1 Engka sèddi tau riyaseng Lazarus monro ri Bètania silaong silessurenna Maria sibawa Marta. 2 Maria iyanaritu makkunrai iya tirikiyèngngi minnya' wangi ri ajèna Puwangngè, nanalullu'i sibawa gemme'na. Sèuwa wettu namalasa Lazarus. 3 Iya duwa silessurennaro nabirittanni Yèsus, "Puwang, silessuretta iya tamasèiyè Puwang malasai. " 4 Wettunna naèngkalinga Yèsus iyaro karèbaè, makkedani, "Iyaè lasaè dè' nassabari namatè. Kajajiyangngi iyaè kuwammengngi naripakaraja Allataala, nanassabari towi Ana'na Allataala ripakarajato. " 5 Yèsus mamasèiwi Marta, Maria sibawa Lazarus. 6 Iyakiya wettunna Yèsus natarima karèbaè makkedaè malasai Lazarus, nattungkai monro ri onron-Na duwangngessopa. 7 Purairo nappa makkeda ri ana'-ana' gurun-Na, "Laono mai talisu ri Yudèa. " 8 Nappèbali mennang, "Bapa' Guru, silalona sining tau Yahudiè maèlo genrungngi batu Bapa', namakkekkuwangngè maèlosi Bapa' lisu kuwaro?" 9 Nakkeda Yèsus, "Dè'ga naseppulo duwa jang siessoè? Tau iya joppaè ri essoè, dè' natabbuttu saba' naitai tajanna linoèwè. 10 Iyakiya tau iya joppaè ri wenniè tabbuttui, saba' dè'gaga tajang ri alèna. " 11 Makkuwaniro adanna Yèsus. Nappa makkedasi, "Sellaota Lazarus matinroni, iyakiya maèlo-Ka lao teddui. " 12 Nakkeda ana'-ana' gurunna Yèsus, "Puwang, rèkko matinroi Lazarus, majjappai matu matti. " 13 Akkattana Yèsus iyanaritu makkedaè matèni Lazarus. Iyakiya nasengngi mennang akkattana Yèsus iyanaritu makkedai matinro biyasai Lazarus. 14 Rimakkuwannanaro makkedai Yèsus lao ri mennang sibawa terus-terang, "Matèni Lazarus. 15 Iyakiya masennang tok-Ka dè'-Ka gaga kuwaro, saba' lebbi kessing muwi untu' iko, kuwammengngi naweddikko riyatepperi. Laono mai talao ri Lazarus. " 16 Tomas iya riteppuè "Si Dènru" makkedai lao ri sellao-sellaona ana'-ana' gurunna Yèsus, "Laono mai taccowè, leppessakki matè silaong Alèna!" 17 Wettunna Yèsus lettu ri onrongngèro, patangngessoni ittana Lazarus rikuburu'na. 18 Bètania macawè'è ri Yèrusalèm, kira-kira tellu kilo bèlana. 19 Maègani tau Yahudi polè cèllèngiwi Marta sibawa Maria untu' salèworiwi mennang nasaba amatènna silessurenna. 20 Wettunna naèngkalinga Marta engkai Yèsus, massuni duppaiwi Yèsus, na Maria monroi ri bolaè. 21 Nakkeda Marta lao ri Yèsus, "Puwang, èbara'na engkaki kuwaè Puwang wettuèro, tentu dè' namatè ana' buranèku. 22 Iyakiya muni makkuwaro uwisseng makkedaè makkekkuwangngètto nabbèrèyangngi matu Allataala aga taèllau Puwang ri Alèna. " 23 Nakkeda Yèsus lao ri Marta, "Tuwoi matu paimeng ana' buranèmu. " 24 Nappèbali Marta, "Uwisseng tuwoi matu paimeng Lazarus rèkko ripaoto'i tau matè ri Esso Kiyame'. " 25 Nakkeda Yèsus lao ri Marta, "Iyya ritu mabbèrè atuwong sibawa paoto'i tau matè. Tau iya mateppe'è ri Iyya, tuwoi matu namuni matèna. 26 Na tau tuwoè iya mateppe'è lao ri Iyya, dè'na namatè mannennungeng. Mateppe'koga ri gau'èro?" 27 Nappèbali Marta, "Puwang, mateppe'ka, Puwang Ana'na Allataala, Arung Pappassalama'è iya maèloè polè ri linoèwè. " 28 Purana Marta makkeda makkuwaro, laoni mobbii Maria padakkunrainna nanabici'i, "Engkai kuwaè Bapa' Guru; nakkutanakko. " 29 Naèngkalinganaro, mapperi-perini Maria moto, nalao sita Yèsus. 30 Iyaro wettuè, dè'pa nauttama Yèsus ri dèsaè. Ri onronna mupi Marta duppaiwi. 31 Sining tau Yahudiè iya salèworiyèngngi Maria ri bolaè, naitai Maria moto sibawa mapperi-peri massu; jaji laoni maccowèriwi, saba' nasengngi lao ri tampungngè untu' teri. 32 Wettunna Maria lettu ri onronna Yèsus sibawa naitani, makkaluttuni Maria ri yolo-Na sibawa makkeda, "Puwang, akkalarapanna engkaki Puwang kuwaè wettuèro, tentu dè' namatè ana' buranèku. " 33 Wettunna naita Yèsus Maria teri, sibawa sining tau Yahudiè iya duwangngèngngi Maria terito, messèni atin-Na, sibawa messè senna' rita. 34 Namakkutanana Yèsus lao ri mennang, "Kègai mukuburu'?" Nappèbali mennang, "Laoni mai taitai Puwang. " 35 Naterina Yèsus. 36 Nakkedana sining tau Yahudièro, "Itai, anengka makkuwa namasèin-Na Lazarus!" 37 Iyakiya engka ri yelle'na mennang makkeda, "Naèbbui tau butaè makkita, magi nadè' naullèi pèsangkai kuwammengngi aja' namatè Lazarus?" 38 Masè' senna'si Yèsus, nanalao ri kuburu'è. Iyaro kuburu'è iyanaritu sèddiwi gowa iya ritongkoè sibawa batu loppo. 39 Nakkeda Yèsus, "Paddèsu'i iyaro batuè!" Nappèbali Marta, silessurenna tau iya matèro. "Puwang, patang-ngessoni rikuburu'na. Tentu makebbonni!" 40 Nakkeda Yèsus lao ri Marta, "Dè'ga napurano Upowadang: Rèkko mateppe'ko, muwitai matu pèkkugi battowana akuwasanna Allataala!" 41 Nanapaddèsu'ni iyaro batuè. Nainappa conga Yèsus ri langiè sibawa makkeda, "Tarima kasi, Ambo', saba' Muwèngkalinga-Ka. 42 Uwisseng tuli Muwèngkalinga-Ka, iyakiya Upowadai iyaè, untu' sining tau iya engkaè kuwaè; kuwammengngi namateppe' mennang makkedaè Iko suro-Ka. " 43 Purana makkeda makkuwaro, gorani Yèsus sibawa sadda battowa, "Lazarus, assuko!" 44 Nassuna tau iya matènnaro. Limanna sibawa ajèna ridoko mupa kaing pawwalu, sibawa rupanna tattongko sibawa kaing pattongko rupa. Nakkeda Yèsus lao risining tauwè kuwaro, "Leppessangngi kaing pawwalunna kuwammengngi nalaluwasa joppa. " 45 Maèga polè risining tau Yahudiè iya laowè cèllèngiwi Maria, mateppe' lao ri Yèsus wettunna mennang naita iyaro kajajiyangngè. 46 Iyakiya engka siyagangngarè ri yelle'na mennang lao ri tau Farisiè nanalaporo'i aga pura napogau' Yèsus. 47 Rimakkuwannanaro sining tau Farisiè sibawa kapala-kapala imangngè pakangkani rapa' sibawa Mahkamana Agamaè. Makkedai mennang, "Aga harusu' ripogau'? Iyaè tauwè maèga anu makalallaing napogau'! 48 Rèkko rileppessangngi matteru-teru makkuwaè, mateppe' manengngi matu sininna tauwè lao ri Alèna. Na angkanna polèi matu panguwasana Roma nanaancuru'i Bolana Puwangngè sibawa sininna bangsata!" 49 Engka sèddi polè ri mennang riyaseng Kayafas, imang lompo ri taungngèro, makkeda, "Dè' agaga muwisseng iko. 50 Dè'ga mupahangngi makkedaè nasaba untu' ra'ya'è, lebbi kessing muwi sèddi tau matè naiya sininna bangsata ancuru?" 51 Sitongenna napowadai Kayafas iyaro, dè' napolè ripikkirang alèna. Iyakiya selaku imang lompo ri taungngèro nabotoi makkedaè matèi matu Yèsus untu' bangsa Yahudiè. 52 Natenniya untu' bangsa Yahudiè bawang, iyakiya untu' paddeppungeng towi sibawa passèddiwi ana'-ana'na Allataala iya massara-sarangngè. 53 Mappammulai iyaro essoè sikongkolo'ni sining panguwasana Yahudiè untu' mpunoi Yèsus. 54 Rimakkuwannanaro dè'na nappaitangngi alèna Yèsus ri yolona tau maègaè ri yelle'na tau Yahudiè. Nasalaini Yudèa, nalao ri kota riyasengngè Efraim seddèna padang kessi'è. Kuwaniro monro silaong ana'-ana' gurun-Na. 55 Iyaro wettuè macawè'ni Esso Maraja Paska Yahudiè. Maèga tau polè ri dèsa-dèsaè labe'ni lao ri Yèrusalèm untu' pogau'i upacara pappèpaccing alè ri wettu dè'napa naramè-ramèro. 56 Nasappani mennang Yèsus, na wettunna maddeppungeng ri Bolana Allataala, makkedani sèddiè lao ri laingngè, "Pèkkugi pallolongemmu? Naullè dè' nalao ri ramè-ramèwè. " 57 Napowadai mennanro saba' kapala-kapala imangngè sibawa sining tau Farisiè pura passu parènta makkedaè tau missengngèngngi kègi Yèsus monro, harusu'i nalaporo' kuwammengngi weddingngi ritikkeng.
