1 Siesso riwettu dè'napa na Esso Maraja Paskaè, naissenni Yèsus makkedaè narapini wettunna Yèsus salaiwi linoèwè untu' lisu ri Ambo'-Na. Namasèiwi sining tau iya mancajiyè appunnangen-Na ri linoè, natette'i namasèi mennang lettu paccappureng. 2 Yèsus sibawa ana'-ana' gurun-Na mattengngang manrè wenni. Purani naputtama' Ibillisi'è ri laleng atinna Yudas ana'na Simon Iskariot niya' untu' bali'bellariwi Yèsus. 3 Naissenni Yèsus makkedaè pura nabbèrèyanni Ambo'è sininna akuwasangngè lao ri Alèna. Naisseng towi makkedaè polèi ri Allataala sibawa maèloi lisu ri Allataala. 4 Rimakkuwannanaro tettonni ludungngi jumba-Na, nanasiyoi handu babuwa-Na. 5 Purairo tiwini uwai ri laleng sèddiè katowang, nappammula bissaiwi ajèna ana'-ana' gurun-Na enrengngè rakkoiwi sibawa handu iya tassiyoè ri babuwa-Na. 6 Narapinana Simon Pètrus, makkedani, "Puwang, masakang idi Puwang bissaiwi ajèku?" 7 Nappèbali Yèsus, "Dè' mupahangngi. Makkekkuwangngè aga iya Upogau'è, iyakiya mupahang muwatu matu. " 8 Nakkeda Pètrus lao ri Yèsus, "Aja' Puwang. Aja' sises-siseng Puwang tabissaiwi ajèku!" Iyakiya mappèbaliwi Yèsus, "Rèkko dè' Ubissaiko, dè'gaga assisumpungek-Ku sibawa iko. " 9 Nakkeda Simon Pètrus, "Rèkko makkuwaitu Puwang, aja' na ajèku bawang iyakiya lima sibawa ulukkuto!" 10 Nakkeda Yèsus lao ri Pètrus, "Tau puraè cemmè, mapaccing manenni watakkalèna. Dè'na naparellu ripaccingina; sangadinna ajèna. Mapaccinno iko, iyakiya dè' naiya maneng. " ( 11 Naissengngi Yèsus niga bali'bellariwi matu. Iyanaro saba'na nakkeda, "Mapaccinno iko, iyakiya dè' naiya maneng. ") 12 Puranana Yèsus nabissai ajèna mennang, napakèni paimeng jumba-Na nanatudassi. Nappa makkeda lao ri mennang, "Mupahagga iya nappaè Upogau' lao ri iko? 13 Muwobbi-Ka Guru sibawa Puwang. Na mèmeng makkuwaro. 14 Rèkko Iyya selaku Puwang sibawa Gurummu bissaiwi ajèmu, sitinaja tokko sibissai ajè. 15 Uwèrèkko iyaè contoè, kuwammengngi mupogau' towi aga iya puraè Upogau' lao ri iko. 16 Tongeng senna' adak-Kuè: Sèddiè ata dè' nalebbi battowa polè ri puwanna, sibawa sèddiè suro dè' nalebbi battowa polè ri iya suroèngngi. 17 Rèkko muwissengngi iya manennaè, masennanno rèkko mupogau'i. 18 Aga iya Upowadaèwè tenniya iko maneng nakenna. Uwisseng niga-niga iya puraè Upilè. Iyakiya aga iya tarokiè ri laleng Kitta'è, harusu'i kajajiyang, iyanaritu 'Tau iya sisamaèk-Ka manrè, naèwa-Ka matu. ' 19 Iyaro gau'è Upalettukekko makkekkuwangngè, riwettu dè'napa nakajajiyang, kuwammengngi rèkko kajajiyangngi matu iyaro gau'è, mateppe'ko matu makkedaè Iyya'naè iya riteppuè IYYA ENGKA. 20 Tongeng senna' adak-Kuè: Niga tarimai tau iya Usuroè, natarima-Ka. Na niga tarima-Ka, natarimai iya suroèk-Ka. " 21 Puranana Yèsus makkeda makkuwaro, masè' senna'ni. Nappa makkeda, "Tongeng senna' adak-Kuè: Sala sèddinna polè ri yelle'mu bali'bellari-Ka matu. " 22 Hèrang senna'ni ana'-ana' gurun-Na sisullè sitangnga nasaba dè' naissengngi niga naseng. 23 Ana' guru iya mamasèiyèngngi Yèsus tudangngi ri seddèna Yèsus. 24 Nabbèrèna tanrang Simon Pètrus lao ri alèna, kuwammengngi nakkutana ri Yèsus niga nakkattai. 25 Naddeppèna iyaro ana' guruè ri Yèsus, nanakkutana, "Niga Puwang?" 26 Nappèbali Yèsus, "Tau iya Uwèrèngngè roti iya Upajajje'è ri laleng mangko'è, iyanaritu taunna. " Nalana Yèsus sipolo roti, napajajje'i ri laleng mangko'è; nappa nawèrèng Yudas ana'na Simon Iskariot. 27 Natarimana Yudas iyaro rotiè, muttama'ni Ibillisi' ri laleng atinna. Nainappa makkeda Yèsus lao ri alèna, "Pogau'ni masitta aga maèlo mupogau'. " 28 Dè' sèddi polè ri mennang iya tudangngè manrè kuwaro pahangngi magi Yèsus nakkeda makkuwaro lao ri Yudas. 29 Engka masengngi Yèsus suroi Yudas melli anu iya riyapparelluwangngè untu' ramè-ramèro, iyarè'ga mpèrèngngi cèddè dowi tau kasiyasiè -- saba' Yudas iyanaritu pakkatenning dowina mennang. 30 Natarimana Yudas iyaro rotiè, matteruni massu. Mawenni toni. 31 Labe'nana Yudas, makkedani Yèsus, "Ripakarajani Ana'na Tolinoè makkekkuwangngè, naripakarajato Allataala naolai Alèna. 32 Rèkko ripakarajai Allataala naolai Alèna, ripakaraja towi matu ri Allataala naolai Alèna muto. Na Allataala pakarajai matu sibawa masitta. 33 Ana'-ana'-Ku, dè'na namaitta Uwonro sibawakko. Musapak-Ka matu, iyakiya pada-pada iya puraè Upowada lao risining panguwasana Yahudiè, makkuwatoro Upowadakko matu; ri onrong Ulaoiyè, dè' mullèi lao. 34 Parènta baru Uwèrèkko: Amasèi sèddiè lao ri laingngè. Pada-pada Iyya mamasèiko, makkuwatoniro iko harusu' siyamasèi. 35 Rèkko siyamasèiko, naissengngi matu sininna tauwè makkedaè iko ana'-ana' guruk-Ku. " 36 Nakkutana Simon Pètrus lao ri Yèsus, "Puwang, kègaki maèlo lao Puwang?" Nappèbali Yèsus, "Kèga-Ka lao, dè' mullèi maccowè makkekkuwangngè. Muwaccowèri-Ka matu, ri munripi. " 37 Nakkutanasi Pètrus, "Magi nadè' nawedding maccowèki Puwang makkekkuwangngè? Macenning atikku matè untu' Puwang!" 38 Nappèbali Yèsus, "Tongegga macenning atimmu matè untu' Iyya? Issenni, riwettu dè'napa naoni matu manu'è, wèkkatelluno makkeda makkedaè dè' muwissek-Ka!"
