1 - 2 Saudara-saudara umma'na Allataala ri Kolosè iya matinuluè massèddi sibawa Kristus! Selaku rasulna Kristus Yèsus, -- iya nakkaè Allataala -- iyya, Paulus, silaong Saudarata Timotius, mammènasa tennapodo Allataala Ambo'ta mabbèrè barakka sibawa asalèwangeng lao ri iko. 3 - 4 Purani riyèngkalinga makkedaè mateppe'ko lao ri Yèsus Kristus sibawa muwamasèi manenna umma'na Allataala. Iyanaro saba'na wettutta massempajangekko, tuli mattarima kasi'ki lao ri Allataala, Ambo'na Puwatta Yèsus Kristus. 5 Mateppe'ko sibawa mamasèko, saba' mammènasako ri aga iya napassadiyaè Allataala ri surugaè untu' iko. Purani muwèngkalinga passalenna gau'èro, wettunna Karèba Madècèng tongengngè iya polè ri Allataala ripalettu lao ri iko. 6 Iyaro karèba polè ri Allataala mallebbanni lao ri sininna linoè sibawa atuwonna tauwè matterui ribarakkaki ri karèbaèro, pada-pada muto atuwommu ribarakkakiwi mappammulai wettunna muwèngkalinga passalenna pammasèna Allataala sibawa tonget-tongengngi nattemmekinna. 7 Iyaro gau'è napalettu'i Epafras lao ri Saudara, sellao iya riyamasèiyè. Alèna ritu pajjamana Kristus iya matinuluè majjama untu' apentingetta. 8 Polè ri alènai ritu riyèngkalingai makkedaè nasibawang Rohna Allataala muwullèi siyamasèyang. 9 Iyanaro saba'na natuli massempajakki untu' iko sipongenna riyèngkalinga passalemmu. Riyèllauwi ri Allataala kuwammengngi Rohna Allataala mpèrèkko apanrèng sibawa pappèjeppu angkanna muwisseng sibawa sukku aga napuwèlo Allataala. 10 Nanallalengiwi muwullèi tuwo situru èlona Allataala, sibawa tuli pèsennangiwi atin-Na, angkanna ri laleng sininna sèuwa-sèuwaè muwullèi powassèlè' gau'-gau' iya makessingngè. Sibawa pangissengemmu passalenna Allataala tattamba towi matu. 11 Tennapodo nasibawang akuwasang polè ri Allataala iya marajaè, ripèwatangiko angkanna muwullèi manrasa-rasaiwi sini-sininnaè sibawa sabbara enrengngè masennang ati 12 kuwaèttopa mattarima kasi lao ri Ambo'è. Saba' Ambo'è ritu mèbbuko sitinaja tarimai aga iya puraè napassadiya Allataala lao ri umma'-Na sibawa akkarungen-Na iya matajangngè. 13 Puraki napaleppe' polè ri akuwasanna pettangngè sibawa napalèttè'ki ri laleng akkarungenna Ana'-Na iya Namasèiyè. 14 Nasaba Ana'-Naro naripaleppe'ki; bettuwanna dosa-dosata riyaddampengenni. 15 Kristus iyanaritu gambara'na Allataala iya manessaè iya dè'è napaita; Kristus iyanaritu ana' iya macowaè, lebbi pentingngi naiya sininna ripancajiyè. 16 Saba' naolai Alèna, Allataala pancajiwi sininna sèuwa-sèuwaè ri surugaè sibawa ri yasè'na tanaè, sininna iya paitaè sibawa dè'è napaita, muttama toni sininna roh iya makuwasaè sibawa mapparèntaè. Sininna alangngèwè ripancajiwi naolai Kristus sibawa untu' Kristus. 17 Riwettu dè'napa naengka sèuwa-sèuwaè, engka mèmenni Kristus. Sibawa nasaba Alènato ritu nasininna sèuwa-sèuwaè engkai ri onronna tungke'-tungke'. 18 Alèna ritu kapalana tubunna, iyanaritu jema'è, nasaba Alèna ritu assalenna atuwonna jema'èro. Alèna ritu ana' macowa, iya bunge'-bunge'è ripatuwo paimeng polè ri amatèngngè, kuwammengngi na Alèna bawang iya mancaji kaminang pentingngè polè ri sininna sèuwa-sèuwaè. 19 Alèna Allataala ritu puwèloi kuwammengngi sininna sèuwa-sèuwaè iya engkaè ri Alèna Allataala, engka towi sibawa sukku ri Alèna Ana'-Na. 20 Sibawa naola towi iyaro Ana'è Allataala pettuiwi sininna sèuwa-sèuwaè nasimadècèngeng paimeng sibawa Alèna -- muwi iya engkaè ri linoè iyarè'ga iya engkaè ri surugaè. Napogau'i Allataala iyaro naolai amatènna Ana'-Na ri aju salliè. 21 Riyolo mabèlako polè ri Allataala. Mumusui nasaba ampè-ampèmu sibawa pikkirammu majai. 22 Iyakiya makkekkuwangngè, ri laleng amatènna Ana'-Na, Allataala mèbbui assisumpungemmu sibawa Alèna simadècèngeng paimeng. Nasibawang caraèro naullèi tiwiko mangolo ri Allataala ri laleng keadaang mapaccing, tulèng sibawa dè' cellana. 23 Iyakiya tentu harusu'ko tette' matinulu mateppe' sibawa tettong masse ri atepperemmu. Aja' narapii muleppessangngi ammènasang iya puraè riwèrèkko wettunna mutarima Karèba Madècèng polè ri Allataala. Iyaro karèbaè purani riyabbirittang lao ri tungke' tau ri sininna linoè. Na untu' iyanaro iyya, Paulus, namancaji pattumani. 24 Makkekkuwangngè mammènasaka manrasa-rasa untu' apentingemmu. Nasaba anrasa-rasang watakkalèku, upaggenne'i aga iya harusu'è nanrasa-rasai Kristus untu' jema'-Na, iyanaritu tubun-Na. 25 Allataala suroka mancaji pattumaninna jema'-Na untu' apentingemmu. Harusu'ka palettu'i biritta polè ri Allataala, iya manenna; 26 iyanaritu biritta iya maddatu-datuè taung labe'è rirahasiyakang ri Allataala lao ri sininna tauwè, iyakiya makkekkuwangngè ripannessai lao ri umma'-Na. 27 Lao ri umma'-Naro maèloi Allataala pannessai pèkkugi kessinna sibawa rajanna rahasiya-Naro untu' sininna rupa tauwè. Iyaro rahasiyaè iyanaritu: Engkai Kristus ri laleng alèmu, bettuwanna maccowèko matu pèneddingiwi arajanna Allataala. 28 Kristus ritu iya riyabbirittangngè lao ri tungke' tau. Riparèngngerangiwi sibawa ripagguru manengngi mennang sibawa sininna apanrèngngè. Akkattata iyanaritu kuwammengngi na tungke' tau weddingngi ritiwi lao ri Allataala, selaku tau iya dèwasaè ri laleng gau'-gau' rohaniè, nasaba massèddini sibawa Kristus. 29 Untu' lettu ri gau'èro majjama laddè'ka. Uwakkullèyangngi sibawa sininna awatangekku iya nabbèrèyangngè Kristus lao ri iyya iya majjamaè ri laleng alèku sibawa penno akuwasang.
