1 Purano ripatuwo paimeng silaong Kristus. Rimakkuwannanaro harusu'ko makkuraga untu' lolongengngi gau'-gau' iya engkaè ri surugaè, kègi Kristus tudang ri seddè ataunna Allataala. 2 Pattujui pikkirammu ri gau'-gau'è kuwaro, aja' na ri gau'-gau' iya engkaè ri linoè. 3 Saba matèko, na atuwommu tassubbui silaong Kristus ri laleng Allataala. 4 Nah, assalenna atuwommu iya tongengngè iyanaritu Kristus sibawa rèkko paitai matti malluru tokko matu silaong alèna ri laleng arajan-Na! 5 Rimakkuwannanaro, pammatèni sining cinna linoè iya madduppèluriyèngngi alèmu, padaènna mappangaddi, gau'-gau' iya dè'è nasipato, hawa napessu, pangèloreng iya majaè, sibawa angowangngè (nasaba angowangngè sinrupai massompaè barahala). 6 Gau'-gau' sinrupaèro paènrè'i caina Allataala lao risining tau iya dè'è natinuluriwi. 7 Riyolo muturusi towi iyaro sining pangèlorengngè, wettummu rikuwasai ri alèna. 8 Iyakiya makkekkuwangngè sitinajako mabbèyangngi gau'-gau' iya majaè polè ri alèmu; aja'na mumacai iyarè'ga majjallo, iyarè'ga mappunnai perasaang benci lao ri tau laingngè. Aja' sises-siseng nassu polè ri tèmummu ada-ada makkaroddaiyèngngi tauwè iyarè'ga ada-ada macarèpaè. 9 Aja' muwabbellè sèddiè lao ri laingngè, saba' atuwong pura labe'è sibawa sininna sipa'na purani muleppessang. 10 Makkekkuwangngè purako riwèrèng atuwong iya mabaruè. Iko iyanaritu tolino baru, iya mattengngangngè ripakabarui matteru-teru ri Pappancajinna, iyanaritu Allataala, situru rupan-Na muto. Akkattana iyanaritu kuwammengngi muwissengngi Allataala sibawa sukku. 11 Selaku addimonrinna iyaro lennye'i sininna assilaingenna tau Yahudiè sibawa tenniyaè Yahudi, tau risunna'è sibawa tau dè'è narisunna, dè'na gaga assilaingenna tau polè-polè sibawa tau dè'è nakkèyampè, ataè sibawa tau maradèka'è, saba' Kristus iyanaritu sini-sininnaè enrengngè massèddiwi sibawa sininna mennang! 12 Saudara iyanaritu umma'na Allataala, Allataala mamasèiko sibawa pilèko untu' mancaji appunnangen-Na iya napallaingngè. Iyanaro saba'na na harusu'ko mappaitangngi paressè babuwaè, harusu'ko makessing ati, pakariyawai atimmu, malemma kininnawa, sibawa tahang manrasa-rasa. 13 Harusu'ko sabbara sèddiè lao ri laingngè, sibawa sisullè siyaddampengeng rèkko engka maèlo makkabale lao ri laingngè. Masennangngi atinna Puwangngè maddampengengngekko, jaji harusu tokko maèlo maddampengengngi sèddiè sibawa laingngè. 14 Iya kaminang pentingngè iyanaritu: Harusu'ko siyamasèi saba' pammasè ritu passèddi manengngi Saudara-saudara angkanna mancaji sukku. 15 Sitinajai sining apettummu ripattentui ri adamèngeng iya nabbèrèyangngè Kristus ri laleng atimmu. Saba' Allataala mobbiko untu' mancaji anggota sèddi tubu, kuwammengngi mutuwo ri laleng adamèngeng polè ri Kristusro. Sitinajako mattarima kasi. 16 Sitinajai sining pappagguruwanna Kristus mattemme ri laleng atimmu iya pennoè barakka. Sitinajako sisullè sipagguru sibawa sisullè sipangajari iya kaminang makessingngè. Puwèlonni Mazmur-è sibawa poji-pojiyangngè enrengngè èlokkèlong rohaniè; akkèlonno untu' Allataala sibawa perasaang sukkuru' ri laleng atimmu. 17 Sininna aga iya mupogau'è iyarè'ga mupowadaè, harusu'i iyaro ripogau' sibawa ripowada untu' asenna Puwang Yèsus. Sukkuru' lao ri Allataala Ambo'è untu' aga iya napogau'è Yèsus lao ri iko. 18 Saudara-saudara iya mancaji bainè! Atinuluno lao ri lakkaimmu, saba' harusu'i makkuwaro kèdo-kèdo'mu selaku tau Kristèng. 19 Saudara-saudara iya mancaji lakkaiè! Amasèiwi bainèmu. Aja' mumakassara' lao ri mennang. 20 Ana'-ana'! Kewajibammu iyanaritu selaku tau Kristèng untu' matinulu lao ri ambo' indo'è, nasaba iyanaro pèsennangiwi atinna Allataala. 21 Saudara-saudara iya mancaji ambo'è! Aja' mupeddiriwi atinna ana'-ana'mu angkanna pettu paddennuwangngi mennang. 22 Saudara-saudara iya mancaji ataè! Ri laleng sininna passalengngè sitinajako matinulu lao ri puwammu ri linoèwè. Aja' mumatinulu lao ri mennang banna ri wettunna mennang jagaiko, nasaba macinnako ripoji. Atinuluriwi mennang sibawa ati iya matinuluè, nasaba mupakalebbii Puwangngè. 23 Muwi jama-jamang aga riwèrèkko, sitinajako sibawa sukku atimmu pada-pada rèkko samanna Puwangngè ritu mutumaningi na tenniya bawang tolinoè. 24 Engngerangngi makkedaè tarimako matu appalang polè ri Puwangngè. Aga iya napassadiyaè Puwangngè untu' umma'-Na, iyanaritu riwèrèkko matu. Saba' puwang iya sitongennaè mutumaningi iyanaritu Alèna Kristus. 25 Na muwi niga iya pogau'è asalang, natanggungngi matu iyaro sining asalanna; nasaba dè' nappasilaingeng Puwangngè.
