1 Puranana ripettui makkedaè harusu'ki sompe' lao ri Italia, Paulus sibawa siyagangngarè tau tahanang laingngè riyabbèrèyanni lao ri Yulius, parawira pasukang tentara Roma iya riyasengngè "Rèsimèng Kaisar". 2 Tonang kappala'ki ri Adramitium, nainappa sompe'ni sibawa kappala'èro iya sadiyaènna sompe' ri pelabuhang-pelabuhang ri daèra Asia. Aristarkhus, sèddiwi tau Makedonia iya polè ri Tèsalonika, sompe' towi sibawakki. 3 Pappa bajana lettu'ni ri Sidon. Makessing senna'ni rigaukengngi Paulus ri Yulius. Ripalaloi lao cèllèngiwi sellao-sellaona kuwammengngi weddingngi mennang mpèrèngngi aga napparelluwangngè. 4 Polè kuwaro ripatteruni sompeketta. Nasaba siduppai angingngè kappala'è, sompe'ki mabbiring pottanang ri pulo Siprus iya mallinrungngè cèddè polè ri angingngè. 5 Nainappa molai tasi' siyolongngè Kilikia sibawa Pamfilia nalettu' ri Mira ri wanuwa Likia. 6 Kuwaniro iyaro parawiraè runtu sèddi kappala polè ri Alèksandria iya maèloè sompe' lao ri Italia. Nanapalèttè'ni ri kappala'èro. 7 Siyagangngarè esso ittana sompe'ki madoddo senna', nasipanrasa-rasaki angkanna lettu sibbèla kota Knidus. Nasaba maja mupi angingngè, dè' nariyullè patterui sompeketta ri akkattata mammulangngè. Sompe'ni ri yattanna pulo Krèta laloiwi Tanjong Salmonè kuwammengngi mallinrukki kuwaro polè ri angingngè. 8 Nasipanrasa-rasani sompe' mattuttung wirinna puloèro gangkanna lettu'ki risèddiè onrong riyasengngè Pelabuhang Gello, dè' nasiyaga bèlana polè ri kota Lasèa. 9 Iyaro wettuè labe'ni Esso Maraja Assidamèngeng tau Yahudiè. Ateddèngenni maèga wettu, angkanna tenniyana wettunna untu' sompe' sibawa amang. Rimakkuwannanaro mappangajani Paulus lao ri mennang, 10 "Saudara-saudara, manuru' pallolongekku, bahaya senna' rèkko sompe'ki matteru. Lolongekki matu aroging battowa tenniya bawang luretta sibawa kappala'ta, iyakiya nyawata wedditto teddèng. " 11 Iyakiya iyaro parawiraè lebbi mateppe'i ri jurumudiè sibawa kapitèng kappala'è naiya ada-adanna Paulus. 12 Pelabuhangngè kuwaro mèmeng maja untu' monro kappala-kappala'è kuwaro ri wettu keccè'è. Rimakkuwannanaro maègangngèngngi ana' kappala'è situjuiwi untu' sompe' paimeng salaiwi iyaro pelabuhangngè nasaba maèloi mennang makkuraga lettu ri Fèniks sibawa monro gangka wettu keccè'è. Fèniks iyanaritu pelabuhang ri Krèta iya mangoloè ri yajang yattang sibawa yajang manorang. 13 Iyaro wettuè mangirii anging polè yattangngè sibawa madoddo. Nasemmi ana' kappala'è naullèi mennang sompe' paimeng. Jaji nakkani balangona nasompe mattuttung wirinna pulo Krèta. 14 Iyakiya dè' namaitta ri munrinna polèi anginrajaè -- iyanaritu anging iya riyasengngè anging Alau Manorang -- mangiri polè ri pottanangngè, 15 nanaunrui kappala'ta. Nasaba dè' nakkullè sompe' matteru kappala'è mèwai angingngè, manyarani' bawang sibawa leppessangngi kappala'è mali natiwi anging. 16 Mallinrukki cèddè, wettutta lalo ri seddè yattanna pulo Kauda iya baiccu'èro. Sipanrasa-rasani kuwaro nariyullè kuwasaiwi sikocinna kappala'ta. 17 Puranana ripaènrè iyaro sikociè ri kappala'è, iyaro kappala'è ripakkasse'ni sibawa siyoi tulu mattemmuiwi iyaro kappala'è. Nasaba mètaui tassèngkè ri kessi'è ri Sirtis iya macènè'è, ripanonnoni sompe'è nainappa rileppessang kappala'è maccowèriwi angingngè. 18 Majjallo'ni matteru angingngè, angkanna pappa bajana mammulani ribuwang lurenna kappala'è ri tasi'è. 19 Esso rappinasi iyaro ana'-ana' kappala'è nabbèyassi pakkakkasa'-pakkakkasa'na kappala'è ri tasi'è sibawa limanna muto mennang. 20 Siyagangngarè esso ittana dè' taita mata esso sibawa wèttowing, na angingngè matteru-terui majjallo. Angkanna lennye'ni ammènasatta untu' salama'. 21 Siyagangngarè wettu ittana iyaro sining tauwè dè' nanrè. Nalaona Paulus tettong ri tengnga-tengngana mennang nakkeda, "Saudara-saudara! Rèkko muturusiwi pangajaku sibawa dè' tasompe polè ri Krèta, dè' tapèneddingiwi iya manenna asolangengngèwè sibawa arogingngèwè. 22 Iyakiya muwi makkekkuwangngè uwèllauwi sibawa masero kuwammengngi mupèsennangiwi atimmu. Dè' sèddi polè ri Saudara iya matè matu; banna ateddèngekki matu iyaè kappala'è bawang. 23 Saba' onna' wenniè malaèka' polè ri Allataala iya usompaè, iyanaritu Allataala iya mappunnangiyèkka, polèi ri iyya. 24 Makkedai iyaro malaèka'è, 'Aja' mumètau, Paulus! Saba' mangoloko matu ri Kaisar. Sibawa nasaba akessingeng atinna Allataala ri iko, sininna tau iya muwèwaè sisompereng salama'i matu nasaba iko. ' 25 Rimakkuwannanaro, Saudara-saudara, sitinajai Saudara pakaloppoi atinna! Saba' mateppe'ka lao ri Allataala makkedaè iya manennaro kajajiyangngi matu pada-pada iya Napowadaè lao ri iyya. 26 Iyakiya rappè'ki matti ri wirinna sèuwaè pulo. " 27 Ri wenni maseppulo eppana taronak-konanni ri Tasi' Adria. Kira-kira tengnga benninna napèrasani ana' kappala'è maddeppèriwi pottanangngè. 28 Jaji loro'ni mennang tulu sibawa batu untu' gangkai lamunna tasi'è. Naissenni iyaro onrongngè lamunna nawèki patappulo mètèrè. Dè' namaitta ri munrinna nagangkasi mennang paimeng, nanalolongenni ri onrongngèro lamunna tasi'è nawèki telluppulo mètèrè. 29 Mètauni mennang tassèngkè ammai matu kappala'è ri batu karangngè, jaji panonnoni mennang eppa balango ri poncinna kappala'è, nainappa mammènasa rèkko weddingngi namasitta èlè. 30 Coco'-coco'ni sining ana' kappala'è coba-cobai lari polè ri kappala'èro. Panonnoni mennang sikoci ri tasi'è pada-pada rèkko maèloi panonno balango polè ri yolona kappala'è. 31 Iyakiya makkedai Paulus lao ri parawiraè sibawa sining prajuri' engkaè ri kappala'èro, "Rèkko iyaro ana' kappala'è dè' naonro ri kappala'è, dè' maneng naullèi Saudara salama'. " 32 Rimakkuwannanaro iyaro sining prajuri'è narette'i tuluna iyaro sikociè, angkanna mali iyaro sikociè. 33 Ri wettu dè'napa na èlè, nappètangngarenni Paulus kuwammengngi nanrè maneng mennang. Makkedai Paulus, "Seppuloni eppa esso ittana idi maneng Saudara banna mattajeng bawang ri laleng keadaang mètau nadè' aga-aga riyanrè. 34 Uwèllauwi manrèki cèddè. Makessing iyaro untu' Saudara, kuwammengngi mumawatang paimeng. Nasaba salama' manengngi Saudara sibawa dè'gaga akurangeng agi-agi. " 35 Purana makkeda makkuwaro malani roti Paulus nainappa mattarima kasi ri Puwangngè ri yolona maneng mennang. Nainappa nabagè-bagè iyaro rotiè, nananrèi. 36 Nassumange' manenna mennang paimeng sibawa maccowèto manrè. 37 Sininna iya engkaè ri kappala'èro engka duwa ratu pituppulo enneng tau. 38 Puranana manrè maneng situju genne'è, nabuwanni lureng gandonna ri tasi'è kuwammengngi namaringeng kappala'è. 39 Matajanna essoè, naitani ana' kappala'è pottanangngè, iyakiya dè' naissengngi pottanang aga iyaro. Naitani mennang sèuwa teluk sibawa wirinna. Jaji akkattana mennang maèloni pappottanangngi iyaro kappala'è kuwaro rèkko naullèi. 40 Narette'ni sining tulu balangoè nainappa naleppessang tallemme' iyaro sining balangoè ri tasi'è. Naleppessang toni tulu siyoèngngi golingngè. Nainappa paènrè sompe' ri bagiyang yolona kappala'è kuwammengngi nairii anging iyaro kappala'è mattuju ri wiring. 41 Iyakiya iyaro kappala'è tabbuttui ri kessi'è. Tassèngkèni bagiyang yolona nadè' nakèdo, na bagiyang monri ancuru nakenna bombang raja. 42 Sining prajuri'è ri kappala'èro manniya'ni mpuno manengngi tau tahanangngè, nasaba mètaui mennang ajakkè matu engka nangè lao ri pottanangngè sibawa lari. 43 Iyakiya iyaro parawiraè napèsangkaiwi niya'na mennanro nasaba maèloi passalama'i Paulus. Nasuroni sininna tau naullè nangè luppe riyolo' sibawa nangè lao ri wiring. 44 Iya laingngè harusu'i maccinrola sibawa makkatenning risining papengngè iyarè'ga reppa' kappala'èro. Na iyanaro nallalengi nawedding manekki salama' lettu ri pottanangngè.
