1 Naèngkalingani sining tau Farisiè makkedaè Yèsus lolongengngi sibawa cemmèi lebbi maèga ana' guru naiya Yohanès. ( 2 Sitongenna Yèsus dè' naccemmè, sangadinna ana'-ana' gurun-Na bawang. ) 3 Wettunna naisseng Yèsus makkedaè naèngkalingani sining tau Farisiè passalenna gau'èro, lisuni ri Galilèa polè ri Yudèa. 4 Ri laleng allalengennaro harusu'i nalaloi Samaria. 5 Nalettu'na Yèsus risèuwaè kota ri Samaria iya riyasengngè Sikhar, dè' namabèla polè ri tana iya nabbèrèyangngè Yakub riyolo lao ri Yusuf, ana'na. 6 Kuwaniro monro bujunna Yakub. Matekko senna'i Yèsus nasaba allalengengngèro, rimakkuwannanaro tudanni ri wirinna bujungngè. Iyaro wettuè kira-kira tettè seppulo duwa tangassoè. 7 - 8 Na ana'-ana' gurunna Yèsus laoni ri kotaè untu' melli nanrè. Napolèna sèddi makkunrai Samaria mabbanrong uwai. Nakkeda Yèsus ri makkunraièro, "Bu', tawèrèk-Ka uwai rinutta!" 9 Nappèbali iyaro makkunrai Samariaè, "Puwang tau Yahudi, na iyya tau Samaria; magi Puwang taèllau uwai rinung ri iyya?" (Saba' dè' gaga assisumpungenna sining tau Yahudiè sibawa tau Samariaè. ) 10 Nappèbali Yèsus, "Akkalarapanna muwissengngi pabbèrèna Allataala sibawa niga iya mèllauwè uwai rinung ri iko, tentu mèllau tokko uwai rinung ri Alèna, na-Nawèrèkko matu uwai tuwo. " 11 Nakkeda iyaro makkunraiè, "Dè' tappunnai banrong Puwang, na iyaè bujungngè malamung senna'. Polè kègaki Puwang lolongeng uwai tuwo? 12 Yakub, ambo'na toriyolota, mpèrèkki iyaè bujungngè. Alèna malato uwai rinung polè kuwaè; makkuwatoro ana'-ana'na enrengngè olokolo'na. Tasengngiga Puwang lebbi battowaki na iya Yakub?" 13 Nakkeda Yèsus, "Tau iya mènungngèngngi iyaè uwaièwè madekka mupi paimeng. 14 Iyakiya tau iya mènungngèngngi uwai maèloè Uwabbèrèyang, dè'na namadekkana lettu mannennungeng. Saba' uwai maèloè Uwabbèrèyang mancajiwi matu mata uwai ri laleng alèna iya jompiè massu sibawa mabbèrè atuwong mannennungeng. " 15 Nakkeda iyaro makkunraiè, "Puwang tawèrènna iyaro uwaièro, kuwammengngi dè'na umadekkana; sibawa dè'na naparelluka lisuna kuwaè untu' mala uwai. " 16 Nakkeda Yèsus, "Laono muwobbii lakkaimmu, nainappa lisu kuwaè. " 17 Nappèbali iyaro makkunraiè, "Dè' uwappunnai lakkai. " Nakkeda Yèsus, "Tongeng adammu. 18 Saba' wèkkalimano kawing, na worowanè iya muèwaè siyonrong makkekkuwangngè tenniya lakkaimmu. " 19 Nakkeda iyaro makkunraiè, "Uwissenni makkekkuwangngè, Puwang sèddiwi nabi. 20 Nènè-nènèta nasompai Allataala ri buluèwè, iyakiya bangsana Puwang makkedai banna ri Yèrusalèm bawang onronna tauwè sompai Allataala. " 21 Nakkeda Yèsus lao ri makkunraièro, "Ateppe'no, sèuwa wettu matu nasompai tauwè Ambo'è, tenniyana ri buluèwè, sibawa tenniyato ri Yèrusalèm. 22 Iko tau Samariako sompai iya dè'è muwissengngi, na idi tau Yahudiè sompaki iya riissengngè, saba' asalamakengngè polèi ri tau Yahudiè. 23 Iyakiya polèi matu wettunna, mala polèni, makkedaè nasibawang akuwasanna Rohna Allataala, nasompai matu tauwè Ambo'è selaku Allataala tongengngè pada-pada naèloriyè Ambo'è. 24 Saba' iyaro Allataala Roh-i, na banna iya nasibawangngè akuwasanna Rohna Allataala naullèi tauwè sompai Ambo'è selaku Allataala iya tongengngè. " 25 Nakkeda iyaro makkunraiè lao ri Yèsus, "Uwisseng Arung Pappassalama'è (iya riyasengngè Kristus) maèloi polè. Rèkko polèi, nappaddissengengngi matu sininna sèuwa-sèuwaè lao ri idi. " 26 Nakkeda Yèsus, "Iyya'naè. Iyya, iya makkekkuwangngè mabbicara sibawa iko. " 27 Iyaro wettuè lisuni ana'-ana' gurunna Yèsus. Hèranni mennang mitai Yèsus mabbicara sibawa sèddi makkunrai. Iyakiya dè'gaga sèddi polè ri mennang makkutana ri makkunraièro, "Aga parellutta Bu?" Iyarè'ga makkutana lao ri Yèsus, "Magi Bapa' nabbicara sibawa makkunraièro?" 28 Na iyaro makkunraiè nasalaini busunna kuwaro nalari lao ri kotaè nanakkeda lao risining tauwè kuwaro, 29 "Laono mai muwitai tau iya powadangngèkka sininna puraè upogau'. Naullèga iyanaro Arung Pappassalama'è?" 30 Nasalaini iyaro sining tauwè kotaè nalao ri Yèsus. 31 Iyaro wettuè ana'-ana' gurunna Yèsus naèrani Yèsus manrè. Nakkeda mennang, "Bapa' Guru, anrèni. " 32 Iyakiya mappèbaliwi Yèsus, "Engka nanrè ri alè-Ku, iya dè'è muwissengngi. " 33 Nammulana ana'-ana' gurunna Yèsus sisullè-sullè makkutana, "Engkaga tau tiwirengngi nanrè?" 34 Nakkeda Yèsus, "Nanrè-Ku iyanaritu maccowèriwi èlo-Na iya suroèk-Ka, sibawa pappurai jamang iya nawèrèngngèk-Ka. 35 Makkedako, 'Patampuleppi na wettu èngngalang. ' Iyakiya makkeda-Ka lao ri iko: Itani sining dare iya maridiènna, sadiyani untu' riyèngngala! 36 Tau iya mèngngalaè mammulani nanatarima sarona sibawa paddeppungeng wassèlè' untu' atuwong mannennungengngè. Na tau iya mampoè sibawa tau iya mèngngalaè weddingngi massennas-sennang massibawa. 37 Iyaè warèkkadaè tongeng towi, 'Iya sèddiè mattaneng laingngè mèngngalai. ' 38 Usuroko lao mèngngala ri dare iya dè'è mujamai, tau laingngè pura majjama kuwaro, na iko tarimako saro polè ri jama-jamanna mennang. " 39 Maèga tau Samaria pabbanuwana kotaèro mateppe' lao ri Yèsus, nasaba makkedai iyaro makkunraiè, "Napowadai lao ri iyya sininna puraè upogau'. " 40 Na wettunna iyaro sining tau Samariaè siruntu Yèsus, naèllauni mennang sibawa masero kuwammengngi naonro silaong mennang. Jaji monroni Yèsus kuwaro duwangngesso ittana. 41 Napèdè' maègana tau mateppe' ri Yèsus nasaba aga pura nappagguruwang lao ri mennang. 42 Nakkeda mennang lao ri makkunraièro, "Mateppe'ni makkekkuwangngè, tenniya nasaba aga pura mupowadaè lao ri idi, iyakiya nasaba alètana pura mèngkalingai, sibawa missengngi makkedaè mèmengngi Pappassalama'nai linoè. " 43 Labe'nana duwangngesso monro ri Sikar, laoni Yèsus ri Galilèa. 44 Yèsus muto pura makkeda, "Sèddiè nabi dè' naripakalebbi ri wanuwanna. " 45 Iyakiya wettun-Na lettu ri Galilèa, sining tauwè kuwaro duppaiwi sibawa masennang atinna, saba' engkai mennang ri Yèrusalèm wettunna Esso Maraja Paskaè, napurani naita maneng iya napogau'è Yèsus. 46 Nainappa Yèsus lisu ri Kana ri Galilèa, iya naonroiyè pinrai uwai mancaji anggoro. Ri kotaèro engka sèddi pegawè saoraja iya malasaè ana'na ri Kapernaum. 47 Wettunna naèngkalinga makkedaè engkani Yèsus ri Galilèa polè ri Yudèa, laoni ri Yèsus nanaèllauwi Yèsus lao ri Kapernaum untu' pajjappai ana'na iya mawè'ènna matè. 48 Nakkeda Yèsus lao ri pegawè saorajaèro, "Rèkko dè' muwitai anu makalallaingngè, dè' mumateppe. " 49 Nappèbali pegawè saorajaèro, "Puwang, apperi-perini lao riwettu dè'napa namatè ana'ku. " 50 Nakkeda Yèsus lao ri pegawèro, "Laono, majjappani ana'mu. " Mateppe'ni iyaro tauwè ri ada-adanna Yèsus, nainappa lao. 51 Ri tengnga laleng, polèni sining pattumaninna nanabbirittangngi, "Majjappani ana'ta Puwang. " 52 Nakkutana lao ri mennang, tettè siyaga iyaro ana'è najjappa. Nappèbali mennang, "Kira-kira tettè sèddi iwenni' tangassoè nasoro semmenna. " 53 Naèngngeranni ambo'na iyaro ana'è makkedaè iyaro wettuè nakkeda Yèsus lao ri alèna, "Majjappani ana'mu. " Namateppe'na ri Yèsus sibawa sininna kaluwargana. 54 Iyanaro anu makalallaing maduwaè iya napogau'è Yèsus ri Galilèa polènana ri Yudèa.
