1 Saudara-saudara! Aja' namaèga polè ri yelle'mu iya maèloè mancaji guru. Muwisseng makkedaè idi iya mancaji guruè riadèlèkiwi matu lebbi matedde' naiya tau laingngè. 2 Idi manengngè biyasaki pogau' asalang. Iyakiya tau iya dè'è naengka napogau' asalang sibawa ada-adanna, iyanaritu tau iya sukkuè, iya mullè kuwasai manengngi alèna. 3 Rigalangngi anyarangngè kuwammengngi naturusiwi èlota, nataullèi patunru'i sininna watakkalèna iyaro anyarangngè. 4 Ala towi kappala'è selaku èbara'. Namuni kappala'è iyanaritu sèuwai iya makkuwaèmmani loppona sibawa ritiwi ri anging iya marajaè, iyakiya ripatunru'i ri golinna iya baiccu senna'è, situru èlona jurumudiè. 5 Makkuwatoniro sibawa lilata; namuni iyaro lilata baiccu'i, iyakiya naullèi mattempowangngi alèna ri laleng gau'-gau' iya battowaè. Pikkiri'ni pèkkugi loppona ale'è weddingngi ritunu ri api iya baiccu senna'è! 6 Lilaè pada-padai apiè. Ri watakkalèta, sinrupai assalenna majaè iya patassiyaèngngi jaè lao ri sininna alèta. Nasibawang api iya assalennaè polè ri ranakaè, nangureng manengngi sininna atuwotta. 7 Sininna rupanna olokolo' masekkangngè, manu'-manu'è, olokolo' makkalolo'è sibawa balè weddingngi ripakacuwai, sibawa pura toni ripakacuwai ri rupa tauwè. 8 Iyakiya lilana rupa tauwè muwi sèddi tau dè'to naullèi pakacuwaiwi. Iyaro lilaè majai sibawa dè' nariyullè makuwasaiwi; pennoi sibawa racung iya paunoè. 9 Takkègunangngi untu' mattarima kasi lao ri Puwangngè sibawa Ambo'ta, iyakiya untu' tanroi towi pada-padatta rupa tau, iya puraè ripancaji manuru' rupanna Allataala. 10 Polè ri tèmu iya padaè massui ada-ada tarima kasi'è sibawato ada-ada tanro. Sitongenna dè' nakkuwaro! 11 Engkaga mata uwai iya passuè uwai kawa sibawa uwai mapai polè ri assaleng iya padaè? 12 Saudara-saudaraku, pong araè, dè' nawedding powassèlè' buwa zaitun, sibawa anggoro'è dè' nawedding powassèlè' buwa ara. Mata uwai iya mapejjè dè'to nawedding passu uwai kawa. 13 Rèkko ri yelle'mu engka tau mapanrè sibawa makkèakkaleng, sitinajai mappaitangngi sibawa tuwo makessing enrengngè pogau'i gau'-gau' iya makessingngè, iya nasibawangngè ariyawang ati nenniya apanrèng. 14 Iyakiya rèkko mangèmpuruko, mapeddi ati sibawa pentingkangngi alèna, aja' muwammingkikengngi iyaro apanrèngngè, saba' nallalengiro muputara' balè'i biritta iya tongengngè iya polè ri Allataala. 15 Apanrèng makkuwaèro dè' napolè ri surugaè assalenna. Assalenna polèi ri linoè, polè ri napessunna tolinoè, sibawa polè ri sètangngè! 16 Kègi engka angèmpurung sibawa sipa' pentingkangngi alè bawang, kuwa towitu engka akacaungeng sibawa sininna rupanna pangkaukeng iya majaè. 17 Iyakiya tau iya mappunnaiyè apanrèng iya assalenna polè ri yasè', bunge'-bunge'na mapaccingngi, nainappa napoji sidamè, mabessa, sibawa mapato. Pennoi sibawa paressè babuwa powassèlè' pangkaukeng-pangkaukeng iya makessingngè. Dè' nakacowè-cowè sibawa dè' nabbonga-bonga. 18 Mèmeng akessingengngè iyanaritu wassèlè' polè ri binè adamèngengngè iya riyampoè ri tau iya pojiyèngngi damè!
