1 - 3 Saudara-saudara jema'-jema'è ri daèrana Galatia. Iyya Paulus, sibawa sininna saudara Kristèng iya sibawaè iyya kuwaè, mammènasa tennapodo Allataala Ambo'ta sibawa Puwang Yèsus Kristus mabbèrè barakka sibawa asalèwangeng lao ri iko. Mancaji rasulka tenniya lantarang tolino iyarè'ga nasaba riyakka ri tolinoè, sangadinna Yèsus Kristus sibawa Allataala Ambo'ta iya puraè Patuwoi paimeng polè ri amatèngngè. 4 Mapatoiwi èlona Allataala Ambo'ta, Kristus mabbèrèyangngi Alèna mancaji akkarobangeng untu' dosa-dosata, kuwammengngi Naripassalama'ki polè ri wettu iya majaèwè. 5 Ripojiwi Allataala mannennungeng! Aming. 6 Hèrakka passalenna Saudara-saudara! Riyobbiko ri Allataala nasaba pammasèna Kristus, iyakiya makkekkuwangngè masitta wèggakko mabbokoriwi Allataala sibawa maccowèriwi "karèba madècèng" iya laingngè naiya Karèba Madècèng iya polè ri Allataala. 7 Sitongenna dè'gaga "karèba madècèng iya laingngè". Banna engka sining tau iya mabbirittangngèngngi lao ri iko "karèba madècèng" passalenna Kristus iya naputara'balè'è mennang angkanna napakacauko. 8 Tau iya mabbirittangngèngngi "karèba madècèng" iya laingngè naiya Karèba Madècèng iya puraè riyabbirittang, leppessanni rihukkung ri Allataala -- namuni iyaro tauwè idi muto iyarè'ga malaèka' polè ri surugaè. 9 Purani tapowada riyolo, makkekkuwangngè upowadai siseppa: Tau iya mabbirittangngèngngi lao ri iko "karèba madècèng" iya laingngè naiya Karèba Madècèng iya puraè mutarima polè ri idi, iyaro tauwè sitinajai rihukkung ri Allataala. 10 Aga nassabariro paitaka samanna mammènasa riakui ri tolinoè? Dè' sises-siseng! Banna mammènasaka riakui ri Allataala. Makkuragaka'ga malai atinna tolinoè kuwammengngi nariètauri ri tauwè? Rèkko upogau' mupi makkuwaèro, tenniyaka atanna Kristus. 11 Harusu'i naisseng Saudara-saudara makkedaè Karèba Madècèng iya uwabbirittangngèro dè' napolè ri tolinoè. 12 Dè' utarimai iyaro karèbaè polè ri tolinoè, sibawa dè'to muwi sèddi tau iya mappagguruwangngèngngi lao ri iyya. Yèsus Kristus muto ritu iya pallessuèngngi lise'na Karèba Madècèngngèro polè ri iyya. 13 Tentu purani muwèngkalinga passalenna atuwo-tuwokku riyolo selaku sèddi paggama Yahudi. Muwisseng pèkkugi pèddaraku gaukengngi jema'na Allataala sibawa pèkkugi tedde'ku makkuraga mancuru'i. 14 Ri laleng pajoppai agama Yahudiè, upakacauriwi maègangngèngngi tau Yahudi iya uwèwaè sippangka. Masumange' senna'ka ri laleng gau'-gau' passalenna ade'na nènè-nènèta. 15 Iyakiya nasaba akessingeng atinna Allataala, napilèka ri wettu dè'napa ujaji enrengngè mobbika untu' tumaningiwi. 16 Allataala mappaddissengengngi Ana'-Na lao ri iyya kuwammengngi Karèba Madècèngngè passalenna Ana'-Na weddingngi uwabbirittang lao risining tau tenniyaè Yahudi. Iyaro wettuè dè' ulao muwi risèddiè tau untu' mèllau pangaja. 17 Dè'to ulao risining tauwè ri Yèrusalèm iya lebbi mariyoloè na iyya mancaji rasul. Iyakiya laoka ri wanuwa Arab, nainappa polè kuwaro lisusi ri Damsyik. 18 Telluttaung ri munrinna, lisuka ri Yèrusalèm untu' sisseng sibawa Pètrus. Monroka sibawa alèna seppulo lima esso bawang ittana. 19 Dè' usiruntu sibawa rasul-rasul iya laingngè, sangadinna Yakobus, silessurenna Puwangngè. 20 Aga iya uwokièwè tongeng. Naisseng Allataala sibawa dè' uwabbellè. 21 Purairo laoka ri daèra-daèra ri Siria sibawa Kilikia. 22 Narapi iyaro wettuè jema'-jema' Kristèngngè ri Yudèa dè'pa naissekka secara langsung. 23 Naèngkalingami bawang mennang tauwè makkeda, "Tau iya cellaèkki riyolo, makkekkuwangngè nabbirittangngi atepperengngè iya maèloè ripallennye' riyolo. " 24 Nanapojini mennang Allataala nasaba iyya.
