1 - 2 Iyakiya parellu upattedde: riwettu dè'napa sèddiè ahli warisi' dè'pa naballèrè, engka tau jagaiwi sibawa murusu'i sining apentingenna narapi umuru'na iya ripattentuè ri ambo'na. Rigaukengngi pada-pada sèddiè ata, namuni sitongenna alèna mappunnangiwi sininna waramparangngèro. 3 Makkuwatoro sibawa idi: Riwettu dè'napa taballèrè, ripowataki ri roh-roh iya makuwasaiyèngngi linoèwè. 4 Iyakiya ri wettunna iya teppa'è, nasuroi Allataala Ana'-Na lao ri linoè. Iyaro Ana'-Na rijajiyangngi risèddiè makkunrai sibawa tuwo ri yawana akuwasanna Hukkunna Agamaè. 5 Nanallalengiwiro napaleppe'i sining tau iya tuwoè ri yawana akuwasanna Hukkunna Agamaè; kuwammengngi wedding tokki mancaji ana'-ana'na Allataala. 6 Nasaba iko iyanaritu ana'-ana'na Allataala, nasuroi Allataala Rohna Ana'-Na muttama ri laleng atitta, iyanaritu Roh iya mangobbiè, "Ambo', èh Ambo'-Ku. " 7 Jaji tenniyano ata, sangadinna ana'. Nasaba iko ana' Allataala, Allataala mpèrèkko matu sininna sèuwa-sèuwaè iya napassadiyaè untu' ana'-ana'-Na. 8 Riyolo dè' muwissengngi Allataala, iyanaro saba'na mancajiko ata polè risining akuwasang iya riyangga'è selaku dèwata iyakiya sitongenna tenniya sises-siseng Allataala. 9 Iyakiya makkekkuwangngè muwissenni Allataala, iyarè'ga lebbi coco'i, Allataala missekko. Na magi mumaèlo lisusi ri roh-roh linoèwè, iya malemmaè sibawa kasiyasiè? Magi mumaèlo ripowatasi ri roh-roh-èro? 10 Muramè-ramèiwi esso-esso mattentuè, uleng-uleng mattentuè sibawa taut-taung mattentuè. 11 Bata-bataka, ajakkè turuppuse'ku untu' iko siya-siyai bawang. 12 Saudara-saudara! Uwèllauwi sibawa masero kuwammengngi mumancaji pada-pada iyya. Nasaba pura tokka mancaji pada-pada iko. Dè' agaga mupogau' iya salaè lao ri iyya. 13 Tentu muwèngngerang mupa aga iya nassabariyè pammulanna na uwabbirittangngi iyaro Karèba Madècèngngè lao ri iko. Saba'na iyanaritu nasaba nakennaka lasa. 14 Iyaro wettuè dè' mumaciddi lao ri iyya, namuni watakkalèku sinrupai paccobang iya battowaè lao ri iko. Mala mutarimaka pada-pada tarimai malaèka'na Allataala iyarè'ga tarimai alèna Kristus Yèsus. 15 Masennang senna'ko wettuèro. Iyakiya makkekkuwangngè, kègani iyaro asennangengngè? Uwisseng iyaro wettuè macennikko cukkèi matammu untu' mpèrèkka, rèkko weddingngi ripogau' iyaro. 16 Muwangga'na'ga makkekkuwangngè selaku bali, nasaba upannessai iya tongengngè lao ri iko? 17 Iyaro sining tau laingngè masumange'i sappako, iyakiya akkattana mennang dè' namakessing. Macinnai bawang mennang pettui assisumpungemmu sibawa idi, kuwammengngi namuccowèriwi mennang sibawa masumange'. 18 Mèmeng makessing untu' masumange' ri laleng gau'-gau' iya makessingngè, assaleng tuli makkuwamuwiro sibawa aja' bawang narèkko engkaka sibawakko. 19 Ana'-ana'ku iya riyamasèiyè! Makkekkuwangngèwè manrasa-rasasika nasaba iko. Manrasa-rasaka pada-pada makkunrai mapeddiè wettunna jajiyang ana'. Maèloka matteru-teru manrasa-rasa, rèkko sipa'-sipa'na Kristus dè'pa natattaneng ri alèmu! 20 Muddani senna'ka engka ri tengnga-tengngamu makkekkuwangngè, kuwammengngi weddikka mabbicara lao ri iko sibawa sadda laingngè, nasaba dè'na uwissengngi agana maèlo upogau' lao ri iko! 21 Saudara-saudara iya maèloè tuwo ri yawana akuwasanna hukkung-hukkunna Agamaè, cobai mèngkalingaka! Maèloka powadakko aga sitongenna taroki ri laleng Kitta Hukkunna Musa. 22 Tarokii kuwaro makkedaè Abraham mappunnaiwi duwa ana': Indo'na ana'è sèddiè iyanaritu sèddiwi ata, sibawa indo'na ana'è laingngèro iyanaritu sèddiwi tau maradèka'. 23 Ana'na makkunrai iya mancaji ataè jaji biyasai nasaba èlo tolino. Iyakiya ana'na makkunrai maradèka'è, jajiwi nasaba najjanciyangngi Allataala. 24 Iyaè weddingngi ripakè selaku rapang. Iyaro duwaè makkunrai iyanaritu akkalarapanna duwa assijancingeng: iya sèddiè polè ri Bulu Sinai -- iyanaritu Hagar; ana'-ana'na rijajiyangngi selaku ata. 25 Jaji Hagar iyanaritu Bulu Sinai, ri tana Arab. Pulambangngèngngi kota Yèrusalèm sibawa sininna pabbanuwana iya makkekkuwangngè mancaji atani. 26 Iyakiya Yèrusalèm iya engkaè ri surugaèro iyanaritu Yèrusalèm iya maradèka'è, sibawa alènana iyanaritu indo'ta. 27 Saba' ri laleng Kitta'è tarokii, "Arennuno iko èh makkunrai manangngè, iya dè'è naengka naèmmana! Ariyo-riyono sibawa gora-gorano èh iko iya dè'è naengka napèneddingiwi peddi èmmanakengngè! Saba' makkunrai iya risalaiyè ri lakkainna lolongengngi matu lebbi maèga ana' naiya makkunrai iya silollongngè lakkainna. " 28 Saudara-saudara! Alèmu iyanaritu ana'-ana'na Allataala iya rijajiyangngè nasaba jancinna Allataala; pada-padako Ishak. 29 Iyaro wettuè ana' iya jajiyè manuru èlo tolino, callai ana' iya jajiyè nasaba èlona Rohna Allataala. Makkuwatoro makkekkuwangngè. 30 Iyakiya aga taroki ri laleng Kitta'è? Tarokii kuwaro makkedaè: "Paddèsu'i ata makkunraièro silaong ana'na, saba' ana' polè ri ataèro dè' nancaji matu ahli warisi'na silaong ana' polè ri makkunrai maradèka'èro. " 31 Jaji, Saudara-saudara, idi'è tenniya ana' polè risèddiè ata; idi iyanaritu ana'-ana' polè ri makkunrai maradèka'è.
