1 Iyanaro saba'na na harusu'ki pèdè' mattonget-tongeng makkatenning risining pappagguruwanna Allataala iya puraè riyèngkalinga, kuwammengngi aja' tasalaiwi atepperetta. 2 Sining paseng iya napalettu'è sining malaèka'è lao ri nènè-nènèta manessani tongeng, na tau iya dè'è naturusiwi iyarè'ga napatoiwi tarimai pahukkungeng iya sicoco'è. 3 Apalagi nasibawang asalamakeng iya lebbi hèba'è naiya sining pasengngèro! Rèkko dè' tajampangiwi asalamakengngèro, tentuni dè' taleppe matu polè ri pahukkungengngè. Saba' Puwangngè muto ritu iya bunge'-bunge'è mappallebbangengngi asalamakengngèro, nasining tau iya bunge'-bunge'è mèngkalingai purani napabutti atongengenna lao ri idi. 4 Ri lainnaèro, turu'i Allataala pèwatangiwi asabbiyanna iyaro sining tauwè ri laleng napakangkana maddupa-rupang anu makalallaing enrengngè gau'-gau' iya dè'è padanna kuwaèttopa mabbagè-bagèyangngi sining pabbèrè polè ri Rohna Allataala situru èlo-Na muto. 5 Sining malaèka'è dè' nalolongeng akuwasang polè ri Allataala untu' parèntai lino baru iya mangoloè, iyanaritu lino iya mattengngangngè ribicaraè. 6 Sibalè'na, risèuwaè bagiyang ri laleng Kitta'è tarokii makkuwaè, "Aga iyaro rupa tauwè, oh Allataala, angkanna maèloki mèngngerangngi? Rupa tauwè banna rupa tau bawang, iyakiya mujampangiwi! 7 Untu' wettu iya cinna'è Mupancajiwi cèddè lebbi ri yawa naiya malaèka'è. Tawèrèngngi tudangeng iya malebbiè sibawa marajaè, 8 enrengngè pancajiwi makuwasa ri yasè'na sininna sèuwa-sèuwaè. " Nah, rèkko ripowadai Allataala pancajiwi rupa tauwè "makuwasaiwi sininna sèuwa-sèuwaè", iyaro bettuwanna makkedaè dè'gaga muwi sèddi iya dè'è na ri yawana akuwasanna rupa tauwè. Namuni makuwasai rupa tauwè ri yasè'na sininna sèuwa-sèuwaè. 9 Iyakiya idi purani riita Yèsus makuwasaiwi! Ripancajiwi cèddè lebbi ri yawa naiya malaèka'è untu' wettu cinna'è, kuwammengngi ri laleng akessingeng atinna Allataala weddingngi matè untu' sininna rupa tauwè. Riitani makkekkuwangngè riwèrèng tudangeng iya malebbiè sibawa marajaè nasaba purai manrasa-rasa gangka matè. 10 Mèmeng sipato'ni Allataala -- iya pinruèngngi sininna sèuwa-sèuwaè untu' akkatta-Na muto -- mèbbui Yèsus pappassalama' iya sukkuè naolai anrasa-rasangngè. Nallalengiro naullèi Allataala mèrai maèga tau untu' maccowè ripakaraja silaong Yèsus. Saba' Alèna pattimpa laleng lao ri mennang untu' weddingngi ripassalama'. 11 Yèsus pèpaccingiwi rupa tauwè polè ri dosa-dosana mennang; na Alèna iya pèpaccingiyèngngi, enrengngè mennang iya ripèpaccingiyèro, pada-padai mappunnai sèddi Ambo'. Iyanaro saba'na Yèsus dè' namasiri mangakuiwi mennanro selaku saudara-saudara-Na. 12 Makkedai Yèsus lao ri Allataala, "Maèloka mabbirittangngi lao ri saudara-saudara-Ku passalenna Iko. Maèlo-Ka poji-Ko ri laleng addeppu-deppungenna mennang. " 13 Makkeda towi Yèsus, "Maèlo-Ka mammènasa lao ri Allataala. " Sibawa makkeda towi, "Iyanaè Iyya, silaong ana'-ana' iya puraè nabbèrèyang Allataala lao ri Iyya. " 14 Nasaba sining tau iya nateppuè iyaro ana'è, iyanaritu mahlu' tolino iya weddingngè matè, na Yèsus muto mancaji pada sibawa mennang enrengngè tuwo ri laleng keadaang tolinoè. Napogau'i makkuwaèro, kuwammengngi nasibawang amatèn-Na naullèi mancuru'i Ibillisi' iya makuwasaiyèngngi amatèngngè. 15 Nasibawang caraèro napalettu'i sining tau iya sillampèè umuru'na ripowata nasaba mètaui ri amatèngngè. 16 Manessani makkedaè tenniya malaèka' iya Natulungngè, sangadinna wijanna Abraham. 17 Bettuwanna iyaè, makkedaè harusu'i mancaji pada-pada saudara-Na ri laleng sininna gau'è. Nanallalengiro weddingngi mancaji Imang Lompo iya matinuluè sibawa maressè babuwaè. Nasaba pattumaninnaro, weddingngi riyaddampengeng dosa-dosana tolinoè. 18 Sibawa nasaba alèna pura manrasa-rasa enrengngè ricobai, nanaullèi tulungngi sining tau iya nakennaè paccobang.
