1 Saudara-saudara! Rèkko sèddiè tau ripolèiwi pogau' sèddi dosa, sitinajako iya tuwoè manuru' Rohna Allataala, pimpingngi iyaro tauwè lisu ri laleng iya tongengngè. Iyakiya harusu'ko pogau'i iyaro sibawa malemma, sibawa jagaiwi aja' narapii alèmmu rigodato. 2 Sitinajako sisullè sibantu tanggungngi tiwina tauwè, kuwammengngi nassabariwi muturusiwi parèntana Kristus. 3 Rèkko sèddiè tau nasengngi alèna penting, padahal dè', iyaro tauwè alèna muto nabellè. 4 Tungke' tau harusu'i parèssai alèna makessigga ampè-ampèna iyarè'ga dè'. Rèkko makessingngi, weddingngi marasa mabangka ri gau'èro. Iyakiya dè' naparelluna napasibanding sibawa aga iya napogau'è tau laingngè. 5 Saba' tungke' tau harusu'i mèssangngi tanggung jawa'na. 6 Tau iya tarimaèngngi pappagguruwanna Kristus, sitinajai mabbagè sibawa gurunna sininna iya makessingngè iya engkaè ri alèna. 7 Aja' muribengnguwang. Dè' nawedding riyacculè-culèi Allataala! Aga ritaneng, iyanaritu riduppa. 8 Rèkko mattanengngi tauwè situru sipa' tolinona, naduppai matu amatèngngè polè ri sipa'naro. Iyakiya rèkko mattanengngi manuru Rohna Allataala, naduppai matu atuwong tongengngè iya mannennungengngè polè ri Rohna Allataala. 9 Rimakkuwannanaro, aja' tacau pogau'i gau'-gau' iya makessingngè; saba' rèkko dè' tappèsau pogau'i gau'-gau'èro sèuwa wettu riduppai matu wassèlè'na. 10 Jaji, ri wettu engkana mupa wettutta, sitinajaki pogau'i makessingngè lao ri sininna tauwè, lebbi-lebbipi lao ri Saudara-saudarata iya siyatepperengngè. 11 Pènessaiwi madècèd-dècèng iyaè bagiyangngè iya alèkuè mokii sibawa hurupu' iya battowaè! 12 Sining tau iya maèloè pakatanrèi alèna sibawa gau'-gau' mallahèrengngè, mennang ritu makkuraga passako maccowèriwi peraturanna sunna'è. Iyakiya napogau'i mennang gau'èro banna kuwammengngi nadè' mennang naricalla ri tau Yahudiè nasaba sallina Kristus. 13 Muwi sining tau iya maccowèriyèngngi peraturang sunna'è dè'to napajoppai hukkunna agamaè. Iyakiya naèloriwi mennang risunna'ko, kuwammengngi naullèi mennang mammingkikengngi makkedaè muturusiwi iyaro peraturangngè. 14 Iyakiya iyya dè' sises-siseng umaèlo mammingkikengngi muwi aga, ri lainnaè Puwatta Yèsus Kristus iya puraènna matè ri salliè. Saba' mala nakarena amatènna ri salliè, na linoè dè'na agagana bettuwanna ri alèku. Na lao ri linoèwè, muwi iyya samanna matè tona. 15 Risunna iyarè'ga dè' narisunna, dè' napenting iyaro. Iya pentingngè iyanaritu mancaji tolino baru. 16 Untu' sining tau iya tuwoè sibawa atongengengngèwè, sibawa makkuwatoro untu' sininna umma'na Allataala, mammènasaka Allataala mpèrèngngi matu asalèwangeng sibawa pammasèna. 17 Napurairo, aja'na muwi sèddi tau sussaisika, saba' ri watakkalèku engka butti-butti makkedaè ana' gurunnaka Yèsus. 18 Tennapodo Puwatta Yèsus Kristus tuli barakkakiwi Saudara-saudara. Aming. Salama, Paulus
