1 Puranana Yèsus massempajang makkuwaro, laoni sibawa ana'-ana' gurun-Na ri liwenna Salo Kidron. Engka sèuwa tammeng kuwaro, nanauttama'na Yèsus sibawa ana'-ana' gurun-Na ri tammengngèro. 2 Iyaro Yudas, tau bali'bellaè, naisseng iyaro onrongngè; saba' biyasai Yèsus maddeppungeng kuwaro sibawa ana'-ana' gurun-Na. 3 Nalaona Yudas ri onrongngèro sibawa tiwi sipasukang tentara Romawi sibawa siyagangngarè pengawalna Bolana Puwangngè iya risuroè ri kapala-kapala imangngè sibawa sining tau Farisiè. Tiwii mennang senjata, pajjennangeng sibawa sulo. 4 Naisseng maneng Yèsus iya maèloè kajajiyang lao ri Alèna. Jaji naddeppèrini sining tauwèro nanakkuta-Na, "Niga musappa?" 5 Nappèbali mennang, "Yèsus, tau Nazarèt-è. " Nakkeda Yèsus, "Iyya'naè. " Iyaro Yudas tau bali'bellaè tettonni kuwaro silaong mennang. 6 Wettunna Yèsus makkeda lao ri mennang, "Iyya'naè, " soro manenni mennang namabuwang ri tanaè. 7 Siseppi Yèsus makkutana lao ri mennang, "Niga musappa?" Nappèbali mennang, "Yèsus tau Nazarèt-è. " 8 Nakkeda Yèsus, "Purani Upowada, Iyya'naè. Rèkko mèmeng musappa-Ka, leppessangngi mennangngè laingngè lao. " ( 9 Ri laleng makkeda makkuwannaro, kajajiyangngi aga pura napowada Yèsus riyolona: "Ambo', polè risining tau tawèrèngngèkka Ambo', muwi sèddi tau dè'to gaga teddèng. ") 10 Simon Pètrus iya tiwiè sipeppa peddang, narampuni nanawettai atanna imang lompoè angkanna massarang daucculing ataunna. Asenna iyaro ataè Malkus. 11 Nakkeda Yèsus lao ri Pètrus, "Puttama'i paimeng peddammu ri laleng wanuwanna! Muwasengngiga dè' Uwènungngi matu ènungeng anrasa-rasang iya nawèrèngngèk-Ka Ambo'è?" 12 Nainappa prajuri'-prajuri' Romawi sibawa komandanna enrengngè sining pengawalna Yahudiè tikkengngi sibawa siyoi Yèsus. 13 Bunge'-bunge'na natiwii mennang Yèsus mangolo ri Hanas, matuwa worowanèna Kayafas. Kayafas iyanaritu imang lompo ri taungngèro. 14 Na alèna ritu pura pangajariwi sining panguwasana Yahudiè makkedaè lebbi kessing muwi sèddiè tau matè untu' sininna bangsaè. 15 Simon Pètrus sibawa sèddi ana' gurun-Na laingngè maccowèriwi Yèsus. Ana' gurun-Na iya laingngèwè riissengngi ri imang lompoè; jaji maccowè toni muttama' sibawa Yèsus ri seddè bolana imang lompoè, 16 na Pètrus mattajeng ri saliweng, ri sumpangngè. Nainappa iyaro ana' gurun-Na iya laingngè laoni ri saliweng namabbicara sibawa pattumani makkunraiè iya jagaiyèngngi sumpangngè, nappa natiwi Pètrus muttama' ri laleng. 17 Nakkeda iyaro pattumani makkunraiè lao ri Pètrus, "Hèi, dè'ga na ikoto sala sèddinna ana' gurunna tauwèro?" Nappèbali Pètrus, "Tenniya. " 18 Iyaro wettuè makeccè hawaè, jaji sining pattumaniè sibawa sining pengawal-è purani palluwa api osing naddellang mennang kuwaro. Laoni Pètrus kuwaro natettong maddellang silaong mennang. 19 Makkutanani imang lompoè lao ri Yèsus passalenna ana'-ana' gurun-Na sibawa passalenna pappagguruwan-Na. 20 Nappèbali Yèsus, "Tuli mabbicara-Ka terus terang ri yolona tau maègaè. Tuli mappagguru-Ka risining bola assompangngè sibawa ri Bolana Allataala, onronna biyasa maddeppungeng tau Yahudiè. Dè' naengka Uwakkedada sibawa usubbu-subbu. 21 Jaji magi Puwang tatanai-Ka? Tanaiwi mennang iya puraè mèngkalinga-Ka mappagguru. Tentu naisseng mennang aga Upowada. " 22 Wettunna Yèsus makkeda makkuwaro, sala sèddinna pengawal-è kuwaro leppa'i sibawa makkeda, "Barani senna'-Ko mabbicara makkuwaro lao ri imang lompoè!" 23 Nappèbali Yèsus, "Rèkko engka sèuwa Upowada sala, powadani kuwaè aga salana! Iyakiya rèkko iyaro Upowadaè mèmeng tongengngi, magi muleppa'-Ka?" 24 Nainappa Hanas suroi tauwè tiwii Yèsus sibawa ribalenggu lao ri Imang Lompoè Kayafas. 25 Tettong mupi Simon Pètrus maddellang kuwaro. Nakkeda sining tauwè lao ri alèna, "Tenniyaga ikoto ana' gurunna tauwèro?" Iyakiya massakkai Pètrus, adanna, "Tenniya!" 26 Engka sèddi atanna imang lompoè, iyanaritu kaluwargana polè ri tau iya narette'è Pètrus daucculinna, makkeda, "Dè'ga nauwita tokko ri tammengngèro silaong Yèsus?" 27 Nassakkasi Pètrus, "Dè', " -- na iyatoro wettuè naoni manu'è. 28 Maèlè senna'ni mennang tiwii Yèsus polè ri bolana Kayafas lao ri saorajana gubernur-è. Sining tau Yahudiè dè' nauttama ri laleng saorajaè, kuwammengngi dè' nanajisi' secara agama, nasaba maèloi maccowè manrè nanrè Paska. 29 Rimakkuwannanaro laoni Pilatus ri saliweng ri mennang nanakkutana, "Aga pappotane'mu lao ri tauwèwè?" 30 Nappèbali mennang, "Akkalarapanna dè' napasala, dè' tatiwii lao ri Bapa' Gubernur. " 31 Nakkeda Pilatus lao ri mennang, "Alani namuwadèlèkiwi situru hukkummu!" Iyakiya mappèbaliwi iyaro sining tau Yahudiè, "Dè' naweddikki hukkung matèi tauwè. " ( 32 Kajajiyangngi iyaè kuwammengngi nakajajiyang aga napowada Yèsus passalen-Na pèkkugi cara-Na matè matti. ) 33 Muttama'ni paimeng Pilatus ri saorajaè, nanaobbii Yèsus, nainappa makkutana, "Ikoga arunna tau Yahudiè?" 34 Nappèbali Yèsus, "Polè ri alènaga puwang iyaè pakkutanaè iyarè'ga engka tau laing pura paissengiwi puwang passalenna alè-Ku?" 35 Nappèbali Pilatus, "Tau Yahudika'ga iyya'è? Iya mabbèrèyangngèk-Ko lao ri iyya iyanaritu bangsa-Mu muto sibawa kapala-kapala imangngè. Aga pura Mupogau'?" 36 Nakkeda Yèsus, "Akkarungek-Ku dè' napolè ri linoèwè. Ebara'na akkarungek-Ku polèi ri linoèwè, sining tauk-Ku mèwai matu kuwammengngi na aja' nariyabbèrèyak-Ka lao risining panguwasana Yahudiè. Iyakiya mèmeng akkarungek-Ku dè' napolè ri linoèwè!" 37 Nakkutana Pilatus ri Alèna, "Rèkko makkuwaitu, aruk-Kotu?" Nappèbali Yèsus, "Tapowadai puwang makkedaè Iyya'è arung. Jaji-Ka sibawa lao-Ka ri linoè untu' sèddi akkatta, iyanaritu mabbèrè asabbiyang passalenna atongengengngè. Tau iya polè ri atongengengngèro naèngkalinga-Ka. " 38 Nakkutana Pilatus ri Alèna, "Aga bettuwanna atongengengngè?" Nanassusi Pilatus polè ri saorajaè nanakkeda risining tau Yahudiè, "Dè'gaga muwi sèddi asalang ulolongeng ri Alèna. 39 Iyakiya manuru' abiyasammu, tuli malleppessakka sèddi tau tarungku ri Esso Maraja Paskaè. Maèlokoga kuwammengngi uleppessangekko arunna tau Yahudiè?" 40 Nappèbalina mennang sibawa gora-gora, "Dè' na iyaro, iyakiya Barabas!" (Barabas iyanaritu sèddiwi parampo. )
