1 Siyagangngarè wettu ri munrinna, laoni Yèsus ri liwenna Tappareng Galilèa, iya riyasengngètto Tappareng Tibèrias. 2 Lettu'nana kuwaro, maèga tau maccowèriwi saba' purani mennang naita sining anu makalallaingngè iya napogau'è ri laleng napajjappana sining tau malasaè. 3 Mènrè'ni Yèsus ri yasè'na buluè, natudang kuwaro sibawa ana'-ana' gurun-Na. 4 Iyaro wettuè macawè'ni Esso Maraja Paska Yahudiè. 5 Wettunna Yèsus makkita mattulili, Naitani tauwè mattinro-tinroseng lao ri Alèna. Nakkeda lao ri Filipus, "Kègaki wedding melli nanrè, kuwammengngi nasininna tauwèwè weddingngi manrè?" ( 6 Naisseng Yèsus aga Napogau' matu, iyakiya makkeda makkuwairo saba' maèloi mojiwi Filipus. ) 7 Nappèbali Filipus, "Roti elli duwa ratuè dowi pèra' dè' nagenne untu' sining tauwèwè, namuni tungke' tau cèddè bawang nalolongeng. " 8 Sèddi ana' gurunna Yèsus laingngè, iyanaritu Andrèas, silessurenna Simon Pètrus, makkedai, 9 "Kuwaè engka ana' worowanè mappunnai lima roti sibawa duwa balè. Iyakiya aga bettuwanna iyaro untu' tau makkuwaèwè ègana?" 10 Nakkeda Yèsus, "Suroi sining tauwèro tudang. " Ri onrongngèro engka maèga wella, jaji iyaro sining tauwè tudanni ri wellaè -- iya manenna engka kira-kira limassebbu tau worowanè. 11 Nainappa nala Yèsus iyaro rotiè, nanasukkuru ri Allataala. Purairo nabagè-bagèni iyaro sining rotiè lao ri tau maègaèro. Nainappa sukkuru'to nanabagè-bagèi iyaro sining balè, nanrèna mennang gangka messo. 12 Puranana manrè maneng gangka messo, makkedani Yèsus lao ri ana'-ana' gurun-Na, "Paddeppungengngi lebbinna iyaro nanrè; aja' naengka tabbè. " 13 Napaddeppungengngi mennang seppulo duwa baku penno lebbinna iyaro nanrè polè ri limaè roti iya nanrè tau maègaèro. 14 Wettunna naita tau maègaè anu makalallaing iya napogau'è Yèsus, makkedani mennang, "Iya tongennaè nabi riyammènasaiyè lao ri linoè!" 15 Naissengngi Yèsus mennang maèloi polè untu' passai mancaji arunna mennang. Rimakkuwannanaro laoni massala ri daèra mabbulu-buluè. 16 Mammulanana mawenni essoè, nonnoni ana'-ana' gurunna Yèsus ri tapparengngè. 17 Nainappa mènrè mennang ri lopiè mallèttoiwi tapparengngèro mattuju ri Kapernaum. Mapettanni essoè nadè'pi Yèsus polè ri mennang. 18 Nammulana mabbombang tapparengngè nasaba anginraja. 19 Sompe'nana kira-kira lima iyarè'ga enneng kilo, naitani Yèsus polè joppa ri tompo'na uwai. Mètau senna'ni mennang. 20 Iyakiya makkedai Yèsus lao ri mennang, "Aja' mumètau, Iyya'è!" 21 Namasennanna atinna mennang tarimai ri lalen-Na lopiè, na iyatoro wettuè nalettu' lopinna mennang ri onrong nakkattaiyè. 22 Pappa bajanana tau maègaè iya monroè mupa ri liweng tappareng, naèngngeranni makkedaè sèddimi bawang lopi engka kuwaro. Naisseng mennang makkedaè joppani ana'-ana' gurunna Yèsus sibawa iyaro lopiè, na Yèsus dè' naccowè. 23 Nasiyagangngarè lopi polè ri Tibèrias lettu sibawa mallabu ri seddèna onronna tau maègaèro manrè roti puranana Puwangngè mèllau sukkuru'. 24 Wettunna naita tau maègaèro muwi Yèsus iyarè'ga ana'-ana' gurun-Na dè'i kuwaro, mènrè toni mennang ri lopiè nalao ri Kapernaum sappai Yèsus. 25 Wettunna iyaro sining tauwè siruntu Yèsus ri liweng tappareng, makkutanani mennang ri Alèna, "Pa' Guru, siyaganna taengka Pa' kuwaè?" 26 Nappèbali Yèsus, "Tongeng, musappa-Ka tenniya mupahangngi akkattana iyaro sining anu makalallaingngè iya Upogau'è, iyakiya nasaba purano manrè gangka messo. 27 Aja' muwajjama untu' lolongeng nanrè iya weddingngè cappu sibawa makebbong. Ajjamako untu' lolongeng nanrè iya dè'è nawedding makebbong sibawa mabbèrèwè atuwong mannennungeng. Iyaro nanrè nabbèrèyangngi matu Ana'na Tolinoè lao ri iko, saba' purani rilanti ri Allataala Ambo'è. " 28 Namakkutanana mennang ri Yèsus, "Aga harusu' ripogau' untu' turusiwi èlona Allataala?" 29 Nappèbali Yèsus, "Iyanaè naèlori Allataala polè ri iko: Ateppe'ko lao ri iya nasuroè Allataala. " 30 Nakkeda mennang, "Rèkko makkuwaitu butti aga wedding nabbèrèyang Bapa' kuwammengngi nariita sibawa mateppe'ki lao ri Bapa'? Aga maèlo napogau' Bapa'? 31 Nènè-nènèta manrèi manna ri padang kessi'è. Pada-pada tarokiè ri laleng Kitta'è, 'Nawèrèngngi mennang manrè roti polè ri surugaè. ' " 32 Nakkeda Yèsus lao ri mennang, "Tongeng ateppe'no: Tenniya Musa, sangadinna Ambo'-Ku ritu iya mpèrèngngèkko roti iya tongengngè polè ri surugaè. 33 Saba' roti iya nabbèrèyangngè Allataala iyanaritu iya nonnoè polè ri surugaè sibawa mabbèrè atuwong lao ri rupa tauwè ri linoè. " 34 Nakkeda mennang, "Bapa', tuli wèrènni iyaro rotiè. " 35 Nakkeda Yèsus lao ri mennang, "Iyya'na roti iya mabbèrè atuwong. Tau iya laowè ri Iyya dè'na namalupu lettu mannennungeng. Sibawa tau iya mateppe'è ri Iyya dè'na namadekkana lettu mannennungeng. 36 Iyakiya pada-pada pura Upowadangngèkko, namuni pura muwita-Ka, dè'to mumateppe. 37 Sininna tauwè iya nabbèrèyangngè Ambo'è lao ri Iyya laowi matu ri Iyya. Dè' Umaèlo sampèyangngi nigi-nigi lao ri Iyya. 38 Saba' nonno-Ka polè ri surugaè, tenniya untu' pogau'i èlo ri alèku, sangadinna èlo-Na iya suroèk-Ka. 39 Na iyanaè èlo-Na iya suroèk-Ka: kuwammengngi nasininna tauwè iya nawèrèngngèk-Ka, dè' nateddèng muwi sèddi; iyakiya kuwammengngi Upaoto'i mennang ri Esso Kiyame'. 40 Mèmeng iyanaè èlona Ambo'-Ku: Kuwammengngi sininna iya mitaèngngi Ana'è sibawa mateppe' ri Alèna mappunnai atuwong mannennungeng, sibawa Upatuwoi paimeng ri Esso Kiyame'. " 41 Nammulana mannoko'-noko' sining tau Yahudiè lao ri Yèsus, saba' makkedai, "Iyya'na roti iya nonno'è polè ri surugaè. " 42 Nakkeda mennang, "Tenniyaga iyaè Yèsus, ana'na Yusuf? Riisseng ambo' indo'-Na! Pèkkugi weddingngi makkeda makkedaè nonnoi polè ri surugaè?" 43 Nakkeda Yèsus lao ri mennang, "Aja' muwannoko'-noko'. 44 Dè' sèddi tau wedding polè ri Iyya, rèkko Ambo' iya suroèk-Ka, dè' natiwii lao ri Iyya; na nigi-nigi polè, Upaoto'i matu ri Esso Kiyame'. 45 Ri laleng Kitta'na Nabi-nabiè tarokii makkuwaè, 'Sininna tauwè ripaggurui matu ri Allataala. ' Jaji sininna tau mèngkalingaèngngi Ambo'è sibawa magguru polè ri Alèna, laowi ri Iyya. 46 Iyakiya tenniya bettuwanna makkedaè engka tau purani naita Ambo'è. Banna iya polè ri Allataala, pura mitai Ambo'è. 47 Issengngi: Tau iya mateppe'è, mappunnaiwi atuwong mannennungeng. 48 Iyya'na roti iya mabbèrè atuwong. 49 Nènèmu manrè manna ri padang kessi'è sibawa matè towi mennang. 50 Iyakiya dè' nakkuwaro roti nonnoè polè ri surugaè; tau iya manrèèngngi iyaro rotiè dè' namatè. 51 Iyya'na roti nonnoè polè ri surugaè -- roti iya mabbèrè atuwong. Tau iya manrèèngngi iyaè rotiè tuwoi matu mannennungeng. Roti iya maèloè Uwabbèrèyang untu' atuwonna rupa tauwè ri linoè iyanaritu juku-Ku. " 52 Naèngkalinganaro, mappangèwanni sining tau Yahudiè pada iya muto. Nakkeda mennang, "Pèkkugi iyaè tauwè wedding nabbèrèyang juku-Na lao ri idi untu' riyanrè?" 53 Nakkeda Yèsus lao ri mennang, "Ateppe'no: Rèkko dè' muwanrèi jukuna Ana'na Tolinoè sibawa muwènungngi dara-Na, dè' tongeng muwappunnai matu atuwong ri laleng alèmu. 54 Tau iya manrèèngngi juku-Ku sibawa mènungngi dara-Ku mappunnai atuwong mannennungeng sibawa Upaoto'i matu ri Esso Kiyame'. 55 Nasaba tongengngi juku-Ku nanrè sibawa tongengngi dara-Ku ènungeng. 56 Tau iya manrèèngngi juku-Ku sibawa mènungngèngngi dara-Ku, tette'i massèddi sibawa Iyya, enrengngè Iyya sibawa alèna. 57 Ambo' iya tuwoèro, nasuro-Ka na Iyya tuwo tokka polè ri Ambo'è. Nakkuwatoro tau iya manrèèngngi juku-Ku, tuwoi polè ri Iyya. 58 Iyya'naè roti iya nonnoè polè ri surugaè: tenniya roti nanrè nènè-nènèmu. Nasaba purana nanrè iyaro rotiè, matè muwi mennang. Iyakiya tau manrèèngngi iyaè rotiè tuwoi matu mannennungeng. " 59 Iya manennaro napowadai Yèsus wettunna mappaggurui ri bola assompangngè ri Kapernaum. 60 Purana naèngkalinga iyaro ada-adanna Yèsus, maèga ri yelle'na ana'-ana' gurun-Na makkeda, "Matane senna' iyaè pappagguruwangngè. Niga mullèi tarimai?" 61 Naissengngi Yèsus makkedaè mannoko'-noko'i ana'-ana' gurun-Na passalenna gau'èro. Nakkedana, "Tassinggukkoga nasaba ada-adaèro? 62 Pèkkugi jajinna matu rèkko muwitai Ana'na Tolinoè mènrè paimeng ri onronna mammulangngè? 63 Iya patuwoèngngi rupatauwè iyanaritu Rohna Allataala. Awatangenna rupa tauwè dè'gaga gunana. Ada-ada iya Upalettukengngèkkoè iyanaritu ada-adanna Rohna Allataala iyanaritu ada-ada iya mabbèrè atuwong. 64 Iyakiya engka mupa ri yelle'mu dè' namateppe'. " (Naissengngi Yèsus ri pammulanna mupa nigi-nigi iya dè'è namaèlo mateppe', sibawa niga bali'bellariwi matu. ) 65 Nakkedasi Yèsus, "Iyanaro saba'na Upowadakko makkedaè dè' sèddi tau mullèi polè ri Iyya, rèkko tenniya Ambo'è palaloi. " 66 Mappammulai wettuèro maègani ana' gurun-Na salaiwi, sibawa dè'na namaèlo maccowèrini. 67 Nanakkutana Yèsus lao ri iya seppulo duwa ana' gurun-Na, "Maèlo tokkoga salai-Ka?" 68 Nakkeda Simon Pètrus ri Yèsus, "Puwang, niga maèlo rilaowi? Ada-adatta Puwang mabbèrè atuwong mannennungeng. 69 Mateppe'ni sibawa riyesserinna makkedaè Puwangngè ritu suro mapaccing polè ri Allataala. " 70 Nappèbali Yèsus, "Tenniyaga Iyya pilèko iya seppulo duwa tauwèwè? Namuni sèddi ri yelle'mu iyanaritu Sètang!" 71 Iya nasengngè Yèsus iyanaritu Yudas ana'na Simon Iskariot. Saba' muni Yudas sèddiwi polè ri iya seppulo duwa ana' gurunna Yèsus, nabali'bellariwi matu Yèsus.
