1 Ri pammulanna, dè'napa naripancaji linoè, engka mèmenni Saddaè. Engkai Saddaè silaong Allataala sibawa Saddaè pada-padai Allataala. 2 Pammulanna mupa nasibawa Allataala. 3 Iya manenna ripancajiwi naolai Alèna, sibawa polè ri sininna iya engkaè, dè'gaga sèddi dè' naripancaji polè ri Alèna. 4 Iyaro Saddaè assalennai atuwongngè, na iyaro atuwongngè mabbèrèi tajang lao ri rupa tauwè. 5 Iyaro tajangngè mattappai ri laleng pettangngè, na iyaro pettangngè dè' naullèi peddèiwi. 6 Polèni tau iya nasuroè Allataala, asenna Yohanès. 7 Polèi mabbirittangngi passalenna iyaro tajangngè, kuwammengngi nasininna tauwè mateppe'i. 8 Alèna paimeng tenniya iyaro tajangngè, nabbirittangngi bawang. 9 Tajang tonget-tongengngè iya tappaèngngi sininna rupa tauwè, polèi ri linoè. 10 Saddaè engkai ri linoè, ripancajiwi linoè polè ri Alèna, iyakiya dè' naissengngi linoè. 11 Laowi ri wanuwan-Na muto iyakiya dè' naritarima ri bangsa-Na. 12 Namuni engkato tau tarimai sibawa mateppe' ri Alèna, nawèrèngngi ha' mancaji ana' Allataala, 13 iya riyajjanciyangngè tenniya polè ri rupa tauwè, saba' iyaro atuwong mabaruè polèi ri Allataala assalenna. 14 Mancaji rupa tauni Saddaè, monroi ri yelle'ta, napurani riita arajan-Na. Iyaro arajangngè natarimai selaku Ana' Tungke'na Ambo'è. Naolai Alèna nariita Allataala sibawa pammasè-Na lao ri idi. 15 Polèi Yohanès selaku sabbin-Na mabbirittangngi: "Iyanaè Alèna iya upowadaè: Polèi matu lebbi ri monri naiya iyya, saba' dè'napa uwengka, engka mèmenni. " 16 Pennoi pammasè; dè' appèsaunna, barakkakiki. 17 Hukkunna Puwangngè ritarimai naolai Musa. Iyakiya pammasè sibawa atinulurenna Allataala ripannessai naolai Yèsus Kristus. 18 Dè' gaga pura mitai Allataala, ri lainnaè Ana' Tungke'na Ambo'è, iya padaè sibawa Ambo'è, sibawa mareppè senna'ki ri Alèna, Alèna ritu pannessai Ambo'è lao ri idi. 19 Sining panguwasa Yahudiè ri Yèrusalèm nasuroi imang-ngimangngè sibawa sining tau Lèwiè lao ri Yohanès sibawa makkutanangngi ri alèna, "Niga ikoè?" 20 Namangakuna Yohanès terus terang, "Tenniyaka Arung Pappassalama'è. " 21 Nakkutana mennang, "Rèkko makkuwaitu, niga iko? Ikoga Elia?" Nappèbali Yohanès, "Tenniya. " Nakkutanasi mennang, "Ikoga Nabiè?" Nappèbali, "Tenniya. " 22 Nakkeda mennang, "Rèkko makkuwaitu, powadanni niga iko, kuwammengngi weddikki mpèrèngngi pappèbali lao risining tau iya suroèkki. Aga adammu passalenna alèmu?" 23 Nappèbali Yohanès, "Iyya'naè iya napowadaè Nabi Yèsaya: 'Tau iya goraè ri padang kessi'è: Paratai lalengngè untu' Puwangngè. ' " 24 Sining tau iya risuroè ri tau Farisièro 25 makkutanasi, "Rèkko tenniyako Arung Pappassalama'è, tenniya Elia, tenniya Nabiè, magi palè mumaccemmè?" 26 Nappèbali Yohanès, "Iyya maccemmèka sibawa uwai. Iyakiya ri tengnga-tengngamu engka tau iya dè'è muwissengngi. 27 Polèi lebbi ri monri naiya iyya, iyakiya muwi untu' lukkai tulu sapatun-Na dè'to usitinaja. " 28 Iya manennaro kajajiyangngi ri Bètania, seddè alauna Salo Yordan onronna Yohanès maccemmè. 29 Pappa bajanana, naitani Yohanès, Yèsus lao ri alèna. Nakkeda Yohanès, "Itai, iyanaro Ana' Bimbala'na Allataala iya leddaèngngi dosana linoè. 30 Alèna ritu iya uwasengngè polèi matu lebbi ri monri naiya iyya, iyakiya lebbi battowai naiya iyya, saba' ri wettu dè'napa ujaji, engka mèmenni. 31 Ri yolonaro dè' uwissengngi niga Alènaro. Padahal polèka maccemmè sibawa uwai kuwammengngi naissengngi bangsa Israèliè. " 32 Nappèsabbing towi Yohanès iyaè, "Uwitai Rohna Allataala nonno pada-pada jangang-jangangngè polè ri langiè naonro ri yasè'-Na. 33 Iyaro wettuè dè'pa uwissengngi niga Alèna? Iyakiya Allataala iya suroèkka maccemmè sibawa uwai pura makkeda ri iyya 'Rèkko muwitai Rohna Allataala nonno, naonro ri yasè'na sèddiè tau, iyanaritu maccemmè matu sibawa Rohna Allataala. ' 34 Alèkuna pura mitai, " adanna Yohanès, "nausabbingngi makkedaè Alèna ritu Ana' Allataala. " 35 Pappa bajanana, engkasi Yohanès ri onrongngèro sibawa duwa ana' gurunna. 36 Wettunna naita Yèsus lalo, makkedani, "Itai! Iyanaro Ana' Bimbala'na Allataala. " 37 Iyaro duwaè ana' gurunna Yohanès naèngkalingani ada-adaèro, nanalao maccowèriwi Yèsus. 38 Nagilinna Yèsus limonri, nanaitai mennang maccowèriwi. Nakkutana-Na, "Aga musappa?" Nappèbali mennang, "Rabi, kègai Rabi monro?" -- ('Rabi' bettuwanna guru. ) 39 Nakkeda Yèsus, "Laono mai, na alèmu mitai. " Laoni mennang sibawa Alèna nenniya mitai kègai monro. Iyaro wettuè tettè eppani arawèngngè. Iyaro essoè monroni mennang silaong Alèna. 40 Sala sèddinna polè ri Iya duwa tau iya puraè mèngkalingai aga napowada Yohanès nainappa lao maccowèriwi Yèsus, iyanaritu Andrèas, silessurenna Simon Pètrus. 41 Mapperi-perini Andrèas sappai Simon, silessurenna, nakkeda ri alèna, "Purani siruntu Mesias!" (Mesias padai Kristus, iyanaritu: Arung Pappassalama'è. ) 42 Risilaongenni Simon ri Andrèas lao ri Yèsus. Ritangngani Simon ri Yèsus, nainappa makkeda, "Iko Simon, ana' Yona. Riyasekko matu Kèfas. " (Kèfas pada-padai Pètrus, bettuwanna: bulu batu. ) 43 Pappa bajanana, napettuini Yèsus untu' lao ri Galilèa. Siruntu'ni Filipus, nakkeda ri alèna, "Laono mai muwaccowèri-Ka!" 44 Assalenna Filipus iyanaritu Bètsaida, iyanaritu onrong naonroiyè Andrèas sibawa Pètrus. 45 Siruntu'ni Filipus sibawa Natanaèl nakkeda ri alèna, "Siruntu'ni tau iya nasengngè Musa ri laleng Kitta Hukkunna Allataala, sibawa iya nabbirittangngè nabi-nabiè. Iyanaritu Yèsus polè ri Nazarèt, ana'na Yusuf. " 46 Iyakiya mappèbaliwi Natanaèl, "Weddigga sèuwa iya makessingngè polè ri Nazarèt?" Nappèbali Filipus, "Laono mai na alèmu mitai. " 47 Naitani Yèsus Natanaèl polè, nakkeda passalenna alèna, "Itai, iyanaro tau Israèl tonget-tongeng. Dè'gaga apalessuwang ri alèna. " 48 Nakkutana Natanaèl ri Yèsus, "Pèkkugi taissekka Pa'?" Nappèbali Yèsus, "Riwettu dè'napa naobbiko Filipus, Uwita mèmenno ri yawana pong araè. " 49 Nakkeda Natanaèl, "Pa' Guru, Bapa' iyanaritu Ana' Allataala! Bapa' ritu Arunna bangsa Israèliè!" 50 Nakkeda Yèsus, "Mateppe'ko nasaba Upowadai makkedaè Uwitako ri yawana pong araè? Gau'-gau' iya lebbi battowaè na iyaro muwita matu!" 51 Nakkedapa Yèsus, "Tongeng, ateppe'no, muwitai matu langiè tattimpa', na malaèka'-malaèka'na Allataala notè ri Ana'na Tolinoè. "
