1 Purairo nasalaini Paulus Atèna nalao ri Korintus. 2 Kuwaniro siruntu' sèddi tau Yahudi riyaseng Akwila, assalenna polèi ri wanuwa Pontus. Silalona Akwila polè ri Italia sibawa bainèna Priskila. Laowi mennang ri Korintus saba' Kaisar Klaudius purani nasuro sininna tau Yahudiè massu polè ri Roma. Laoni Paulus cèllèngiwi mennang iya duwa, 3 nainappa monro kuwaro sibawa mennang enrengngè silaong mennang majjama, saba' assappa-sapparenna mennang pada-padai assappa-sapparenna Paulus, iyanaritu mèbbu kèma. 4 Iyakiya tungke' Esso Saba', laowi Paulus maccurita-curita ri bola assompangè untu' mèbbui sining tau Yahudiè sibawa sining tau Yunaniè, mateppe' lao ri Yèsus. 5 Lettu'nana Silas sibawa Timotius polè ri Makedonia, nakkègunanni sininna wettunna Paulus untu' mabbirittangngi biritta polè ri Allataala lao risining tau Yahudiè makkedaè Yèsus iyanaritu Arung Pappassalama' iya najjanciyangngè Allataala. 6 Iyakiya nasaba sining tauwè matteru-terui mèwai sibawa cellai, nakkeppikenni Paulus awuè polè ri pakèyanna selaku tanrang untu' parèngngerangiwi mennang asalanna. Makkedai, "Rèkko nakennako abala, asalammu mutotu! Leppe' limakku! Mappammulai makkekkuwangngè maèloka lao risining tau tenniyaè Yahudi. " 7 Nainappa Paulus nasalai mennang nalao monro ri bola ri seddèna bola assompangngè. Iyaro bolaè bolana sèddi tau tenniyaè Yahudi, iyakiya nasompai Allataala. Asenna iyaro tauwè Titius Yustus. 8 Iyakiya Krispus, kapalana iyaro bola assompangngè sibawa sininna kaluwargana mateppe'i lao ri Puwang Yèsus. Na maègato tau Korintus laingngè mèngkalingai biritta iya napalettu'è Paulus, namateppe'na mennang lao ri Yèsus nainappa ricemmè. 9 Risèuwaè wenni ri laleng sèuwaè pakkitang, makkedai Puwangngè lao ri Paulus, "Aja' mumètau! Abbicarako matteru aja' muwammekko. 10 Saba' Usibawakko. Dè' sèddi tau laing mullèi pogau'i majaè lao ri Iko, saba' maèga tau ri kotaèwè iyanaritu sining tauk-Ku. " 11 Rimakkuwannanaro monroni Paulus ri Korintus sèddi sitengnga taung ittana sibawa mappagguruwangngi ada-adanna Allataala lao ri mennang. 12 Wettunna Galio mancaji gubernur Akhaya, massèddini sining tau Yahudiè mèwai Paulus sibawa tiwii ri pengadilangngè. 13 Mapparape'ni mennang makkuwaè, "Iyaè tauwè napangaruiwi tau maègaè kuwammengngi nasompai Allataala sibawa cara dè'è nasicoco' sining parèntana Allataala iya nabbèrèyangngè Musa lao ri idi!" 14 Wettunna Paulus maèlo mappèbali, makkedani Galio lao risining tau Yahudiè, "Eh sining tau Yahudiè! Rèkko iya muwapparapekengngèwè sèddiwi pelanggarang iyarè'ga sèddiwi pangkaukeng maja, mèmeng sitinajaka sabbara' mèngkalingai papparapekemmuè. 15 Iyakiya iyaè assisalang ada-ada sibawa aseng-ngaseng enrengngè hukkung-hukkummu muto. Jaji harusu'ko pacceppiwi. Dè' usitujuiwi madèlèkiwi gau'-gau' makkuwaèwè!" 16 Nainappa Galio narukka mennang massu. 17 Natikkenni mennang Sostènès, kapalana bola assompangngèro, nabarasa'i ri yolona mejang pengadilangngè. Iyakiya Galio dè' sises-siseng napaduliwi gau'èro. 18 Purairo maitta mupa Paulus monro ri Korintus. Nainappa massimang lao risining tau mateppe'è kuwaro, nainappa sompe' silaong Priskila sibawa Akwila lao ri Siria. Ri Kèngkrèa, nacukkuru'ni Paulus gemme'na iya puraè naleppessang malampè nasaba jancinna lao ri Puwangngè. 19 Wettunna lettu ri Efèsus, nasalaini Paulus Priskila sibawa Akwila, nainappa muttama' ri bola assompangngè sibawa mappasicoco pallolongeng sibawa sining tau Yahudiè kuwaro. 20 Naèllauni mennang kuwammengngi monroi lebbi maitta sibawa mennang, iyakiya dè' namaèlo. 21 Namuni makkuwaro, wettunna maèlo joppa, makkedani, "Rèkko napuwèloi Allataala, maèloka lisu paimeng kuwaè. " Purana makkeda makkuwaro, nasalaini Efèsus. 22 Nonnona ri Kaisarèa, laoni ri Yèrusalèm untu' mabbèrè selleng lao ri jema'è kuwaro, nainappa matteru lao ri Antiokhia. 23 Monronana kuwaro siyagangngarè ittana, joppasi mitai daèra Galatia sibawa Frigia untu' pakkasse'i sining tau mateppe'è. 24 Iyaro wettuè, polèni ri Efèsus sèddi tau Yahudi iya jajiyè ri Alèksandria, asenna Apolos. Maccai mabbicara sibawa najeppuinna lise'na Kitta'è, 25 enrengngè pura ripagguru untu' missengngi pappagguruwangngè passalenna Yèsus. Nasibawang sumange' iya malluwa'-luwa'è mappaggurui sibawa matutu passalenna Yèsus, namuni nappai paccemmèna Yohanès bawang iya naissengngè. 26 Nabaranina Apolos mappammula mabbicara ri bola assompangngè na wettunna Priskila sibawa Akwila mèngkalingai pappagguruwanna, ritiwini ri mennang lao ri bolaè. Kuwaniro mennang napakatajang lao ri alèna sibawa lebbi sukku passalenna rancanana Allataala untu' passalama'i tolinoè naolai Yèsus. 27 Nainappa akkattana Apolos lao ri Akhaya. Nasining tau iya mateppe'è lao ri Yèsus ri Efèsus mokini sure' lao ri Saudara-saudara iya mateppe'è ri Akhaya kuwammengngi mennang maèloi tarimai Apolos sibawa masennang atinna. Na wettunna Apolos lettu ri Akhaya, manessani makkèguna senna' pattulunna lao risining tau iya mateppe'è lao ri Yèsus nasaba pammasèna Allataala. 28 Saba' nacaui Apolos sining tau Yahudiè ri laleng addebbakengngè ri yolona tau maègaè. Enrengngè napabuttiwi sibawa aya'-aya' polè ri Kitta'è makkedaè Yèsus ritu Arung Pappassalama' iya riyajjanciyangngè.
