1 Riyolo matèko secara rohani nasaba madosako sibawa majjalèkkaiwi parènta-parèntana Allataala. 2 Iyaro wettuè muwaccowèriwi sining abiyasanna linoèwè; bettuwanna matinuluko lao ri panguwasana langi marajaè iyanaritu roh iya makuwasaiyèngngi makkekkuwangngè atinna sining tau iya dè'è namatinulu lao ri Allataala. 3 Riyolo pada-pada maneng tokki sibawa mennang; tuwoki situru kèdo-kèdo tolinota sibawa pogau'i aga iya sennangiyèngngi watakkalè sibawa pikkiratta. Iyaro wettuè idi'na iyanaritu sining tau iya nakennaètto caina Allataala, pada-pada sining tau laingngè. 4 Iyakiya temmaka loppona asèmpo atinna Allataala! Makkuwa mani Namasèitta, 5 angkanna matè mupi' secara rohani nasaba sining pelanggaratta, Napatuwoki paimeng silaong Kristus. Jaji banna nasaba akessingeng atinna Allataala, naripassalama'ko ri Alèna. 6 Nasaba massèddiki sibawa Kristus Yèsus, Allataala patuwoki paimeng silaong Alèna, kuwammengngi mapparènta tokki silaong Alèna ri laleng surugaè. 7 Napogau'i Allataala iyaro kuwammengngi na ri wettu iya mangoloè, naullèi mitai tolinoè temmaka loppona pammasèna Allataala. Iyaro pammasè napannessai Allataala naolai akessingeng atin-Na lao ri idi ri laleng Kristus Yèsus. 8 - 9 Allataala mamasèiko, iyanaro saba'na napassalama'ko nasaba mateppe'ko lao ri Yèsus. Iyaro asalamakemmu tenniya wassèlè' usahamu muto. Iyaro pammasènai ritu Allataala. Jaji dè'gaga sèddi tau mullèi mattempowangngi alèna passalenna gau'èro. 10 Idi iyanaritu winrunaki Allataala, nanaolai Kristus Yèsus, nabentu'ki Allataala kuwammengngi naripogau' gau'-gau' iya makessingngè iya puraè napassadiyangekki. 11 Saudara-saudara tenniyaè tau Yahudi! Engngerangngi keadaammu wettu riyolo: Riteppuko "tau tenrisunna", ri tau Yahudiè iya mangakuè risunna (akkattana iya lolongengngènnaè tanrang iya naèbbuè tolinoè ri tubunna). 12 Iyaro wettuè dè' muwassèddi sibawa Kristus, tau polè-polèko iya dè'è nauttama umma' napilèna Allataala. Dè' namumattama ri laleng assisiyoreng assijancingngè iya naèbbuè Allataala sibawa umma'-Na. Tuwoko ri laleng linoèwè temmaddennuwang sibawa temmakkè Allataala. 13 Iyakiya makkekkuwangngè, nasaba massèddiko sibawa Kristus Yèsus, iko iya mabèlaè riyolo, ripacawèkini nasaba amatènna Kristus. 14 Saba' Kristus muto iyanaritu pappasidamèta. Napassèddiwi sining tau Yahudiè mancaji sèddi bangsa. Tèmbo' pallawangenna mennang, iyanaritu assimusurengngè purani nancuru' Kristus ri laleng nakkarobangenna Alèna. 15 Hukkunna Agama Yahudiè sibawa parènta-parèntaè enrengngè sining peraturanna purani riledda ri Kristus kuwammengngi iyaro duwaè bangsa mancaji sèddiwi bangsa rupa tau baru, iya massèddiè sibawa Alèna. Nasibawang caraè ritu napakangkai Kristus assidamèngengngè. 16 Nasaba amatèn-Na ri salliè, Kristus passèddiwi iya duwaèro bangsaè, sibawa pasidamèi mennang sibawa Allataala, angkanna lennye'ni assimusurengngèro. 17 Iyanaro saba'na napolè Kristus untu' mabbirittangngi Karèba Madècèngngè passalenna assidamèngengngèro lao ri iko; muwi lao ri iko tenniyaè Yahudi iya mabèlaè riyolo polè ri Allataala, iyarè'ga lao ri tau Yahudiè iya macawè'è ri Allataala. 18 Naolai Kristus, idi maneng -- muwi tau Yahudi iyarè'ga tau tenniyaè Yahudi -- polè ri Rohna Allataala iya sèddiè, weddingngi maddeppèriwi Ambo'è. 19 Rimakkuwannanaro, dè'na namumuttama tau polè-polè iyarè'ga tau saliweng. Iko makkekkuwangngè iyanaritu pada-padai wargana umma'na Allataala. Iko iyanaritu anggota-anggota kaluwarganai Allataala. 20 Ripatettong tokko ri yasè'na tettongeng iya napalènne'è rasul-rasul-è sibawa nabi-nabiè, sibawa Kristus Yèsus mancaji batu iya kaminang poko'è. 21 Alèna ritu susungngi sininna bolaèro mancaji Bolana Allataala iya ripallaingngè untu' Puwangngè. 22 Nasaba tuwo massèddiwi sibawa Kristus, mattengngang tokko ripatettong silaong sining tau laingngè mancaji sèddi bola untu' Allataala; kuwaniro Allataala monro sibawa Roh-Na.
