1 Iyakiya engka sèddi tau riyaseng Ananias. Sibawa bainèna iya riyasengngè Safira, nabalu' towi tana appunnangenna. 2 Iyaro dowi ellinna nataroi sibagiyang untu' alèna na laingngè nabbèrèyangngi lao ri rasul-rasul-è. Napogau'i makkuwaèro sibawa naisseng bainèna. 3 Nakkeda Pètrus lao ri alèna, "Ananias, magi muleppessangngi Ibillisi'è makuwasaiwi atimmu, angkanna mabbellèko lao ri Rohna Allataala, namuwammekko-mekkorengngi taroi saisa' dowi ellinna tanaèro? 4 Iyaro tanaè iko punna riwettu dè'napa mubalu'i. Sibawa muwi puranana ribalu', iko topa punna iyaro dowi ellinna. Jaji magi naengka akkattamu ri laleng atimmu untu' pogau'i makkuwaèro? Tenniya tolinoè mubellè iyakiya Allataala!" 5 Naèngkalingana Ananias iyaro ada-adaè, mabuwanni namatè. Sininna tau mèngkalingaèngngi iyaro kajajiyangngè mètauni. 6 Napolèna sining kalloloè dokoi ujuna Ananias, nanatiwii massu untu' nakuburu'. 7 Kira-kira tellujjang ri munrinna muttama'ni bainèna. Dè' naissengngi aga nappa kajajiyang. 8 Nakkeda Pètrus ri alèna, "Cobasai powadakka: Iyaro tana mubalu'è sibawa lakkaimmu, singngègaga iyaè ellinna?" Nappèbali bainèna Ananias, "Tongeng, iyanaritu ellinna. " 9 Nakkeda Pètrus lao ri alèna, "Magi iko sibawa lakkaimmu siyempe'ko untu' bellèi Rohna Puwangngè? Engkalingai! Sining tau kuburu'èngngi lakkaimmu lisuni. Natiwi tokko matu mennang massu. " 10 Iyatoro wettuè namabuwang bainèna Ananias namatè ri yolona Pètrus. Na wettunna iyaro sining kalloloè muttama', napolèini matè. Nanatiwini ujuna massu, nanakuburu'i ri seddèna lakkainna. 11 Nasininna tau mateppe'èro sibawa sining tau laingngè, iya mèngkalingaèngngi kajajiyangngèro, mètauni. 12 Nasaba jama-jamanna rasul-rasul-è, maèga anu makalallaing sibawa mappahèrang kajajiyang ri yelle'na masaraka'è. Massèddi atini sininna tau mateppe'è maddeppungeng ri Lègo-Lègo Salomo ri Bolana Puwangngè. 13 Nadè'gaga tau saliweng barani polè maddeppungeng sibawa sining tau mateppe'èro. Iyakiya iyaro sining tau mateppe'è ripakalebbi senna'i ri masaraka'è. 14 Pèdè' maitta pèdè' tattamba ègana sining tau iya mateppe'è lao ri Puwangngè -- worowanè makkunrai. 15 Mala iyaro wettuè, sining tau iya malasaè ritaroi ri yasè'na onrong atinrongngè iyarè'ga tappèrè, naritiwi ri lalengngè, kuwammengngi nakaminang cèddè'na weddingngi rikenna ri wajo-wajona Pètrus, rèkko laloi Pètrus kuwaro. 16 Mallompèngeng sining tauwè polè ri kota-kotaè seddèna Yèrusalèm. Natiwii mennang sining taunna malasaè sibawa iya nauttamakiyè roh-roh maja. Naripajjappa maneng iyaro tauwè. 17 Angkanna imang lompoè sibawa ana'-ana' gurunna, iyanaritu golongang tau Sadukiè, mammulani tinda', nasaba mangèmpurui mennang. 18 Natikkengngi iyaro rasul-rasul-è, nainappa naputtama' ri tarungkuè. 19 Iyakiya wenninnana, engka sèddi malaèka'na Puwangngè timpa'i tange'na tarungkuè, nainappa natiwi massu rasul-rasul-è. Nakkeda iyaro malaèka'è lao ri rasul-rasul-è, 20 "Laono mutettong ri Bolana Puwangngè sibawa powadangngi sining tauwè passalenna atuwong mabaruè. " 21 Naturusini iyaro rasul-rasul-è pasenna malaèka'èro. Maèlè senna'ni lao ri Bolana Puwangngè nappammula mappagguru kuwaro. Napolèna imang lompoè sibawa ana' gurunna, napakangka sidang mahkama sibawa sining pamimpinna Yahudiè. Nainappa nasuro mennang tauwè lao malai iyaro rasul-rasul-è ri tarungkuè untu' ritiwi mangolo ri mennang. 22 Iyakiya wettunna sining tau risuroèro lettu ri tarungkuè, dè'ni napolèi iyaro rasul-rasul-è kuwaro. Jaji lisuni mennang, nanalaporo'i iyaro gau'è ri mahkamaè. 23 Nakkeda mennang lao ri mahkamaè, "Wettutta lettu ri tarungkuè, ripolèi muwi iyaro tange'na tarungkuè makessing taggoncinna, sibawa pengawal-pengawal-è jaga ri sumpangngè. Iyakiya wettutta timpa'i iyaro tange'è, dè'gaga sèddi rilolongeng ri lalenna. " 24 Wettunna parawira pengawalna Bolana Puwangngè sibawa kapala-kapala imangngè naèngkalinga iyaro laporangngè, bengngani passalenna iyaro rasul-rasul-è sibawa mètauna aga wedding kajajiyang. 25 Napolèna sèddi tau worowanè tiwii birittaèwè, "Engkalingai! Sining tau natahangngè Bapa'-bapa' ri tarungkuèro, makkekkuwangngè napaggurui tau maègaè ri Bolana Puwangngè!" 26 Nalaona parawira pengawalna Bolana Puwangngè silaong pengawal-pengawalna malai iyaro rasul-rasul-è paimeng. Iyakiya dè' napakè awatangeng, saba' mètaui ri tau maègaè; ajakkè iyaro tau maègaè genrungngi matu mennang sibawa batu. 27 Ritiwini muttama' mangolo iyaro rasul-rasul-è ri mahkamaè. Nariparèssana mennang ri imang lompoè. 28 Makkedani, "Purano riyattèyang sibawa masero kuwammengngi aja' muwappagguru passalenna iyaè Tauwè. Iyakiya makkekkuwangngè coba mitai aga mupogau'! Muwappallebbangengngi pappagguruwammuro ri sininna Yèrusalèm, sibawa mala maèloko tenre'ki makkedaè idi ritu nassabari amatènna iyaro Tauwè. " 29 Nappèbali Pètrus sibawa rasul-rasul laingngè, "Harusu'ki turusiwi Allataala, tenniya turusiwi tolinoè. 30 Yèsus iya musalliè, purani ripatuwo paimeng polè ri amatèngngè ri Allataalana nènè-nènèta. 31 Napurani riwèrèng ri Allataala tudangeng sibawa akuwasang iya matanrè selaku Pamimping sibawa Pappassalama'; kuwammengngi nariwèrèng kasempatang bangsa Israèliè untu' toba' polè ri dosa-dosana sibawa riyaddampengeng. 32 Idi'naè sabbi-sabbinna passalenna iya manennaro -- idi kuwaèttopa Rohna Allataala iya nabbèrèyangngè Allataala lao risining tau iya turusiyèngngi parènta-Na. " 33 Wettunna naèngkalinga iyaro sining anggotana Mahkama Agamaèro, macai senna'ni mennang, angkanna siyempe'ni mennang untu' mpunoi iyaro rasul-rasul-è. 34 Iyakiya ri yelle'na sining anggotana mahkamaè engka sèddi tau Farisi riyaseng Gamalièl. Guru agama iya ripakalebbi senna'è ri sininna tauwè. Tettonni nainappa nasuro tauwè tiwii massu iyaro rasul-rasul-è cinampe'. 35 Nainappa makkeda lao ri Mahkama Agamaèro, "Saudara-saudara tau Israèliè! Pikkiri'i madècèd-dècèng passalenna aga maèlo napogau' saudara-saudara lao risining tauwèwè. 36 Saba' riyolo mompoi Tèudas, iya makkaèngngi alèna tau maraja, angkanna kira-kira eppa datu tau maccowèriwi. Iyakiya riyunoi sibawa sininna ana'-ana' gurunna tassiya-siya sibawa iyaro gerakanna lennye' toni. 37 Purairo, wettunna engka abbilangeng, momposi Yudas, tau polè ri Galilèa. Nasaba pangarunna, maègato tau maccowèriwi. Iyakiya riyuno towi, sibawa sininna ana'-ana' gurunna tassiya-siyani. 38 Jaji makkekkuwangngè ri laleng kajajiyangngèwè, pangajaku iyanaritu: aja'na mugaukengngi agi-agi sining tauwèwè, leppessangngi siya mennang. Saba' rèkko pappagguruwanna sibawa gerakanna mennang polèi ri tolinoè, tentuni iyaro pappagguruwangngè sibawa gerakangngè lennye'i matti. 39 Rèkko iyaro polèi ri Allataala, tentu Saudara-saudara dè' mullèi matu caui mennang. Mala naullè matu manessani makkedaè Saudara-saudara mèwai Allataala. " Iyaro pangajana Gamalièl natarimani mahkamaè. 40 Nariyobbina iyaro rasul-rasul-è, nainappa ribabba, sibawa riyattèyannana mappagguru passalenna Yèsus. Purairo nappa rileppessang mennang. 41 Iyaro rasul-rasul-è nasalaini iyaro Mahkama Agamaè sibawa masennang nasaba Allataala pura mangga'i mennang sitinaja lolongeng pappakatuna nasaba Yèsus. 42 Na esso-esso ri Bolana Puwangngè sibawa sining bolana tauwè, matteru-terui mappagguru mennang sibawa mabbirittangngi Karèba Madècèngngè passalenna Yèsus makkedaè Alèna ritu Arung Pappassalama'è iya riyajjanciyangngè.
