1 Umma'na Allataala ri Efèsus, iya matinuluè lao ri Kristus Yèsus! 2 Iyya, Paulus, surona Kristus Yèsus nasaba èlona Allataala, mammènasa tennapodo Allataala Ambo'ta sibawa Puwang Yèsus Kristus mabbèrè barakka sibawa asalèwangeng lao ri iko. 3 Ripojiwi Allataala, Ambo'na Puwatta Yèsus Kristus! Nabarakkakiki sibawa sininna barakka rohaniè ri laleng surugaè, nasaba massèddiki sibawa Kristus. 4 Riwettu dè'napa naripancaji linoèwè, purani napilè Allataala naolai Yèsus Kristus sibawa akkatta kuwammengngi mancajiki appunnangen-Na bawang sibawa dè'gaga cellana ri yolo-Na. ri yolo-Na. Nasaba pammasèna Allataala, na Alèna: Nasaba pammasèna Allataala, 5 napurani Napattentu lebbi riyolo sibawa naolai Yèsus Kristus, Nakkaki untu' mancaji ana'-ana'-Na muto. Na mèmeng iyanaro macinna Napogau'. 6 Ripojiwi Allataala iya marajaè nasaba naolai Ana'-Na iya naèloriyè, Nanamasèi senna'ki. 7 Saba' amatènna Kristus, napaleppe'ki Allataala, bettuwanna puraki Naddampengeng polè ri dosa-dosata. 8 Napogau'i iyaro nasaba Namasèi senna'ki. Na iyaro pammasè purani nabbèrèyang lao ri idi sibawa penno apanrèng enrengngè pappèjeppu. 9 Manuru èlo-Na muto, Allataala mappaddissengengngi lao ri idi rahasiya-Na rancana-Na; purani Napettui makkedaè iyaro rancana-Na napattèpui matu naolai Kristus. 10 Iyaro rancanana iyanaritu muwi ri surugaè iyarè'ga ri linoè, mancaji sèddiwi sibawa Kristus selaku Kapala. Na iyaro gau'è napattèpui matu Allataala rèkko narapini wettunna. 11 Najamai Allataala sininna sèuwa-sèuwaè manuru èlo-Na sibawa apettun-Na muto. Mappummulai pammulanna puraki Napilè saba' macinnai kuwammengngi mancajiki umma'-Na nasaba massèddiki sibawa Kristus. 12 Leppessakki, iya bunge'-bunge'è mammènasa ri Kristus, pojiwi Allataala nasaba arajan-Na! 13 Mancaji tono umma'na Allataala wettummu mèngkalingai pasenna Allataala, iyanaritu Karèba Madècèng iya mabbèrè asalamakeng lao ri iko. Mateppe'ko ri Yèsus Kristus, na iyanaro saba'na nabbèrèyangngi Allataala tanrang appunnangen-Na lao ri iko, iyanaritu Rohna iya Najjanciyangngè. 14 Roh-ènna ritu boro' makkedaè tarimaki matu aga iya puraè najjanciyang Allataala lao ri umma'-Na. Iyanaè mpèrèkki ateppereng makkedaè Allataala paleppe'i matu umma'-Na. Ripojiwi Allataala nasaba arajan-Na! 15 Rimakkuwannanaro, sipongenna uwèngkalinga makkedaè mateppe'ko lao ri Puwang Yèsus, sibawa muwamasèiwi sininna umma'na Allataala, 16 dè' appettunna mattarima kasi'ka ri Allataala passalemmu. Tuli uteppui asemmu wettukku massempajang. 17 Uwèllauwi kuwammengngi Allataalana Puwatta Yèsus Kristus, Ambo' iya malebbiè, mabbèrèyangngi Rohna lao ri iko. Iyaro Roh-è napancajiko mapanrè, sibawa napannessai matu Allataala lao ri iko kuwammengngi muwissengngi Alèna. 18 Uwèllauwi kuwammengngi Allataala timpa'i pikkirammu angkanna macakka; kuwammengngi mupahangngi aga wedding muwammènasai polè ri Allataala iya mobbièkko. Makkuwatoro kuwammengngi muwissengngi pèkkugi tabbollonna barakka-barakka iya magelloè iya napassadiyaè Allataala untu' umma'-Na; 19 napèkkugi hèba'na Allataala majjama sibawa sukku akuwasan-Na ri laleng idi iya mateppe'è. Iyaro akuwasanna Allataala pada-padai akuwasang iya dè'è padan-Na 20 iya Napakè wettunna napatuwo paimeng Kristus polè ri amatèngngè sibawa mpèrèngngi Alèna tudangeng kaminang matanrè silaong Allataala ri surugaè. 21 Iyaro tudangenna Kristus mabèlai lebbi matanrè naiya tudangenna sininna pamarèntaè, sininna tau makuwasaè, sininna pamimpingngè, sininna bapa'-bapa'è sibawa muwi nigi-nigi iya puraè riwèrèng tudangeng matanrè muwi iya tuwoè ri wettuèwè iyarè'ga iya tuwoè ri wettu mangoloè. 22 Napatunru manengngi Allataala ri yawa akuwasanna Kristus, sibawa mabbèrèyangngi Kristus lao ri jema'è selaku Kapala polè ri sininna sèuwa-sèuwaè. 23 Jema'è iyanaritu tubunna Kristus, ripassukkui ri Alèna iya passukkuèngngi sininna sèuwa-sèuwaè muwi kègi.
