1 Ri esso Aha'è èllèè, wettu makalemmenna mupa, laoni Maria Magdalèna ri tampungngè. Naitani batu pattongkona lèssè polè ri kalebbonna iyaro tampungngè. 2 Nalarina lao sappai Simon Pètrus sibawa ana' guru iya namasèiyè Yèsus, nakkeda lao ri mennang, "Riyalani Puwangngè polè ri tampungngè, nadè' uwissengngi kègai ritaro. " 3 Nalaona Pètrus sibawa ana' guru laingngè ri kuburu'è. 4 Lari duwani, iyakiya iyaro ana' guru laingngè lebbi masitta'i na Pètrus, nalettu' lebbi riyolo ri kuburu'è. 5 Cèllènni muttama' ri laleng kuburu'è nanaitai kaing pawwaluè lènne kuwaro, iyakiya dè' nauttama. 6 Maccinrolani Pètrus polè ri monri namatteru muttama' ri kuburu'èro. Naitani kaing pawwaluè lènne kuwaro, 7 iyakiya kaing iya risiyorengngèngngi ulunna Yèsus dè'i gaga ri seddèna sangadinna mallaingngi tallulung. 8 Nainappa ana' guru iya lebbi riyoloè lettu ri kuburu'èro, muttama' toni. Naitani sibawa mateppe'. ( 9 Narapi wettuèro dè'pa napahangngi aga iya tarokiè ri laleng Kitta'è makkedaè harusu'i moto polè ri amatèngngè. ) 10 Purairo lisuni iyaro ana'-ana' gurunna Yèsus. 11 Tettonni Maria Magdalèna ri yolona kuburu'èro teri. Teriwi nacèllètto ri laleng kuburu'èro, 12 nanaitana duwa malaèka' mappakè maputè. Tudangngi mennang ri onronna ujuna Yèsus, sèddi ri yulu na laingngè ri ajèna. 13 Nakkutana iyaro sining malaèka'è, "Indo', magi muteri?" Nappèbali Maria, "Riyalani Puwakku, nadè' uwissengngi kègai ritaro. " 14 Purana makkeda makkuwaro, gilinni limonri nanaitai Yèsus tettong kuwaro. Iyakiya dè' naissengngi makkedaè Yèsus iyaro. 15 Nakkutana Yèsus lao ri alèna, "Indo', magi muteri? Niga tasappa indo'?" Nasengngi Maria iyaro paddare, jaji makkedani, "Pa', rèkko Bapa' palèttè'i polè kuwaè, tulukka tapowadakka kègai tataro Pa', kuwammengngi weddingngi uwala. " 16 Nakkeda Yèsus lao ri Maria, "Maria!" Gilinni Maria lao ri Yèsus, nakkeda ri laleng basa Ibrani, "Rabbuni!" (Bettuwanna "Guru". ) 17 Nakkeda Yèsus ri Maria, "Aja' mukarawa-Ka, saba' dè'pa Uwènrè ri Ambo'è. Iyakiya laoko risining silessurek-Ku sibawa powadangngi mennang makkedaè makkekkuwangngè mènrè'-Ka ri Ambo'-Ku sibawa Ambo'mu, Allataala-Ku sibawa Allataalamu. " 18 Nalaona Maria powadangngi ana'-ana' gurunna Yèsus makkedaè purani naita Puwangngè, sibawa Puwangngè pura powada manengngi iyaro lao ri alèna. 19 Iyatoro esso Aha'è, ri wettu mawenninnana, maddeppungenni ana'-ana' gurunna Yèsus risèuwaè bola sibawa taggoncing sining tange'na, saba' mètaui risining panguwasana tau Yahudiè. Tappa engka muni Yèsus polè natettong ri tengnga-tengngana mennang sibawa makkeda, "Salama' salèwangekko. " 20 Purana makkeda makkuwaro, nappaitanni lao ri mennang liman-Na sibawa benrèn-Na. Wettunna naita Puwangngè, marennu senna'ni mennang. 21 Nakkedapa Yèsus siseppa lao ri mennang, "Salama' salèwangekko. Pada-pada Ambo'è suro-Ka, makkuwatoniro Iyya suroko. " 22 Nainappa nasseppungeng nappase'-Na lao ri mennang sibawa makkeda, "Tarimani Rohna Allataala. 23 Rèkko muwaddampengengngi dosana sèddiè tau, naddampengeng towi Allataala. Rèkko dè' muwaddampengengngi dosana sèddiè tau, dè'to naddampengengngi Allataala. " 24 Tomas, (iya riteppuè "Dènru"), sèddiwi polè riseppuloè duwa ana' gurunna Yèsus, dè'i gaga silaong laingngè wettunna Yèsus polè. 25 Nakkeda ana'-ana' gurun-Na laingngè lao ri Tomas, "Purani idi mitai Puwangngè!" Iyakiya mappèbaliwi Tomas, "Rèkko dè'pa uwitai batè pakuè ri liman-Na, dè'pa utaroi jarikku ri batè pakuèro sibawa dè'pa utaroi limakku ri benrèn-Na, dè' sises-siseng umaèlo mateppe'. " 26 Siminggu ri munrinna engkasi ana'-ana' gurunna Yèsus ri onrongngèro, na engka towi Tomas. Taggoncing maneng tange'è. Iyakiya polèi Yèsus natettong ri tengnga-tengngana, nanakkeda, "Salama' salèwangekko. " 27 Nainappa makkeda Yèsus lao ri Tomas, "Itai limak-Ku sibawa taroni jarimmu kuwaè. Loro'i limammu namutaroi ri benrèk-Ku. Aja'na mubata-bata, iyakiya ateppe'no!" 28 Nakkeda Tomas lao ri Yèsus, "Puwakku sibawa Allataalaku!" 29 Nakkeda Yèsus lao ri alèna, "Mateppe'ko saba' pura-Ka muwita? Masennangngi tau iya mateppe'è, namuni dè' naita-Ka!" 30 Maèga mupa sining anu makalallaing laing iya napogau'è Yèsus ri yolona ana'-ana' gurun-Na, iyakiya dè' nariyoki ri lalenna kitta'èwè. 31 Iyakiya iya manennaè riyokii, kuwammengngi mumateppe makkedaè Yèsus iyanaritu Arung Pappassalama'è, Ana'na Allataala, sibawa nasaba teppe' ri alèna, lolongekko atuwong.
