1 Poko'na sininna abbicarangngèwè iyanaritu: Mappunnaiki Imang Lompo iya pada-padaèro, iya tudangngè mapparènta silaong Allataala Pobbattowaè ri sururugaè. 2 Najamai jamangngè selaku Imang Lompo ri Bili' Pommapaccingngè, iyanaritu ri laleng Kèmana Puwangngè iya tongengngè, iya napatettongngè Puwangngè, tenniya polè ri tolinoè. 3 Tungke' imang lompo riyakkai untu' makkasuwiyangengngi akkarobangengngè iyarè'ga pakkasuwiyangengngè lao ri Allataala. Makkuwatoniro Imang Lompota; harusu'i mappunnai agi-agi untu' riyakkasuwiyangeng. 4 Ebara'na engkai ri linoèwè, dè' namaèlo mancaji imang, saba' engkana imang iya makkasuwiyangengngè akkarobangeng iya rituntu'è ri laleng hukkunna agama Yahudiè. 5 Jama-jamang iya napogau'è mennang selaku imanro sitongenna banna sèddi gambara sibawa wajo-wajo polè ri aga iya engkaè ri surugaè. Iyaro purani nappaddissengeng Allataala lao ri Musa riyolo, wettunna Musa maèlo patettongngi Kèmana Puwangngè. Makkeda makkuwaiyè Allataala lao ri Musa, "Engngerangngi! Iya manennaro harusu'i uwèbbu situru conto iya napaitangngèkko ri yasè'na buluè. " 6 Iyakiya makkekkuwangngè Yèsus lolongengngi jamang imang iya mabèla lebbi malebbiè naiya jamang imang iya najamaè sining imangngèro. Saba' assijancing iya Napakangkaè Allataala sibawa tolinoè, iyanaritu assijancing iya lebbi makessingngè nasaba tettongngi ri janci untu' gau'-gau' iya lebbi makessingngè! 7 Ebara'na dè'gaga akurangenna ri assijancing iya mammulangngè, tentu dè'na naparellu ripakangka assijancing iya maduwaè. 8 Iyakiya naruntu'ni Allataala asalangngè ri umma'-Na, angkanna makkedai Allataala, "Engngerangngi, polèi matu wettunna, pakangka-Ka matu assijancing iya mabaruè sibawa bangsa Israèliè, sibawa bangsa Yèhuda. 9 Dè' napada-pada assijancing iya Uwèbbuè sibawa nènè-nènèna mennang wettuk-Ku dulungngi mennang massu polè ri wanuwa Masèrè'. Dè' mennang namatinulu ri assijancing iya Uwèbbuè sibawa mennang; iyanaro saba'na dè' Napaduliwi mennang. 10 Iyakiya makkekkuwangngè, iyanaritu assijancing iya maèloè Uwèbbu sibawa umma' Israèliè ri esso-esso iya mangoloè, adanna Puwangngè: Maèlo-Ka taroi hukkuk-Ku ri laleng pikkiranna, sibawa mokii ri atinna mennang. Maèlo-Ka mancaji Allataalana, sibawa mennang mancaji umma'-Ku. 11 Dè'na naparellu mennang paggurui pada-padanna appanna, iyarè'ga paissengiwi silessurenna, 'Issenni Puwangngè. ' Saba' iya maneng, baiccu battowa, naissek-Ka matu. 12 Maèlo-Ka maddampengengngi sining asalanna, sibawa dè'na Uwèngngerangngi dosa-dosana. " 13 Ri laleng napangolona sininna assijancing iya mabaruè, naèbbui Allataala iyaro assijancing mammulangngè mancaji malaung sibawa malusa; sibawa aga iya macowaènna, dè' namaitta nalennye tona.
