1 Iyanaro saba'na iyya -- sèddiwi tahanang, iya ritahangngè nasaba tumaningiwi Puwangngè -- mèllauwi sibawa masero ri iko: tuwono situru tudangemmu selaku tau iya puraè riyobbi ri Allataala. 2 Sitinajako tuli mariyawa ati, malemma kininnawa, sibawa sabbara. Appaitangngi pammasèmu ri laleng bantui sèddiè lao ri laingngè. 3 Akkuragano tonget-tongeng untu' tuwo sibawa damè kuwammengngi assèddiyang iya napakangkaè Rohna Allataala tette'i tappiyara. 4 Banna sèddi bawang tubu, sibawa sèddi Roh. Makkuwatoro riyobbiko untu' sèddi ammènasang iya padaè. 5 Banna sèddi bawang Puwang, sèddi teppe', sèddi acemmèng, 6 sibawa sèddi Allataala iya mancajiyè Ambo'na sininna tauwè. Alèna ritu Puwanna sininna alangngè, iya majjamaè naolai iya manenna, sibawa makuwasa ri laleng iya manenna. 7 Tungke'-tungke'ki tarima sèddi pabbèrè situru aga iya nabbèrèyangngè Kristus. 8 Ri laleng Kitta'è tarokii: "Wettunna mènrè'i ri onrong iya kaminang matanrè, tiwii maèga tawangeng, sibawa mabbèrèi pabbèrè-pabbèrè lao ri tolinoè. " 9 Nah, rèkko ripowadai "mènrè'i" bettuwanna mula-mulanna purani nonno lettu ri onrong iya kaminang mariyawaè ri linoèwè. 10 Na iya puraè nonno, Alènato ritu iya mènrè'è lettu ri onrong iya mabèlaè lebbi tanrè naiya sininna langiè angkanna sininna alangngè rilisekiwi sibawa ahadèrèken-Na. 11 Alèna ritu iya "mabbèrè pabbèrè-pabbèrè lao ri tolinoè"; sibagiyang nakka mancaji rasul, iya laingngè mancaji nabi; iya laingngèssi mancaji pabbiritta Karèba Madècèngngèro, na laingngèssi nakkai mancaji guru-guru sibawa pappiyarana jema'è. 12 Napogau'i iyaè kuwammengngi umma'na Allataala ripassakke tongengngi kuwammengngi naullèi tumaningi Puwangngè sibawa patettongngi tubunna Kristus. 13 Nanallalengiro mancaji sèddi manekki nasaba teppe' iya padaè sibawa pappahang iya padaè passalenna Ana'na Allataala. Sibawa mancajiki sining tau iya ballèrè'ènna iya pèdè' maittaè pèdè' sukku pada-pada Kristus. 14 Na dè'na tancaji ana'-ana'na iya kalèwa'-kalèwa'è sibawa iya kacowè-cowèè ritiwi ri pangarunna maddupa-rupang pappagguruwang polè risining tau iya maccaè. Napapusai mennang tauwè sibawa bellèna. 15 Dè'! Sibalè'na harusu'ki powadai sibawa ati penno pammasè, angkanna ri laleng sininna gau'è pèdè' maittaki pèdè' mancaji sukkuki pada-pada Kristus, iya mancajiyè Ulutta. 16 Ri yawa pappimpin-Na, sininna anggota tubuè tassusungngi makessing, sibawa sisullè ripasisumpung ri padduppa-padduppan-Na tungke'-tungke'. Sibawa rèkko tungke'-tungke' iyaro anggotaè majjamai pada-pada sitongennaè, sininna iyaro tubuè mpekke'i matu mancaji battowa sibawa mawatang naolai pammasè. 17 Rimakkuwannanaro nasaba asenna Puwangngè, iyanaè upowada matu sibawa pattedde'i: aja'na mutuwo pada-pada sining tau iya dè'è naissengngi Allataala, sibawa pikkiri'i anu dè'è. 18 Mapettanni pikkiranna mennang. Dè' napahangngi mennang atuwong iya nabbèrèyangngè Allataala, saba' dè' sises-siseng mennang nappunnai pangissengeng agaga passalenna Allataala. Makkuwairo mennang, nasaba matedde atiwi. 19 Dè'na nappunnai mennang perasaang masirina, angkanna naccowèriwi mennang sininna hawa napessunna, sibawa tuwo mappangaddi sièlo atinna. 20 Iyakiya Kristus Yèsus iya muwissengngè dè' nakkuwaro! 21 Purani muwèngkalinga passalenna Alèna! Na selaku sining tau maccowèriyèngngi, pura tono ripagguru passalenna sipa-sipa'na Allataala iya engkaè ri Alèna! 22 Rimakkuwannanaro ludunni rupa tau malaungngè sibawa cara-cara atuwong malaungngè iya mattengngangngè risolangi risining cinnana iya mappapusaè. 23 Sitinajako ati sibawa pikkirammu ripakabarui manengngi. 24 Sitinajako tuwo selaku rupa tau mabaru iya ripancajiyè situru èlona Allataala; iyanaritu ampè-ampè iya tongengngè, malempu sibawa mapaccing. 25 Rimakkuwannanaro Saudara-saudara iya maneng, aja'na muwabbellè. Alempuno lao ri laingngè, saba' idi manengngè iyanaritu pada-padaki anggota tubunna Kristus. 26 Rèkko macaiko, aja' muleppessangngi iyaro caimu nassabariko madosa. Aja' mumacai puppu esso, 27 kuwammengngi dè' nalolongeng kasempatang Ibillisi'. 28 Tau iya biyasaè mènnau harusu'i mappèsau mènnau. Sibalè'na harusu'i majjama kuwammengngi lolongengngi dallè sibawa malempu enrengngè naullèi tulungngi tau iya akurangengngè. 29 Rèkko mabbicarako, aja' mupakèi ada-ada iya majaè. Pakèi bawanni ada-ada iya mappèdècèngngè sibawa mabbèrè pattulung lao ri tau laingngè. Ada-ada pada-padaèro mappapolèi matu adècèngeng risining tau iya mèngkalingaèngngi. 30 Aja' mupamessèiwi atinna Rohna Allataala. Purani rimatèrèiko sibawa Roh, mancaji appunnangenna Allataala. Iyaro Roh-è sinrupa towi boro' makkedaè Esso Aleppekengngè polèi matu ri iko. 31 Patteddènni sininna perasaang mapeddi atiè, maèlo makkabale sibawa macai. Aja'na mugora-gora sibawa makkarodda-karodda. Aja'na naengka perasaang paccèccè iyarè'ga perasaang laing pada-padaèro. 32 Sibalè'na, sitinajako makessing ati sibawa mapparessè babuwa sèddiè lao ri laingngè, sibawa sisullè siyaddampengeng pada-padato Allataala maddampengekko naolai Kristus.
