1 Mappotanannana sibawa salama', nappai riisseng makkedaè iyaro puloè riyasengngi Malta. 2 Pabbanuwana iyaro puloè mabessa senna' lao ri idi. Naduppai manekki mennang sibawa madècèng enrengngè napalluwakekki api nasaba mammulani teppa bosiè sibawa makeccè'to. 3 Paddeppungenni Paulus aju, nanataroi iyaro ajuè ri apiè. Ri wettu napogau'na iyaro, engka sikaju ula massu, nasaba pellana iyaro apiè, nanaokkoi limanna. 4 Wettunna pabbanuwana iyaro puloè naita iyaro ulaè taggattung ri limanna Paulus, makkedani mennang sèddiè lao ri laingngè, "Iyaè tauwè tentu pabbuno, saba' namuni leppe'ni polè ri abalaè ri tasi'è, Dèwi Adèlè'è dè' naleppessangngi tuwo. " 5 Iyakiya nakkeppikengngi Paulus iyaro ulaè ri laleng apiè sibawa dè' napèneddingiwi peddiè muwi cèddè. 6 Mappikkiri'ni mennang dè'na namaitta naboro iyaro limanna Paulus nainappa tappa mabuwang namatè. Iyakiya mattajennana siyagangngarè ittana sibawa dè'gaga makalallaing kajajiyang ri alèna, tappinrani pikkiranna nainappa makkeda mennang makkedaè Paulus iyanaritu dèwata. 7 Dè' namabèla polè ri onrongngèro engka tana appunnangenna Publius, kapala sukunna puloèro. Namasennanna atinna tarimaki selaku topolèna tellungngesso ittana. 8 Iyaro wettuè malasai ambo'na, nakennai semmeng sibawa jamba-jambang. Laoni Paulus mitai ambo'na iya malasaèro nainappa massempajang sibawa palènne'i limanna ri yasè'na angkanna majjappa. 9 Nasaba iyaro kajajiyangngè, sininna tau iya malasaè ri puloèro laoni ri Paulus, naripajjappa. 10 Mabbèrèni mennang maèga hadiya, na wettunna maèlo sompe', tiwini mennang ri kappala'è sininna iya riyapparelluwangngè untu' joppatta. 11 Tellumpulennana kuwaro, joppani polè ri puloèro tonang risèddiè kappala polè ri Alèksandria iya mallabuè ri puloèro ri wettu keccè'è. Iyaro kappala'è pakèi lambang, "Dèwata Dènru Kastor sibawa Poluks. " 12 Mallabuni ri kota Sirakusa, sibawa monrona kuwaro tellungngesso. 13 Polè kuwaro sompe'ki mattuttung wiring tasi' lettu ri kota Règium. Pappa bajanana mammulani miri angingngè polè ri yattang, angkanna ri laleng duwangngesso lettu'ni ri kota Putioli. 14 Kuwaniro siruntu' siyagangngarè tau iya mateppe'è ri Yèsus, nasaba naobbiki mennang, monroni sibawa mennang siminggu ittana. Nainappaki joppa lao ri Roma. 15 Saudara-saudaraè ri Roma iya mateppe'è ri Yèsus naèngkalingani karèbatta, angkanna polèni mennang lettu ri Pasa Apius sibawa Passanggarahang Telluè untu' duppaiki. Wettunna Paulus siruntu' mennang, mattarima kasi'ni ri Allataala sibawa masse'na atinna. 16 Wettunna lettu ri Roma, ripalaloni Paulus monro alè-alè sibawa rijagai risèddiè prajuri'. 17 Labe'nana tellungngesso naobbini Paulus ponggawa-ponggawana tau Yahudiè ri onrongngèro. Maddeppungennana mennang, makkedani lao ri mennang, "Saudara-saudara! Dè'gaga asalakku lao ri bangsata, iyarè'ga majjalèkkai ade' abiyasatta iya ritarimaè polè ri nènè-nènèta. Namuni makkuwaro ritikkekka ri Yèrusalèm sibawa riyabbèrèyang lao risining tau Romaè. 18 Puranana riparèssa parakaraku, maèloni mennang paleppe'ka, nasaba manessani dè' upogau' muwi sèddi asalang iya sitinajaè rihukkung sibawa pahukkungeng matè. 19 Iyakiya nasaba mèwai sining tau Yahudiè, tarapassaka tuntu'i parakaraku riadèlèki ri pengadilanna Kaisar Roma. Upogau'i iyaro tenniya nasaba mappunnaika sèuwa pappotane' iyarè'ga maèloka mapparapekengngi bangsaku. 20 Na iyanaro saba'na uwèllauwi sitaki untu' mabbicara-bicara sibawa iko; saba' ribalengguka, mala nasaba Pappassalama' iya nammènasaiyè bangsa Israèliè. " 21 Nainappa makkeda mennang lao ri alèna, "Dè'pa gaga sure' ritarima polè ri Yudèa passalenna Saudara muwi sèddi. Nadè'to gaga sèddi Saudara polè kuwaro lao mai tiwi karèba passalenna Saudara iyarè'ga mabbicara maja passalenna Saudara. 22 Iyakiya maèlo tokki mèngkalingai passalenna atepperenna Saudara, saba' idi manengngè purani riyèngkalinga tauwè cellai pappagguruwang iya muwaccowèriyèro. " 23 Napattentuni mennang sibawa Paulus sèddi esso untu' siruntu'. Iyaro essoè maèga tau lao ri onronna Paulus. Mappammulai èlè lettu arawèng Paulus pakatajangngi sibawa birittaiyangngi mennang biritta pèkkugi passalenna Allataala mapparènta selaku Arung. Makkuragani Paulus untu' patepperiwi mennang ri Yèsus, sibawa pakèi aya'-aya' polè ri Kitta'na Musa sibawa Kitta'na Nabi-nabiè. 24 Engka mateppe' lao ri aga iya napowadaè Paulus, iyakiya engkato dè' namateppe'. 25 Nasalaini mennang onrongngèro sibawa pallolongeng iya sièwa-èwaè, puranana napowada Paulus iyaè lao ri mennang, "Mèmeng coco' senna' aga napowada Rohna Allataala naolai Nabi Yèsaya lao ri nènè-nènèmu! 26 Makkedai Rohna Allataala, 'Laono powadangngi bangsaèwè: Matteru-teruko matu marèngkalinga, iyakiya dè' mupahangngi; matteru-teruko matu makkita, iyakiya dè' muwakkita. 27 Saba' atinna iyaè bangsaè madonggoi, nalape'i daucculinna, sibawa nasampoi matanna. Saba' rèkko dè' nakkuwaro, tentu makkitai matu matanna, marèngkalingai matu daucculinna, mappahangngi matu atinna, nalisu matu mennang ri alè-Ku, ' adanna Allataala, 'Na-Upajjappai matu mennang. ' " 28 Paccappurenna makkedai Paulus, "Harusu'i naisseng Saudara-saudara makkedaè karèba passalenna asalamakengngè iya polè ri Allataala makkekkuwangngè purani riyabbirittang lao ri bangsa-bangsa laingngè iya tenniyaè Yahudi. Maèloi mennang turusiwi!" [ 29 Purana Paulus makkeda makkuwaro, nasalaini onrongngèro iyaro sining tau Yahudiè sibawa mappangèwang sèddiè sibawa laingngè. ] 30 Duwattaung ittana Paulus monro ri Roma, ri bola iya alèna muto sèwai. Masennangngi tarimai sininna tauwè iya laowè cèllèngiwi. 31 Baraniwi mabbirittangngi lao ri mennang passalenna pèkkugi Allataala mapparènta selaku Arung, sibawa passalenna Puwatta Yèsus Kristus. Napogau'ni Paulus iyaro sibawa laluwasa, tenrihalang-halangi.
