1 Assijancing iya mammulangngè mappunnai peraturang-peraturang assompang, sibawa mappunnai towi onrong assompang èbbu tolino. 2 Sèuwa kèma ripatettong iya bagiyang ri yolonaè riyasengngi Bili' Mapaccingngè. Kuwaro engka tettongeng pajjennangeng, sibawa engkato mèjang sibawa roti iya riyakkasuwiyangengngè lao ri Allataala. 3 Ri bagiyang lalenna, iyanaritu ri munrinna kaing paddenring iya maduwaè, engka bili' iya riyasengngè Bili' Pommapaccingngè 4 Ri laleng bili'èro engka mèzba iya riyèbbuè polè ri ulawengngè untu' mattunu dupa, sibawa engkato Petti Assijancingeng iya rilapiri manengngè sibawa ulaweng. Ri laleng Pettièro engka oring ulaweng mallise' manna, tekkenna Harun iya cura'ènna, sibawa duwa pèpeng batu iya riyarokiriyè seppulo parènta polè ri Allataala. 5 Ri yasè'na iyaro Pettiè engka duwa Kèrub iyanaritu mahlu' makkèpanni iya pulambangngèngngi ahadèrèkenna Allataala. Pannina iya duwa mahlu'èro mallebba'i ri yasè'na pattongkona pettiè iyanaritu onrong addampengenna dosaè. Iyakiya iya manennaè dè' nariyullè pakatajangngi sibawa tassèddi-sèddi. 6 Makkuwani ritu iya manenna riyatoro'. Esso-esso sining imangngè muttama ri laleng bagiyang yolona kèmaèro untu' pajoppai jamanna. 7 Iya muttama'è ri bagiyang kaminang marilalenna iyaro kèmaè banna imang lompoè bawang. Napogau'i iyaro siseng bawang sitaung. Napogau'i iyaro sibawa tiwi dara untu' riyakkasuwiyangeng ri Allataala nasaba alèna muto sibawa nasaba dosa-dosa iya napogau'è umma'-Na tennasadariwi. 8 Nasibawang iyaro peraturangngè, nappaitangngi Rohna Allataala ri idi sibawa manessa, makkedaè sipongenna kèma bagiyang ri yoloèro tettong mupi, laleng muttama'è ri Bili' Pommapaccingngè dè'pa natattimpa'. 9 Iyaè pulambangngi wettu makkekkuwangngè; bettuwanna makkedaè sining pakkasuwiyangngè sibawa sining akkarobangeng olokolo'è iya riyakkasuwiyangengngè lao ri Allataala, dè' naullèi passukkui ati marilalenna tauwè iya tiwièngngi pakkasuwiyangngè. 10 Saba' iyaro upacara-upacaraè banna takkennai ri inanrè, ènungengngè, sibawa maddupa-rupang upacara pappèpaccing. Iya manenna banna sining peraturang mallahèreng iya lakuè banna narapi wettunna Allataala pakangkai pappakabaruè. 11 Iyakiya Kristus polèni selaku Imang Lompona gau'-gau' iya makessingngè iya engkaènna. Kèmana Puwangngè iya naonroiyè pogau'i jaman-Na selaku Imang Lompo iyanaritu kèma iya lebbi battowaè sibawa lebbi sukkuè. Iyaro dè' naèbbui tolinoè; bettuwanna dè' napolè ri linoè iya napancajiyèwè. 12 Muttama'i Kristus ri Bili' Pommapaccingngè ri laleng kèmaèro banna siseng bawang lettu mannennungeng. Iyaro wettuè dè' natiwi dara bèmbè lai iyarè'ga dara ana' saping untu' riyakkasuwiyangeng; dara-Na muto natiwi, nanallalengiro napaleppe'ki lettu mannennungeng. 13 Dara bèmbè sibawa saping laiè enrengngè awunna akkarobangenna ana' sapingngè, ripakèi untu' meppikiwi sining tau iya najisi'è manuru hukkung agamaè; kuwammengngi namapaccing mennang. 14 Nah, rèkko dara sibawa awuèro naullèi pèpaccingiwi anajisikenna sining tauwèro, apalagi darana Kristus! Naolai Roh iya mannennungengngè, nakkasuwiyangengngi Alèna lao ri Allataala selaku akkarobangeng iya sukkuè. Dara-Na pèpaccingiwi atitta polè ri upacara agamaè iya dè'è nakkèguna, kuwammengngi weddikki tumaningiwi Allataala iya tuwoè. 15 Iyanaro saba'na, Kristus mancaji Pappasisumpung untu' sèuwa assijancingeng iya mabaruè, kuwammengngi na tau iya puraènna riyobbi ri Allataala naullèi tarimai barakka-barakka mannennungengngè iya puraè najjanciyang Allataala. Iya manennaro weddingngi kajajiyang nasaba engkana matè, iyanaritu Kristus; na amatèn-Naro paleppe'i tauwè polè risining asalanna iya napogau'è mennang ri wettu takkennana mupa assijancingeng iya mammulangngè. 16 Rèkko engka sure' warisi', harusu towi engka buttinna makkedaè tau iya mèbbuèngngi iyaro sure'è matèni. 17 Saba' sure' warisi'è dè' nalaku ri wettu tuwona mupa tau iya mèbbuèngngi. Iyaro sure'è banna lakui rèkko matèni iyaro tauwè. 18 Iyanaro saba'na magi na muwi assijancingeng iya mammulangngè harusu'i ripaessa sibawa dara. 19 Bunge'-bunge'na napalettu'i Musa sininna parèntana hukkunna Allataala lao ri bangsa Israèliè. Purairo malani Musa dara ana' saping sibawa dara bèmbè lai, nainappa nacampuru'i sibawa uwai, nainappa naeppikeng Kitta' Hukkung-hukkunna Allataala sibawa ri sininna bangsa Israèliè sibawa pakè wella hisop sibawa bulu-bulu bimbala' macella cowaè. 20 Ri wettu napogau'naro makkedai Musa, "Iyanaè dara iya paessaèngngi assijancingeng polè ri Allataala iya harusu'è muwatinuluri. " 21 Nainappa nasibawang cara iya padaè, nakkeppikeng toni Musa iyaro daraè ri Kèmana Puwangngè sibawa ri sininna parèwa-parèwa untu' assompangngè. 22 Mèmeng manuru hukkunna agama Yahudiè, cèddè'pi nasininna sèuwa-sèuwaè ripaccingiwi sibawa dara; na dosaè banna weddingngi riyaddampengeng rèkko engka dara ripatabbollong. 23 Nasibawang cara pada-padaèro barab-barang iya pulambangngèngngi gau'-gau' ri surugaè, parellui ripèpaccingiwi. Iyakiya untu' gau'-gau' iya ri surugaè mutoro riyapparelluwangngi akkarobangeng iya mabèlaè lebbi makessing. 24 Saba' dè' nauttama Kristus ri Bili' Mapaccingngè èbbu tolinoè, iya bannaè pulambangngi Bili' Mapaccingngè iya sitongennaè. Muttama'i Kristus ri surugana muto; kuwaniro makkekkuwangngè mangolo ri Allataala untu' apentingetta. 25 Imang lompona Yahudiè tungke'-tungke' taung muttama'i ri Bili' Pommapaccingngè ri laleng Bolana Puwangngè sibawa tiwi dara sikaju olokolo'. Iyakiya Kristus dè' nauttama untu' makkasuwiyangengngi Alèna makkolik-koling. 26 Saba' rèkko makkuwairo, bettuwanna iyaro makkolik-kolinni manrasa-rasa sipongenna ripancaji linoèwè. Iyakiya annessana, makkekkuwangngè ri wettu paccappurengngèwè, siseng bawang polè untu' leddai dosaè ri laleng nakkarobangenna Alèna. 27 Purani napattette Allataala makkedaè sisemmi matè rupa tauwè napurairo riadèlèkiwi ri Allataala. 28 Makkuwatoro Kristus sisemmi riyakkasuwiyangeng selaku akkarobangeng untu' leddai dosana maèga tau. Maèloi polè paimeng mabbèkkaduwanna, tenniya untu' pacceppiwi persoalang dosaè, iyakiya untu' passalama'i sining tau iya tajengngèngngi apolèn-Na.
