateppe'ènna ri Alèna, "Rèkko tuwoko situru pappagguruwakku, tonget-tongennotu maccowè ri Iyya, 32 namuwissennitu Allataala iya tongengngè, narimakkuwannanaro ripamaradèkako matu. " 33 Nakkeda mennang, "Idi'è wijannaki Abraham. Dè'pa taengka tancaji atanna niga-niga! Aga akkatta-Mu namuwakkeda, 'Ripamaradèkako matu'?" 34 Nakkeda Yèsus lao ri mennang, "Tongeng senna' adak-Kuè. Tau pogau'è dosa iyanaritu atannai dosaè. 35 Na sèddiè ata dè' nappunnai onrong iya mattette'è ri laleng kaluwargaè, na ana'è mappunnaiwi onrong lettu mannennungeng ri laleng kaluwargaè. 36 Rimakkuwannanaro, rèkko Ana'è pamaradèkako, maradèka' tongennotu. 37 Mèmeng Uwissekko wija-wijanna Abraham. Iyakiya maèloko mpuno-Ka, nasaba dè' mumaèlo tarimai pappagguruwak-Ku. 38 Aga iya Uwitaè ri Ambo'-Ku, iyanaritu Upowada. Na iko mupogau'i aga iya nappagguruwangngè ambo'mu ri iko. " 39 Nappèbali mennang, "Ambo'ta iyanaritu Abraham. " Nakkeda Yèsus, "Ebara'na tonget-tongekko ana'na Abraham, pastini mupogau'i iya napogau'è Abraham. 40 Upalettukekko atongengeng iya Uwèngkalingaè polè ri Allataala, iyakiya iko maèloko mpuno-Ka. Abraham dè' napogau'i makkuwaèro! 41 Iko mupogau'i aga iya napogau'è ambo'mu. " Nappèbali mennang, "Tenniyaki ana'-ana' harang. Sèddimi bawang Ambo'ta, iyanaritu Allataala. " 42 Nakkeda Yèsus lao ri mennang, "Akkalarapanna iyaro Allataala Ambo'mu, muwamasèi-Ka matu, saba' polè-Ka ri Allataala. Dè' Upolè sibawa èlo ri alèku, iyakiya Alèna ritu iya suroèk-Ka. 43 Aga saba'na dè' mupahangngi aga iya Upowadaè? Saba' dè' mutahang mèngkalingai pappagguruwak-Ku. 44 Ibillisi' ritu ambo'mu. Pammulanna mupa na iyaro Ibillisi' pabbuno. Dè' naengka naccowè ri atongengengngè, saba' dè' atongengeng ri alèna. Rèkko mabbellèi, mèmeng sitinaja, saba' makkuwa mèmenro sipa'na. Pabbellèngngi sibawa assalenna sininna bellè. 45 Iyakiya Upowadai atongengengngè, narimakkuwannanaro dè' mumateppe ri Iyya. 46 Niga ri yelle'mu mullèi pabuttiwi makkedaè engka dosa-Ku? Rèkko Upowadai atongengengngè, magi nadè' mumateppe ri Iyya? 47 Tau iya assalennaè polèi ri Allataala, naèngkalingai ada-adanna Allataala. Iyakiya iko dè' mupolè ri Allataala, iyanaro saba'na dè' mumaèlo marèngkalinga. " 48 Iyaro sining tau Yahudiè nabalini Yèsus, "Dè'ga natongeng adatta makkedaè tau Samaria-Ko iya nauttamakiyè sètang?" 49 Nappèbali Yèsus, "Dè'nauttamai-Ka sètang. Upakalebbii Ambo'-Ku, iyakiya iko mupakatuna-Ka. 50 Dè' Usappa alebbireng untu' alè-Ku. Engka sèddi makkuragangek-Ka alebbireng, na Alèna ritu madèlèkiki. 51 Tongeng senna' adak-Kuè, tau iya turusiyèngngi adak-Ku, lettu mannennungeng dè' namatè matu. " 52 Nanakkeda sining tau Yahudièro lao ri Yèsus, "Riissenni makkekkuwangngè nauttamaki tongek-Ko sètang! Matèni Abraham, makkuwatoro sininna nabi-nabiè. Iyakiya makkeda-Ko, 'Tau iya turusiyèngngi adak-Ku, lettu mannennungeng dè' namatè matu. ' 53 Rèkko alèna Abraham matèni, sibawa matè toni sininna nabi-nabiè, nigako Iko? Masa Iko lebbi battowa naiya ambo'ta Abraham!" 54 Nappèbali Yèsus, "Akkalarapanna sappa-Ka alebbireng untu' alè-Ku, iyaro alebbirengngè dè'gaga bettuwanna. Iya pakalebbièk-Ka iyanaritu Ambo'-Ku iya muwangga'è Allataalamu, 55 padahal dè' muwissengngi. Iyakiya Iyya uwissengngi. Akkalarapanna makkeda-Ka makkedaè dè' Uwissengngi, tentu sèddika tau pabbellèng pada-pada iko. Uwissengngi sibawa mapatoiwi adan-Na. 56 Ambo'mu Abraham masennang senna' makkedaè naitai matu esso-Ku. Purani naita sibawa masennanna!" 57 Nanakkeda sining tau Yahudiè lao ri Yèsus, "Dè'pa gaga limappulo taung umuru'-Mu, na purani Muwita Abraham?" 58 Nappèbali Yèsus, "Makkeda tongek-Ka lao ri iko: riwettu dè'napa najaji Abraham, eng-Ka mèmenna. " 59 Napada malana batu sining tau Yahudièro untu' genrungngi Yèsus; iyakiya mallekke'i Yèsus, nappa lao nasalaiwi Bolana Allataala.
