1 Tungke' imang lompo ripilèi polè ri yelle'na umma'è, sibawa riyakka untu' tumaningiwi Allataala selaku wakkèlè'na mennang. Jamanna iyanaritu makkasuwiyangengngi lao ri Allataala sining pabbèrèna sibawa akkarobangeng-akkarobangenna untu' riyaddampengenna dosaè. 2 Iyaro imang lompoè malemmai ri laleng maèga passaleng, iyakiya mala nasaba iyaro naweddingngi namalemma kininnawato lao risining tau iya dè'è naissengngi agi-agi sibawa iya pusaè lalenna. 3 Sibawa nasaba malemmai alèna, na harusu'i makkasuwiyangeng akkarobangeng, tenniya bawang nasaba dosa-dosana umma'è, iyakiya nasaba dosa-dosanato alèna. 4 Dè'gaga sèddi tau iya alèna muto makkai alèna mancaji imang lompo. Mancajiwi imang lompo tauwè, rèkko Allataala mobbii untu' iyaro -- pada-pada muto Harun. 5 Makkuwatoro Kristus. Dè' nakkai Alèna mancaji Imang Lompo. Allataala muto makkai. Makkedai Allataala ri Alèna, "Ikona Ana'-Ku: iyaè essoè umancaji Ambo'mu. " 6 Ri onrong laingngè makkeda towi Allataala, "Iko iyanaritu imang mannennungeng, pada-pada Imang Malkisèdèk. " 7 Wettunna Yèsus tuwo ri linoèwè, massempajangngi enrengngè marèllauwi sibawa gora kuwaèttopa teri lao ri Allataala, iya mullè mappassalama' polè ri amatèngngè. Nasaba tunru'i ri Allataala sibawa mappakalebbi, nariyèngkalingai. 8 Yèsus iyanaritu Ana' Allataala, iyakiya muni makkuwaro, maggurui mancaji matinulu naolai anrasa-rasan-Na. 9 Na puranana ripancaji pappassalama' iya sukkuè, mancajiwi assalenna asalamakengngè iya mannennungengngè lao ri sininna tau iya matinuluè ri Alèna, 10 sibawa muwi Allataala pannessa towi selaku Imang Lompo, pada-pada Imang Malkisèdèk. 11 Passalenna tudangenna Yèsus selaku Imang Lompo, engka maèga iya parelluè riyappaissengeng lao ri iko, iyakiya mawatang untu' pakatajangngi saba' matengnge' senna'ko mappahang. 12 Sitongenna wettummuna untu' mancaji guru, iyakiya annessana parellu mupo magguru polè ri tau laingngè passalenna poko'-poko' mammulangngè sining pappagguruwanna Allataala. Dè'pa muwullèi tarima anrè iya matedde'è; harusu mupo mènung susu bawang. 13 Tau iya mènungngè mupa susu, bettuwanna ana'lolo mupi; dè'pa nappunnai pangalamang passalenna aga iya tongengngè sibawa aga iya salaè. 14 Inanrè iya matedde'è, iyanaritu sining tau battowaè iya nasaba pangalamannaè, naullèi pasilaingengngi kèga makessing sibawa kèga maja.
