1 Napatteruni joppana Paulus sibawa Silas lalo Amfipolis sibawa Apolonia nalettu'na ri Tèsalonika. Kuwaro engka bola assompang tau Yahudi. 2 Nalaona Paulus ri bola assompangngèro -- pada-pada biyasaè napogau' rèkko engka sèuwa bola assompang Yahudi -- nainappa mappasicoco pallolongeng sibawa sining tauwè kuwaro passalenna aya'-aya'na Kitta'è. Napogau'i iyaro tellu Esso Saba' matturu-turuseng. 3 Napakatajanni situru aya'-aya'na Kitta'è sibawa napabuttinna makkedaè Arung Pappassalama'è iya najjanciyangngè Allataala parellui manrasa-rasa sibawa tuwo paimeng polè ri amatèngngè. Makkedai Paulus, "Yèsus iya uwabbirittangngèro lao ri iko, Alèna ritu Arung Pappassalama' iya riyajjanciyangngè. " 4 Siyagangngarè tau mancaji mateppe' nainappa maccowèriwi Paulus sibawa Silas; makkuwatoro maèga senna' tau Yunani iya mètauè ri Allataala, sibawa maèga mupa makkunrai mariyolo. 5 Iyakiya sining tau Yahudiè mangèmpurui. Naobbii mennang sining tau dè'è gaga jama-jamanna risining lalengngè sibawa mèbbu garembolang pangacau. Nanakacauni mennang sininna kotaèro sibawa katulungngi bolana Yason untu' sappai Paulus sibawa Silas, nasaba maèloi mennang tiwii Paulus sibawa Silas massu mangolo ri tau maègaè. 6 Iyakiya wettunna mennang dè' nalolongengngi Paulus sibawa Silas, nassarènrèngenni Yason sibawa siyagangngarè tau mateppe' laingngè ri yolona pajaba'-pajaba' iya makuwasaè ri kotaèro. Gorani mennang, "Iyaè sining tauwè makkacauwi kègi-kègi! Makkekkuwangngè nalokkai toni mennang kotata, 7 na Yason pura tarimai mennang ri bolana. Najjalèkkaiwi mennang sining iya pura napattentuè Kaisar Roma, nasaba makkedai mennang makkedaè engka mupa arung laing iya riyasengngè Yèsus. " 8 Nasibawang ada-adaèro, naèbbui mennang tau maègaè sibawa sining panguwasaè ri kotaèro tassèleng. 9 Nainappa iyaro sining panguwasaè suroi Yason sibawa sining tau mateppe' laingngèro makkamaja dowi boro'. Purairo nainappa rileppessang mennang. 10 Iyaro wenniè sining tau mateppe'è ri kotaèro suroi Paulus sibawa Silas lao ri Bèrèa. Lettu'nana kuwaro, laoni Paulus sibawa Silas ri bola assompanna tau Yahudiè. 11 Sining tauwè ri Bèrèa lebbi tabbukkai atinna naiya sining tauwè ri Tèsalonika. Masennang atinna mennang mèngkalingai karèbaè passalenna Yèsus, na esso-esso mennang salidikiwi Kitta'è untu' missengngi tongegga iyaro pappagguruwanna Paulus. 12 Maèga ri yelle'na mennang mateppe' lao ri Yèsus, nadè' cèddè'to tau Yunani mariyoloè mateppe'; makkunrai sibawa worowanè. 13 Wettunna naèngkalinga sining tau Yahudiè ri Tèsalonika makkedaè pura toni nappallebbangeng Paulus ada-adanna Allataala ri Bèrèa, laoni mennang ri Bèrèa sibawa pakiri-kiriwi enrengngè pèttauriwi sining tauwè kuwaro. 14 Mapperi-perini sining Saudara-saudaraè ri Bèrèa mantara'i Paulus lao ri wiring tasi'è, na Silas sibawa Timotius tette'i monro ri kotaèro. 15 Puranana nantara Paulus lettu ri Atèna, lisuni iyaro Saudara-saudaraè ri Bèrèa sibawa tiwii paseng polè ri Paulus kuwammengngi Silas sibawa Timotius naccinrolato masitta-sitta. 16 Wettunna Paulus natajeng Silas sibawa Timotius ri Atèna, messèni atinna mitai kotaèro penno sibawa barahala-barahala. 17 Rimakkuwannanaro ri bola assompangngè, mappasicoco pallolongenni Paulus sibawa sining tau Yahudiè enrengngè sining tau laingngè iya sompaèngngi Allataala kuwaro. Makkuwatoro risining pasaè esso-esso mappasicoco pallolongeng sibawa tungke' tau iya engkaè kuwaro. 18 Guru-guru iya maccowèè ri Epikuros sibawa maccowèè ri Stoa siddebba' toni sibawa Paulus. Siyagangngarè polè ri mennang makkeda, "Aga naisseng iyaè tauwè? Cèddè bawang pangissengenna, iyakiya maèga bicarai!" Siyagangngarè laingngè makkeda, "Samanna nabbirittangngi passalenna dèwata-dèwata bangsa laingngè. " Makkeda makkuwairo mennang, nasaba mabbicarai Paulus passalenna Yèsus sibawa passalenna atuwongngè paimeng purana amatèngngè. 19 Nainappa natiwi mennang Paulus ri addeppungengngè ri Bulu-bulu Arèopagus. Kuwaniro makkeda mennang lao ri Paulus, "Macinnaki missengngi pappagguruwang baru iya muwabbirittangngèro. 20 Saba' mupowadai gau'-gau' iya makalallaingngè riyèngkalinga ri daucculitta. Rimakkuwannanaro macinnaki missengngi bettuwanna. " ( 21 Saba' sininna tau Atènaè sibawa sining tau polè-polè iya monroè kuwaro napoji senna' paccappui wettu appèsau-pèsaungenna mennang untu' mèngkalingai sibawa mabbicara passalenna gau'-gau' iya kaminang baruè. ) 22 Wettunna Paulus tettong ri yolona sining tau iya maddeppungengngè ri Arèopagus-èro, makkedani Paulus, "Eh sining tau Atènaè! Uwitai makkedaè ri laleng sininna gau'è maggama senna'ko. 23 Saba' wettukku joppa-joppa mattulilingiwi kotamu sibawa pènessaiwi sining onrong assempajangemmu, uwita towi sèddi onrong makkasuwiyangeng akkarobangeng; ri onrongngèro tarokii, 'Lao ri Allataala Iya Dè'è Nariisseng. ' Allataala iya musompaè iyakiya dè' naissengngi, iyanaro uwabbirittang lao ri iko. 24 Allataala iya pancajiyèngngi linoèwè sibawa sininna lise'na, iyanaritu Puwanna langiè sibawa linoè. Dè' naonro ri laleng bola-bola dèwata iya naèbbuè tolinoè. 25 Dè'to napparelluwangngi bantuwanna tolinoè, saba' Alèna ritu mabbèrè atuwong sibawa nappase' enrengngè sininna sèuwa-sèuwaè lao ri tolinoè. 26 Polè risèddiè rupa tau Naèbbui sininna bangsaè sibawa nasuroi mennang monroiwi sininna linoè. Alènato ritu pattentui mappammula pammulanna, uppanna sibawa kègai mennang wedding tuwo. 27 Napogau'i Allataala iyaro kuwammengngi nasappai mennang Alèna. Memmuwarè' siruntu'i mennang sibawa Alèna ri wettunna mennang sappai. Iyakiya sitongenna Allataala dè' namabèla polè ri idi tungke'-tungke'. 28 Pada-pada napowadaè tauwè, 'Tuwoki sibawa kèdo enrengngè engkaki ri linoèwè nasaba akuwasan-Na. ' Pada-pada mutowi iya napowadaè siyagangngarè paccuritamu. Makkedai mennang, 'Idi manengngè iyanaritu ana'-ana'-Na. ' 29 Nasaba idi'è ana'-ana'ki Allataala, dè' naweddikki mangga'i Allataala pada-pada dato'-dato' polè ri ulawengngè iyarè'ga pèra'è iyarè'ga batuè iya riyèbbuè situru accana tolinoè. 30 Iyaro wettuè nallupaini Allataala adonggotta, iyakiya makkekkuwangngè nasuro manengngi tauwè ri sininna linoè toba' polè ri dosa-dosana. 31 Saba' pura napattentuni sèddi wettu untu' madèlèkiwi sininna linoèwè sibawa adèlè. Iyaro jamangngè napogau'i matu sèddi tau iya puraè napilè Allataala untu' iyaro. Na kuwammengngi sininna tauwè mateppe'i matu ri gau'èro, purani napatuwo paimeng Allataala iyaro tauwè polè ri amatèngngè!" 32 Wettunna naèngkalinga iyaro sining tauwè passalenna atuwongngè paimeng purana amatèngngè, engka polè ri mennang cawa-cawaiwi Paulus. Engkato makkeda, "Macinnaki mèngkalingai Saudara mabbicara paimeng passalenna gau'èwè. " 33 Nainappa nasalai Paulus iyaro addeppungengngè. 34 Iyakiya engka ri yelle'na mennang maccowè ri Paulus sibawa mateppe' ri Yèsus, padaènna: Dionisius anggotana majelis Arèopagus, sibawa sèddi makkunrai riyaseng Damaris, enrengngè siyagangngarè tau pasi.
