1 Seppulo eppa taung ri munrinna, lisuna ri Yèrusalèm sibawa Barnabas, enrengngè tiwi towi Titus. 2 Laoka ri Yèrusalèm saba' Allataala pura pannessai ri iyya makkedaè harusu'ka lao. Na ri laleng sèuwaè addeppu-deppungeng sibawa sining pamimpingngè kuwaro bawang, upakatajangngi Karèba Madècèng iya uwabbirittangngè lao risining tau tenniyaè Yahudi. Saba' dè' umaèlo usahaku riyolo, iyarè'ga makkekkuwangngè siya-siya bawang. 3 Titus iya silaongengngèkka, iyanaritu sèddiwi tau Yunani, iyakiya dè' naripassa maccowèriwi peraturang sunna'è, 4 namuni engka sining tau iya maddessakengngèngngi gau'èro. Mennang iyanaritu sining tau maccelle'è ri laleng golongetta sibawa mallarikkodo selaku saudara. Muttama'i mennang sibawa mammekko-mekko untu' salidikiwi alaluwasang iya engkaè ri idi nasaba massèddiki sibawa Kristus Yèsus. Maèloi mennang palisuki ri laleng keadaang bunge'-bunge'na selaku ata, 5 iyakiya dè' tamanyera muwi cèddè lao ri mennang, nasaba maèloki jagaiwi kuwammengngi iyaro Karèba Madècèngngè tette'i tulèng untu' iko. 6 Namuni makkuwaro, dè'gaga gau'-gau' baru iya natuntu'è polè ri iyya risining tau iya nangga'è riyakkitangi -- untu' alèku dè'gaga sisalana rèkko riyakkitangiwi mennang iyarè'ga dè', saba' Allataala dè' nakkita tappa. 7 Sibalè'na, sining tau iya riyangga' riyakkitangiyèro nangakui makkedaè Allataala pura suroka untu' mabbirittangngi Karèba Madècèngngè lao risining tau tenniyaè Yahudi; pada-pada pura nasurona Pètrus untu' mabbirittangngi Karèba Madècèngngèro lao ri tau Yahudiè. 8 Saba' Allataala mabbèrèyangngi lao ri Pètrus amampungeng untu' mancaji rasulna sining tau Yahudiè, mpèrèng tokka amampungeng untu' mancaji rasulna sining tau tenniyaè Yahudi. 9 Yakobus, Pètrus sibawa Yohanès, iya riitaè mancaji sining pamimpinna jema'è, nangakui makkedaè Allataala pura mpèrèkka jama-jamang dè'è padannaè. Najjama'na mennang sibawa Barnabas enrengngè iyya selaku tanrang assisellaongeng. Nainappa mennang sibawa idi risitujuini makkedaè majjamaki matu ri yelle'na bangsa-bangsa iya tenniyaè Yahudi, na mennang ri yelle'na tau Yahudiè. 10 Sèddi-sèddinna parèllaunna mennang iyanaritu kuwammengngi narijampangi tau kasiyasiè. Na iyya mala masennang pogau'i iyaro gau'è. 11 Wettunna Pètrus lao ri Antiokhia, uwèwai sibawa uwappita-pitang, nasaba salai tindakanna. 12 Bunge'-bunge'na tudangngi manrè sisama sibawa Saudara-saudara iya tenniyaè Yahudi. Iyakiya wettunna lettu sining tau nasuroè Yakobus, napabèlai alèna polè ri Saudara-saudara tenniyaè Yahudi sibawa dè' namaèlona manrè sibawa mennang, saba mètaui lao risining tau iya mèloriyèngngi risunna sining tauwè. 13 Saudara-saudara Yahudiè iya laingngè maccowè towi munapè' pada-pada Pètrus, angkanna muwi Barnabas tappangaruto untu' kèdo-kèdo pada-pada mennang. 14 Uwitanaro makkedaè dè' nappallolongeng mennang situru atongengenna Karèba Madècèngngèro, makkedana lao ri Pètrus ri yolona sininna tau iya hadèrè'è kuwaro, "Rèkko Sudara selaku tau Yahudi purano tuwo pada-pada tau tenniyaè Yahudi, magi Sudara makkekkuwangngè namaèlo passai sining tau laingngè tuwo pada-pada tau Yahudiè?" 15 Mèmeng manuru' ajajiyang, idi iyanaritu tau Yahudi sibawa tenniya "tau tenniyaè Yahudi iya madosaè". 16 Namuni makkuwaro riissengngi makkedaè simadècèngengngi paimeng tauwè sibawa Allataala banna nasaba teppe' lao ri Yèsus Kristus, sibawa tenniya nasaba pajoppai Hukkunna Agamaè. Alèta paimeng mateppe' lao ri Yèsus Kristus, kuwammengngi tasimadècèngeng sibawa Allataala naolai teppe'taro, tenniya nasaba tapajoppai Hukkunna Agamaè. Saba' ri laleng ripajoppana Hukkunna Agamaè, dè' muwi sèddi tau simadècèngeng paimeng sibawa Allataala. 17 Makkuragaki simadècèngeng paimeng sibawa Allataala naolai tuwoè massèddi sibawa Kristus. Iyakiya rèkko purani ripogau' iya makkuwaèro, manessani idi "sining tau madosa" mupa pada-padato sining tau tenniyaè Yahudi, aga iyaè bettuwanna makkedaè Kristus ritu nassabariki madosa? Tentu dè'! 18 Rèkko mappammulaka patettongngi paimeng bentu'na Hukkunna Agamaè iya puraè uruttung, nauwappaitangngi makkedaè mancajika iya majjalèkkaiyèngngi hukkungngè. 19 Iyakiya matèna lao ri Hukkunna Agamaè -- hukkung-hukkungngè mutoro mpunoi -- kuwammengngi uwullèi tuwo untu' Allataala. Purana risalli silaong Kristus. 20 Makkekkuwangngè tenniyana iyya tuwo, iyakiya Kristus iya tuwoè ri laleng alèku. Atuwongngèwè iya uwattemmekiyè makkekkuwangngè iyanaritu tuwo ri laleng teppe' lao ri Ana'na Allataala iya mamasèiyèkka sibawa iya puraè makkarobangngi Alèna untu' iyya. 21 Dè' upakariyawai pammasèna Allataala. Rèkko assisumpungenna tauwè sibawa Allataala simadècèngengngi paimeng nasaba napajoppai Hukkunna Agamaè, bettuwanna iyaro amatènna Kristus dè'gaga gunana!
