1 Engka sèddi pamimping agama polè ri yelle'na tau Farisiè iya riyasengngè Nikodèmus. 2 Risèuwaè wenni laowi ri Yèsus sibawa makkeda, "Bapa' Guru, irissengngi Bapa' risuroi ri Allataala. Saba' dè' muwi sèddi tau mullèi mèbbu anu makalallaing pada-pada naèbbuè Bapa', rèkko dè' narisibawang ri Allataala. " 3 Nappèbali Yèsus, "Ateppe'no, dè' sèddi tau mullèi mancaji anggotana umma'na Allataala, rèkko dè' narijajiyang paimeng. " 4 Nakkeda Nikodèmus lao ri Yèsus, "Masa' tau battowaè wedding jaji paimeng? Weddigga muttama' paimeng ri laleng parèmmananna indo'na nappa rijajiyang paimeng?" 5 Nappèbali Yèsus, "Tongeng senna' adak-Ku: rèkko tauwè dè narijajiyang polè ri uwai sibawa polè ri Rohna Allataala, iyaro tauwè dè' nawedding mancaji anggotana umma'na Allataala. 6 Secara mallahèreng rijajiyangngi rupa tauwè ri tomatowaè, iyakiya secara batèng rijajiyangngi ri Rohna Allataala. 7 Aja' muhèrang rèkko makkeda-Ka: iko maneng harusu'ko rijajiyang paimeng. 8 Mangirii angingngè kègi naèlori; riyèngkalingai oninna, iyakiya dè' narisseng polè kègai apolènna sibawa kègai laona. Makkuwatoro tau iya rijajiyangngè ri Rohna Allataala. " 9 Nakkutana Nikodèmus, "Pèkkugi iyaro wedding kajajiyang?" 10 Nappèbali Yèsus, "Na guruko ri Israèl; masa' dè' muwissengngi? 11 Ateppe'no: mabbicaraki banna passalenna aga iya riissengngè, namabbèrèki asabbiyang banna passalenna aga iya puraè riita; iyakiya dè' mumaèlo tarimai asabbiyattaro. 12 Dè' mumateppe rèkko ucuritakko passalenna gau'-gau' polè ri linoèwè; pèkkugi weddikko mateppe', rèkko ucuritakko gau'-gau' passalenna surugaè? 13 Dè' sèddi tau pura mènrè ri surugaè, ri lainnaè iya nonnoè ri linoè, iyanaritu Ana'na Tolinoè. 14 Pada-pada Musa paènrè ula tembaga ri sibatangngè aju ri padang kessi'è, makkuwatoro Ana'na Tolinoè harusu' ripaènrè, 15 kuwammengngi nasininna tau iya matepperiyèngngi lolongengngi atuwong tongengngè sibawa mannennungengngè. " 16 Nasaba makkumani Allataala namaseinna rupa tauwè ri linoèwè, angkanna Nabbèrèyangngi Ana' Tungke'na, kuwammengngi na tungke' tau iya matepperiyèngngi dè' nabinasa sangadinna lolongengngi atuwong tongengngè sibawa mannennungengngè. 17 Saba' nakiringngi Allataala Ana'-Na tenniya untu' madèlèkiwi linoèwè, iyakiya untu' passalama'i. 18 Tau iya mateppe'è ri Alèna dè' narihukkung. Iyakiya tau iya dè'è namateppe' ri Ana'na Allataala purani rihukkung ri Allataala, nasaba dè' namateppe' ri Ana'na Allataala iya sèddi-sèddiè. 19 Rituntu'i nallalengiwi gau'èwè: Iyaro tajangngè engkani polè ri linoè, iyakiya rupa tauwè lebbi napojiwi pettangngè naiya tajangngè, saba' majai pangkaukenna mennang. 20 Tungke' tau iya pogau'è ja, nabenciwi tajangngè; dè' namaèlo lao ri tajangngè, kuwammengngi pangkaukenna majaè dè' napaita. 21 Iyakiya tau iya pogau'èngngi èlona Allataala, laowi ri tajangngè kuwammengngi namanessa makkedaè aga napogau' iyanaritu siturui èlona Allataala. 22 Purairo laoni Yèsus sibawa ana'-ana' gurun-Na ri Yudèa. Monroni kuwaro siyagangngarè esso ittana silaong mennang sibawa maccemmè. 23 - 24 Iyaro wettuè dè'pa nauttama tarungkuè Yohanès. Maccemmèi ri Ainon, dè' namabèla polè ri Salim, saba' maèga uwai kuwaro. Polèni sining tauwè ri alèna, nanacemmèi mennang. 25 Siyagangngarè ana' gurunna Yohanès mammulani mappangèwang sibawa tau Yahudiè passalenna peraturang apaccingengngè. 26 Laoni mennang ri Yohanès, sibawa makkeda, "Pa' Guru, naèngngerang mupaga Bapa' tau sibawangngèngngi Bapa' ri liwenna Salo Yordanro, iya najellorengngèkki Bapa' riyolo? Maccemmè towi makkekkuwangngè, nasininna tauwè laowi ri Alèna!" 27 Nappèbali Yohanès, "Dè' naullèi mappunnai agi-agi tolinoè rèkko dè' nariwèrèng ri Allataala. 28 Alèmu pura mèngkalingaka makkeda, 'Tenniyaka Arung Pappassalama'è. Risuroka poddiyoloiwi Alèna. ' 29 Botting makkunraiè iyanaritu appunnangennai bottimpuranè. Sellaona bottimpuranèro banna tettongngi ranrengngi sibawa mèngkalingai, sibawa masennangngi rèkko naèngkalingai saddanna bottimpuranè. Makkuwatoniro iyya. Makkekkuwangngè masennang senna'ka. 30 Alèna ritu harusu' pèdè' penting, na iyya pèdè' makurang penting. " 31 Iya polè ri yasè'è napakacauri manengngi. Iya polè ri linoè rigolongkangngi tolino, sibawa mabbicara passalenna gau'-gau' linoè. Iya polè ri yasè napakacauri manengngi. 32 Mabbicarai passalenna iya puraè naita sibawa naèngkalinga, iyakiya dè' sèddi tau mateppe' ri pappèsabbiyan-Na. 33 Tau iya mateppe'è ri pappèsabbiyan-Naro, nangakuiwi makkedaè tongengngi Allataala. 34 Saba' tau iya nasuroè Allataala untu' palettu'i ada-adanna Allataala, nasaba pura riwèrènni Rohna Allataala sukku lao ri Alèna. 35 Ambo'è namasèiwi Ana'-Na, sibawa pura nabbèrèyang manengngi akuwasangngè ri Alèna. 36 Tau iya mateppe'è ri Ana'èro lolongengngi matu atuwong mannennungeng. Iyakiya tau iya dè'è namatinulu ri Ana'èro dè' nalolongeng atuwong. Rihukkungngi ri Allataala lettu mannennungeng.
