1 Pèdè' maitta pèdè' tattamba maègai tau maccowèriyèngngi Yèsus. Iyaro wettuè sining tau Yahudi iya maccowèriyèngngi Yèsus iya mabbasa Yunaniè, dè' namasennang lao risining tau Yahudi tulèngngè iya maccowèriyèngngi Yèsus. Makkedai iyaro mabbasa Yunaniè, "Sining makkunraitta iya jandaènna dè' nallolongeng bantuwang ongkoso' esso-esso iya nabbagè-bagèyangngè lao risining tauwè. " 2 Rimakkuwannanaro, iya seppulo duwa rasul-rasul-è napaddeppungengngi sininna tau maccowèè nakkeda lao ri mennang, "Dè' namakessing narèkko mappèsauki mabbirittangngi ada-adanna Allataala, nasaba harusu'ki murusu'i passaleng anrè. 3 Jaji madècèngengngi Saudara-saudara pilèi polè ri yelle'mu pitu tau iya mappunnaiyè aseng makessing sibawa rikuwasai ri Rohna Allataala enrengngè mapanrè, iya weddingngè risuro murusu'i passalengngèwè; 4 saba' maèloki massempajang sibawa mabbirittangngi ada-adanna Allataala bawang. " 5 Nasitujui manenni iyaro tauwè pallolongenna iyaro rasul-rasul-è. Napilèni mennang Stèfanus, sèddiwi tau mateppe' senna' ri Yèsus sibawa rikuwasai ri Rohna Allataala. Ripilè towi: Filipus, Prokhorus, Nikanor, Timon, Parmènas, sibawa Nikolaus polè ri Antiokhia; tenniyai tau Yahudi, iyakiya muttama'ni agama Yahudi. 6 Iya pitu tauwèro nappètangngarenni ri rasul-rasul-è, nainappa iyaro rasul-rasul-è massempajang sibawa mèllaungengngi mennang barakka'na Puwangngè. 7 Makkuwaniro biritta polè ri Allataala pèdè' mallebbangngi sibawa tau maccowèriyèngngi Yèsus ri Yèrusalèm pèdè' tattambato ègana. Namaèga tona imang mateppe' lao ri Yèsus. 8 Ribarakkaki senna'ni Stèfanus ri Allataala, angkanna pakangkani maèga anu makalallaing sibawa gau'-gau' dè'è padanna ri yelle'na masaraka'è. 9 Iyakiya engka tau mèwai; anggota-anggotana mennang bola assompangngè iya riyasengngè Bola Assompanna sining Tau Maradèka'è. Iyaro anggota-anggotana bola assompangngè iyanaritu sining tau Yahudi polè ri Kirènè sibawa Alèksandria. Sibawai mennang sining tau Yahudi polè ri Kilikia sibawa Asia siddeba' sibawa Stèfanus. 10 Iyakiya dè' naullèi mennang bantai aga napowada Stèfanus, nasaba Rohna Allataala pura mpèrèngngi apanrèng untu' mabbicara. 11 Rimakkuwannanaro nawèrènni pasoso siyagangngarè tau untu' makkeda, "Riyèngkalingai iyaro tauwè cella-cellai Musa sibawa Allataala!" 12 Makkuwaniro mennang pakiri-kiriwi sining tauwè sibawa sining pamimping Yahudiè, enrengngè guru-guru agamaè. Nainappa mennang lao tikkengngi Stèfanus, nanatiwii mangolo ri Mahkama Agamaè. 13 Nanapangolo towi mennang sabbi-sabbi iya mabbèrè pappakatajang iya dè'è natongeng passalenna Stèfanus. Nakkeda iyaro sining sabbiè, "Iyaè tauwè tuli nacella-cellai Bolana Puwangngè iya mapaccingngè sibawa cella-cellai sining parèntana Allataala iya napalettu'è Musa. 14 Purani riyèngkalinga napowada, makkedaè Yèsus iyaro polè ri Nazarèt maèloi ruttungngi Bolana Puwangngè, nainappa napinra maneng ade'-ade' iya napaturungngè Musa lao ri idi!" 15 Sininna tau iya hadèrè'è ri lalenna sidang Mahkama Agamaèro mitai Stèfanus. Na iyaro wettuè rupanna Stèfanus paitai pada-pada rupa malaèka'è.
