1 Duwangngesso ri munrinna engka pèsta abottingeng ri kota Kana ri Galilèa, na engkai kuwaro indo'na Yèsus. 2 Yèsus sibawa ana'-ana' gurun-Na riyobbi towi lao ri pèstaèro. 3 Wettunna cappu anggoro'è, makkedani indo'na Yèsus lao ri Yèsus, "Acappurengngi mennang anggoro. " 4 Nappèbali Yèsus, "Indo', aja' musuro-Ka. Dè'pa narapii wettunna Uwappaddissengeng alè-Ku. " 5 Iyakiya makkedai indo'na Yèsus lao risining pattumaniè, "Pogau' bawanni aga napowadakko. " 6 Engka enneng bèmpa napassadiya kuwaro untu' apparelluwang abbissang situru ade' Yahudiè. Tungke' bèmpa lise'na kira-kira sèratu liter. 7 Nakkeda Yèsus lao risining pattumanièro, "Lisekiwi iyaro sining bèmpaè sibawa uwai. " Nalisekini mennang gangka penno. 8 Nainappa makkeda Yèsus lao ri mennang, "Alani cèddè' iyaro uwaiè makkekkuwangngè namutiwii lao ri pamimping pèstaè. " Natiwini mennang iyaro uwaiè lao ri pamimpinna pèstaè, 9 nanakanyamèi uwai iya tappinraènna mancaji anggoro. (Dè' naissengngi polè kègi iyaro anggoro'è, banna sining pattumani iya tiri'èngngi iyaro uwaiè bawang missengngi. ) Na iyaro pamimping pèstaè naobbini bottimpuranè, 10 nainappa makkeda ri alèna, "Biyasana tauwè anggoro makessingngè riyolo' napatala, cau maneppi sining undangengngè mènung, nainappa anggoro biyasaè. Iyakiya idi Saudara nataroi anggoro kaminang makessingngè lettu makkekkuwangngè!" 11 Iyanaro anu makalallaing mammulang napogau' Yèsus. Iyaro napogau'i ri Kana ri Galilèa. Nasibawang tanrangngèro nappaitangngi arajan-Na. Namateppe'na ana'-ana' gurun-Na. 12 Purairo laoni Yèsus ri Kapernaum silaong indo'-Na, sining silessuren-Na sibawa sining ana' gurun-Na. Monroni mennang kuwaro siyagangngarè esso ittana. 13 Macawè'nana Esso Maraja Paskana Yahudiè, laoni Yèsus ri Yèrusalèm. 14 Napolèini Yèsus ri Bolana Allataala sining pabbalu' sapingngè, bimbala'è, sibawa jangang-jangangngè; makkuwatoro sining passèlè dowiè tudang kuwaro. 15 Mèbbuni Yèsus sèuwa cambu polè ri tuluè nainappa narukka sininna olokolo'èro, muwi bimbala' iyarè'ga saping polè ri laleng Bolana Allataala. Nabalè'ni sining mèjanna passèlè-sèlè dowiè angkanna tassiya-siya dowina lao tulili. 16 Nakkeda lao ri pabbalu' jangang-jangangngè, "Akka manengngi polè kuwaè! Aja' mupancajiwi Bolana Ambo'-Ku onrong dangkang!" 17 Nanaèngngeranni sining ana' gurun-Na aya'na Kitta'èwè, "Pappojik-Ku lao ri Bola-Mu oh Allataala, natunui atik-Ku. " 18 Nasining panguwasana Yahudiè naèwani Yèsus, adanna mennang, "Cobasai mèbbu anu makalallaingngè selaku tanrang lao ri idi makkedaè engka ha'-Mu tinda' pada-padaèwè. " 19 Nappèbali Yèsus, "Ruttunni Bolaèwè, na ri laleng tellungngesso Upatettongngi matu paimeng. " 20 Nakkeda mennang, "Patappulo enneng taunna riyapparelluwang untu' patettongngi iyaè Bolana Allataala. Na iko maèloko patettongngi paimeng ri laleng tellungngesso?" 21 Iyakiya Bolana Allataala iya nasengngè Yèsus iyanaritu watakkalè-Na. 22 Jaji rimunri, puranana ripaoto' Yèsus polè ri amatèngngè, naèngngeranni ana'-ana' gurun-Na makkedaè iyaro gau'è purai napowada. Namateppe'na mennang lao ri iya tarokiè ri laleng Kitta'è sibawa lao ri iya napowadaè Yèsus. 23 Ri wettu engkana mupa Yèsus ri Yèrusalèm ri wettu Ramè-Ramè Paskaè, maèga tau mateppe' ri Alèna nasaba sining anu makalallaing iya napogau'è. 24 Iyakiya alèna Yèsus dè' natepperiwi mennang, saba' naisseng manengngi sininna tauwè. 25 Dè' naparellu tauwè mabbèrè pappakatajang lao ri Alèna passalenna nigi-nigi, saba' alèna missengngi aga iya engkaè ri laleng atinna rupa tauwè.
