1 Wettu riyolo malèwe' senna' Allataala mabbicara lao ri nènè-nènèta naolai nabi-nabiè sibawa pakèi maddupa-rupang cara. 2 Iyakiya ri wettu paccappurengngèwè mabbicarai lao ri idi naolai Ana'-Na. Naolai Ana'-Naè napancajiwi Allataala sininna alangngè. Sibawa purani napattentu Allataala makkedaè iyatonaè Ana'-Na iya mappunnaiyè ha' mappunnaiwi sini-sininnaè. 3 Alèna ritu mattapparengngi arajanna Allataala iya millakkillangngè; Alèna ritu gambara'na Allataala iya manessaè. Alèna tona piyarai akkalèpunna alangngèwè ri laleng saddan-Na iya makuwasa senna'è. Puranana napakkullè rupa tauwè untu' ripaleppe polè ri dosa-dosana mennang, natudangini kadèra apparèntangngè ri surugaè silaong Allataala, Panguwasa iya kaminang matanrè. 4 Iyaro Ana'è lolongengngi tudangeng iya mabèlaè lebbi tanrè naiya malaèka'è, sibawa aseng iya riwèrèngngèngngi ri Allataala lao ri Alèna mabèla towi lebbi malebbina naiya aseng iya riwèrèngngèngngi malaèka'è. 5 Dè' naengka nakkeda makkuwaè Allataala muwi lao risèddiè malaèka', "Ikona Ana'-Ku; iya essoèwè Umancaji Ambo'-Mu. " Dè'to naengka nakkeda makkuwaè Allataala passalenna muwi malaèka' niga, "Maèlo-Ka mancaji Ambo'na, na alèna mancaji matu Ana'-Ku. " 6 Iyakiya wettunna Allataala nasuro Ana'-Na iya macowaè muttama ri linoèwè, makkeda makkuwaiyè Allataala, "Sininna malaèka'na Allataala waji'i sompai iyaro Ana'è. " 7 Passalenna sining malaèka'è, makkeda makkuwaiyè Allataala, "Naèbbui Allataala sining malaèka'-Na mancaji anging, sibawa sining pattumanin-Na mancaji luwa' api. " 8 Iyakiya lao ri Ana'èro, makkedai Allataala, "Kadèra arajam-Mu, oh Allataala, mannennungengngi matu! 9 Napoji adèlèkengngè, sibawa nabenciwi acèko-cèkongngè; iyanaro saba'na Allataala, Allataala-Mu, napilè-Ko sibawa mpèrèk-Ko alebbireng iya mappapolè ariyo-riyong, napakacauri sellao-sellao-Mu. " 10 Makkeda towi Allataala, "Idi, Puwang, bunge'-bunge' pancajiwi tanaè, sibawa alèmuto mèbbui langiè. 11 Iya manennaro lennye'i matu, sibawa mancaji malaung pada-pada pakèyangngè; iyakiya Iko dè' pinrana matu. 12 Alangngè lollong lise'na Muleppiwi matu pada-pada wajuè, na-Musullèiwi matu sibawa laingngè. Iyakiya Iko dè' naengka mutappinra matu, sibawa atuwom-Mu dè' naengka nacappu matu. " 13 Dè' naengka nakkeda makkuwaè Allataala muwi lao ri malaèka'è, "Tudanno ri seddè atauk-Ku, narapi Uwèbbu sining balimmu tunru' ri iko. " 14 Rèkko makkuwaitu, aga sitongenna iyaro sining malaèka'è? Mennang iyanaritu roh-roh iya tumaningiyèngngi Allataala, sibawa iya risuroè untu' tulungngi sining tau iya maèloè tarima asalamakeng.
