1 Namasennang tona Saulus ri abbunowangngèro. Iyatoro essoè nappammula rilellung jema'è ri Yèrusalèm, angkanna sininna tau mateppe'è, sangadinna rasul-rasul-è, tassiya-siyani lao ri sininna daèra Yudèa sibawa Samaria. 2 Sining tau iya mètauè ri Allataala natampunni Stèfanus enrengngè nateringinna sibawa masè' senna'. 3 Iyakiya Saulus matterui makkuraga mancuru'i jema'è. Laowi ri tungke'-tungke' bola nanassarènrèngengngi massu sining tau mateppe'è, nainappa naputtama' mennang ri tarungkuè. 4 Sining tau mateppe'è iya tassiya-siyaènnaro nappallebbangenni Karèba Madècèng polè ri Allataala lao kègi-kègi. 5 Laoni Filipus ri kota Samaria sibawa mabbirittangngi lao risining tauwè kuwaro passalenna Arung Pappassalama'è iya najjanciyangngè Allataala. 6 Wettunna sining tauwè naèngkalinga Filipus mabbicara sibawa naitana mennang sining anu makalallaing iya napogau'è, maèga polè ri mennang pènessaiwi aga napowada Filipus. 7 Saba' massuni roh-roh majaè polè ri maèga tau iya nauttamakiyè sètang. Sining tau pèso'è sibawa kèppangngè maèga napajjappa. 8 Nasining tauwè ri kota Samaria marennu senna'ni. 9 Ri kotaèro engka sèddi tau riyaseng Simon, siyagangngarè'ni ittana mèbbui sining tau Samariaè riparemma sibawa pangissengeng sèhèrè'na. Makkedai lao risining tauwè makkedaè dè' tau padanna. 10 Nasininna tauwè ri kotaèro polè ri sininna masaraka'è napènessai senna'ni. Makkedai mennang, "Iyaè tauwè iyanaritu awatangeng Allataala iya kalabbaè selaku 'Awatangeng Battowa'. " 11 Maitta senna'ni paremma'i sining tauwè sibawa awatangeng sèhèrè'na, angkanna napènessai senna'i. 12 Iyakiya Filipus mabbirittangngi lao ri mennang passalenna Karèba Madècèng pèkkugi Allataala patettongngi matu Apparèntan-Na sibawa passalenna Yèsus Kristus, Arung Pappassalama'èro. Namateppe'na mennang lao ri karèba napalettu'è Filipus, nainappa ricemmè mennang muwi worowanè iyarè'ga makkunrai. 13 Mateppe' toni Simon. Napurana ricemmè, matteruni maccowèriwi Filipus. Sining anu makalallaing iya kajajiyangngè pahèrangngi Simon. 14 Naèngkalingani rasul-rasul-è ri Yèrusalèm makkedaè sining tau Samariaè natarimani ada-adanna Allataala. Rimakkuwannanaro nasuroni mennang Pètrus sibawa Yohanès lao kuwaro. 15 Wettunna Pètrus sibawa Yohanès lettu, massempajanni mennang untu' iyaro sining tau Samariaè kuwammengngi nalolongeng mennang Rohna Allataala, 16 saba' dè'pa napolè Rohna Allataala kuwasaiwi muwi sèddi tau polè ri mennang, nappai mennang ricemmè ri laleng asenna Yèsus Kristus bawang. 17 Nainappa Pètrus sibawa Yohanès palènne'i limanna ri yasè'na iyaro sining tau Samariaè; nanatarimani Rohna Allataala. 18 Naitani Simon makkedaè nasaba limanna rasul-rasul-è ripalènne'i ri yasè'na sining tauwèro, nanabbèrèyangngi Rohna Allataala lao risining tauwèro. Rimakkuwannanaro tiwini Simon dowi lao ri Pètrus sibawa Yohanès, 19 nainappa makkeda, "Wèrèng tokka iyaro akuwasangngè kuwammengngi narèkko upalènne'i limakku ri nigi-nigi, iyaro tauwè natarimai Rohna Allataala. " 20 Iyakiya mappèbaliwi Pètrus, "Cilakako sibawa dowimu! Muwasengngiga pabbèrèna Allataala weddingngi riyelli sibawa dowi? 21 Dè' muwappunnai ha' untu' maccowè ri laleng jama-jamatta, nasaba dè' natongeng atimmu lao ri Allataala. 22 Rimakkuwannanaro buwanni akkattamu iya majaè, sibawa èllauni ri Puwangngè kuwammengngi naddampengengngi pikkirammu iya majaè! 23 Uwissengngi pennoko sibawa angèmpurung enrengngè ripowatako ri jaè. " 24 Nakkeda Simon lao ri Pètrus sibawa Yohanès, "Tulukka muwèllauwi ri Puwangngè kuwammengngi nadè' sèddi polè ri mupowadaèro saudara-saudara kajajiyang ri iyya. " 25 Puranana mennang mabbèrè asabbiyang sibawa mabbirittangngi ada-adanna Puwangngè, lisuni Pètrus sibawa Yohanès ri Yèrusalèm. Na ri lalengngè nabbirittanni mennang iyaro Karèba Madècèngngè ri kampong-kampongngè ri Samaria. 26 Engka sèddi malaèka'na Puwangngè makkeda lao ri Filipus, "Ayo joppano! Lao ri yattang ri laleng iya pasisumpungngèngngi Yèrusalèm sibawa Gaza!" Iyaro lalengngè masino-sino. 27 - 28 Najoppana Filipus. Iyaro wettuè engka sèddi pegawè saorajana Etiopia iya engkaè ri laleng allalengengngè lisu ri wanuwanna. Iyaro tauwè sèddiwi pegawè tanrè iya tanggung jawa'èngngi sininna asugirenna Kandakè, arung makkunrainna wanuwa Etiopia. Iyaro tauwè laowi ri Yèrusalèm untu' massompa ri Allataala na makkekkuwangngè lisuni sibawa karètana. Ri wettu tudanna ri karètanaro nabacai Kitta'na Nabi Yèsaya. 29 Nakkeda Rohna Allataala lao ri Filipus, "Laono muwaddeppèriwi iyaro karètaè. " 30 Nalaona Filipus maddeppèriwi iyaro karètaè, nanaèngkalingai iyaro tauwè bacai Kitta Yèsaya. Nakkutanana Filipus ri alèna, "Tapahagga Puwang iya tabacaèro?" 31 Nappèbali iyaro tauwè, "Pèkkugiwi upahang, rèkko dè'gaga pakatajangekka?" Nainappa naèra Filipus mènrè ri karètaè sibawa sisama tudang. 32 Iyanaè aya'-aya' iya nabacaèro, "Pada-padai bimbala' iya rirènrèngngè untu' rigèrè, pada-pada ana' bimbala' iya dè'è nabbèmbè rèkko rigoncingngi bulunna, makkuwaniro dè' nakkedada muwi silappa. 33 Ripakatunai sibawa rigaukengngi dè' naadèlè'. Rireddu'i nyawa-Na polè ri yasè'na linoè angkanna muwi sèddi tau dè'to gaga mullèi curitai passalenna wija-wijan-Na. " 34 Iyaro pegawè tanrè polè ri Etiopia makkedai lao ri Filipus, "Coba paissengika, niga naseng iyaè nabiè? Alènaga iyarè'ga tau laingngè?" 35 Nappammulana Filipus mabbicara; napakèi iyaro aya'-aya'è selaku pammulang untu' mabbirittangngi Karèba Madècèngngè passalenna Yèsus lao ri pegawè tanrèro. 36 Ri tengnga laleng, lettu'ni risèuwaè onrong iya engkaè uwaina. Nakkeda iyaro pegawè, "Itai iyaro engka uwai! Agapi kurang untu' ricemmè?" [ 37 Nakkeda Filipus, "Rèkko mateppe'ki Puwang sissukku atitta, weddikki ricemmè Puwang. " Nakkeda iyaro pegawè tanrè polè ri Etiopia, "Mateppe'ka Yèsus Kristus iyanaritu Ana'na Allataala. "] 38 Nainappa nasuro lèppang karètana; nasipadduwa mennang, Filipus sibawa pegawèro nonno ri uwai naricemmè ri Filipus. 39 Wettunna mennang massu polè ri uwai, riyalani Filipus ri Rohna Allataala polè kuwaro. Iyaro pegawè tanrè polè ri Etiopia dè'na naitai. Namasennanna iyaro pegawè tanrè patterui joppana. 40 Tenrisenna-senna engkani Filipus ri Asdod. Na wettunna napatteru joppana, nappallebbangengngi Karèba Madècèngngè passalenna Yèsus ri sininna kotaè angkanna lettu ri Kaisarèa.
