1 Iyaè Malkisèdèk iyanaritu arung polè ri Salèm sibawa imanna Allataala Iya Pommatanrè. Wettunna Abraham lisu polè ri ammusurengngè caui sining arungngè, polèi Malkisèdèk duppaiwi sibawa barakkakiwi. 2 Nanabbèrèyanni Abraham lao ri Malkisèdèk tawa seppulona polè ri sininna iya narappaè. (Aseng Malkisèdèk bettuwanna, bunge'-bunge'na, "Arung Adèlè'è"; sibawa nasaba arungngi ri Salèm, makkèbettuwang towi asenna "Arung Salèwangeng". ) 3 Passalenna iyaè Malkisèdèk dè'gaga pappakatajang muwi kègi makkedaè mappunnaiwi ambo' iyarè'ga indo' iyarè'ga nènè; dè'to gaga pappakatajang passalenna ajajiyanna, iyarè'ga amatènna. Pada-padai Ana'na Allataala; alèna iyanaritu imang iya mannennungengngè. 4 Jaji, ritani kuwaè pèkkugi loppona iyaè Malkisèdèk; makkuwamani loppona angkanna Abraham, ambo'na toriyolona bangsata, nawèrèngngi tawa seppulona polè ri sininna sèuwa-sèuwaè iya nalolongengngè polè ri ammusurengngèro. 5 Ri laleng hukkunna agama Yahudiè ripattentui makkedaè sining imang wijanna Lèwiè harusu'i lèlèi tawa seppulona polè ri pallolongenna umma' Israèliè, iyanaritu saudara-saudarana mennang, namuni mennang pada-padai wija-wijanna Abraham. 6 Malkisèdèk tenniya wija-wijanna Lèwi, iyakiya tarima towi tawa seppulona polè ri sininna iya narappaè Abraham, sibawa barakkaki towi Abraham iya puraè tarima janci-janci polè ri Allataala. 7 Mèmeng dè' nawedding ribanta makkedaè tau iya ribarakkakiyè iyanaritu lebbi riyawai naiya tau iya pabarakkakiyè. 8 Sining imang iya tarimaèngngi iya rilèlè tawa seppuloèro iyanaritu sining tau iya weddingngè matè. Iyakiya manuru Kitta'è, Malkisèdèk iya tarimaè pabbèrè tawa seppulo bagiyanro iyanaritu tau iya tette'è tuwo. 9 Wedding ripowada, makkedaè Lèwi -- iya wijannaè lèlè tawa seppulo bagiyang polè ri umma' Israèliè -- mpaja towi bagiyangngèro naolai Abraham, ri wettunna Abraham mpajai lao ri Malkisèdèk. 10 Namuni dè'pa nawajai Lèwi, iyakiya wedding ripowada engkani ri laleng tubunna Abraham nènè-nènèna, ri wettunna Malkisèdèk siruntu sibawa Abraham. 11 Ri yawa pappimpinna sining imang Lèwiè, riwèrèngngi umma' Israèliè hukkunna agama Yahudiè. Nasaba iyaro sining imang Lèwiè riyolo dè' naullèi pogau'i sibawa sukku aga iya harusu'è napogau', sibawa harusu engka imang laing, iyanaritu pada-padaè Imang Malkisèdèk, sibawa dè' napolè ri golongang Imang Harun! 12 Nah, rèkko tappinrai tudangenna sining imangngè, harusu towi tappinra, hukkunna agama Yahudiè. 13 Iya nakkattaiyè kuwaè iyanaritu Puwatta: Polèi ri suku laingngè, sibawa dè'pa naengka muwi sèddi tau polè ri sukun-Na majjama selaku imang. 14 Sininna tauwè naisseng makkedaè assalenna Puwatta polèi ri suku Yèhuda; na Musa dè' naengka nateppui iyaro sukuè wettunna mabbicara passalenna sining imangngè. 15 Passaleng iya ribicaraèwè lebbi manessai paimeng, ri laleng mompona sèddi imang laing iya pada-padaè Malkisèdèk. 16 Riyakkai mancaji imang, tenniya nasaba peraturang-peraturang tolino, sangadinna polèi ri atuwonna iya makuwasaè sibawa iya dè'è gaga paccappurenna. 17 Saba' ri laleng Kitta'è ripowadai, "Iko iyanaritu imang mannennungeng, pada-pada Imang Malkisèdèk. " 18 Jaji, makkekkuwangngè peraturang iya malaungngè ri palibenrènni, saba' dè' namawatang sibawa dè' nakkèguna. 19 Hukkunna agama Yahudiè dè' naullèi mèbbui muwi sèuwa mancaji sukku. Iyanaro saba'na nariwèrèkki makkekkuwangngè sèuwa ammènasang iya lebbi makessingngè; nanallalengiro nataullèi maddeppèriwi Allataala. 20 Iyatopa paimeng, iya manennaro nasibawangngi tanro polè ri Allataala. Dè'gaga tanro pada-padaèro, wettunna sining imang iya laingngèro riyakka. 21 Iyakiya Yèsus riyakkai mancaji imang pakè tanro, wettunna Allataala makkeda lao ri Alèna, "Purani mattanro Puwangngè, nadè' napinrai matu attangen-Na, 'Iko iyanaritu imang mannennungeng. ' " 22 Nasibawatto iyaè mancaji boro'i Yèsus untu' sèuwa assijancingeng iya lebbi makessingngè. 23 Engka mupa sèddi passaleng: iyaro sining imang iya laingngè engka maèga, saba' tungke'-tungke' mennang matèi angkanna dè' naullèi patterui jabatanna. 24 Iyakiya Yèsus tuwoi mannennungeng, jaji jabatan-Na selaku imang dè' nalèlè ri tau laingngè. 25 Rimakkuwannanaro lettu mannennungeng naullèi Yèsus passalama'i sining tau iya laowè ri Allataala naolai Alèna, saba' tuwoi mannennungeng untu' mèllauwi ri Allataala untu' sining tauwèro. 26 Jaji, Yèsusnaro ritu Imang Lompo iya tapparelluwangngè. Mapaccingngi: ri Alèna dè'gaga asalang iyarè'ga muwi dosa aga. Ripallaingngi polè risining tau madosaè, sibawa ripaènrè'i lettu ri onrong iya lebbi matanrè polè ri sininna langiè. 27 Dè' napada-pada sining imang lompo laingngè, iya esso-essoè harusu makkasuwiyangeng akkarobangeng nasaba dosa-dosa alèna riyolo, nappa nasaba dosa-dosana umma'è. Yèsus makkasuwiyangengngi akkarobangengngè siseng bawang lettu mannennungeng, wettunna nakkasuwiyangeng Alèna selaku akkarobangeng. 28 Hukkunna agama Yahudiè makkai sining tau iya dè'è nasukku mancaji sining imang lompo. Iyakiya rimunri polè ri hukkung-hukkungngèro, mèbbui Allataala assijancingeng sibawa tanro makkedaè nakkai selaku Imang Lompo, Ana' iya puraè mancaji Pappassalama' iya sukkuè lettu mannennungeng.
