1 Napatteruni joppana Paulus lao ri Dèrbè, nainappa lao ri Listra. Kuwaro engka sèddi tau maccowè ri Yèsus asenna Timotius. Indo'na sèddiwi tau Yahudi, iya mateppe'ènna ri Yèsus, iyakiya ambo'na tau Yunani. 2 Ri yelle'na sining tau mateppe'è iya monroè ri Listra sibawa Ikonium, tarompoi Timotius sèddi tau makessing. 3 Macinnai Paulus kuwammengngi maccowèi Timotius silaong alèna; rimakkuwannanaro nasunna'ni Timotius. Napogau'i iyaro nasaba sining tau Yahudiè ri daèraèro naisseng manengngi makkedaè ambo'na Timotius sèddiwi tau Yunani. 4 Tungke'-tungke' kota nalaoiyè mennang, napalettu'i mennang risining tau mateppe'è sining apettung iya puraè napattentu rasul-rasul-è sibawa sining pamimpingngè ri Yèrusalèm. Napangajarini mennang saudara-saudara iya mateppe'ènnaro kuwammengngi naturusiwi iyaro peraturang-peraturangngè. 5 Natattamba masse'na teppe'na iyaro sining jema'è, natungke esso pèdè' tattambai ègana jumellana. 6 Dè' naripalalo Paulus sibawa Silas ri Rohna Allataala mappallebbangengngi ada-adanna Allataala ri daèra Asia. Jaji napatteruni joppana lao ri daèra Frigia sibawa Galatia. 7 Wettunna lettu ri pakkasèsènna Misia nacobani mennang muttama' ri daèra Bitinia, iyakiya Rohna Yèsus mattèyangngi mennang lao kuwaro. 8 Jaji nalaloini mennang Misia natteru ri Troas. 9 Wenninnana, ri Troas, mitani Paulus sèuwa pakkitang. Ri laleng pakkitangngèro naitai sèddi tau Makedonia tettong ri yolona nanarèllau sibawa masero kuwammengngi nalao ri Makedonia untu' tulungngi mennang. 10 Puranana nalolongeng Paulus iyaro pakkitangngè, matteruni sadiya-sadiya untu' lao ri Makedonia. Saba' mateppe'ki ri laleng malata apettung makkedaè Allataala suroki mabbirittangngi Karèba Madècèngngèro lao risining tauwè kuwaro. 11 Ri salaini Troas natasompe matteru lao ri Samotrake, na pappa bajana lao ri Nèapolis. 12 Polè kuwaro laoki ri Filipi, sèddi kota kacamatang mammulangngè ri Makedonia. Filipi iyanaritu jajahanna akkarungeng Roma. Monroni kuwaro siyagangngarè essona. 13 Ri Esso Saba'è laoni ri wiring saloè ri saliwenna pintu gerbanna kotaè, saba' ripèrasaiwi kuwaro engka onrong massempajang untu' tau Yahudiè. Natatudanna sibawa mabbicara-bicara sibawa sining makkunrai iya maddeppungengngènna ri onrongngèro. 14 Sèddi polè ri yelle'na mennang iyanaritu padangkang kaing lango-lango, asenna Lidia sibawa assalenna polèi ri Tiatira. Namasèiwi Allataala, naripakèdona atinna ri Puwangngè kuwammengngi natarimai aga nappagguruwang Paulus lao ri alèna. 15 Ricemmèni Lidia sibawa silise bolana. Puranana ricemmè, naundanni. Makkedai, "Rèkko napèrasai Saudara-saudara tonget-tongekka mateppe' lao ri Yèsus, laono mai mappèruma ri bolaku. " Nainappa maddessa'ni kuwammengngi nariturusi parèllaunna. 16 Risèuwaè esso wettutta lao ri onrong assempajangengngè, siruntu'ki sèddi makkunrai; atai. Iyaro makkunraiè rikuwasaiwi ri roh sètang iya mullèngngi botoi kajajiyang-kajajiyang mangoloè. Iyaro makkunraiè nawèrèngngi asarong battowa puwanna ri laleng nabotona dallè'na tauwè. 17 Iyaro makkunraiè naccowèriwi Paulus matteru sibawa idi nagora-gorato, "Iyaè sining tauwè atannai Allataala Iya Pommatanrè! Polèi mennang untu' paissengiwi Saudara-saudara pèkkugi carana mullèi salama'!" 18 Siyagangngarè esso ittana iyaro makkunraiè matteru-terui gora makkuwaro. Teddènni asabbarakenna Paulus, angkanna gilinni nainappa makkeda lao ri roh-èro, "Ri laleng asenna Yèsus Kristus uparèntakko massu polè ri makkunraièro!" Iyatoro wettuè iyaro roh-è nasalaiwi iyaro makkunraiè. 19 Wettunna sining puwanna napahang makkedaè kasempatanna mennang untu' lolongeng dowi teddènni, natikkenni mennang Paulus sibawa Silas, nainappa nassarènrèngeng iya duwa lao ri tana lapangngè ri yolona saorajaè mangolo ri pamarèntaè. 20 Napangoloi mennang Paulus sibawa Silas ri pajaba'-pajaba' pamarènta Roma, nainappa makkeda, "Iyaè sining tauwè tau Yahudi. Nakacauwi mennang kotata. 21 Napètangngariwi mennang tauwè pogau'i ade' abiyasang iya dè'è nasicoco' hukkung-hukkutta, sining tau Romaè. Dè' taullèi tarimai iyarè'ga turusiwi iyaro ade' abiyasangngè!" 22 Maccowèni tau maègaè gasai Paulus sibawa Silas; enrengngè pajaba'-pajaba'na pamarèntaè sapè'-sapè'i pakèyanna polè ri watakkalèna iya duwaro rasul-è nainappa nasuro tauwè barasa' duwai mennang. 23 Puranana mennang ribarasa' sibawa maladde', riputtama'ni mennang ri laleng tarungkuè. Risuroni kapala tarungkuè jagaiwi mennang sibawa makkumani tedde'na. 24 Nasaba parèntaèro, iyaro kapala tarungkuè natahangngi mennang ri bili' tarungkuè iya kaminang marilalengngè, sibawa nabalenggui ajèna ri balo'è. 25 Kira-kira ri tengnga benninna Paulus sibawa Silas massempajang sibawa makkèlong poji-pojiyang lao ri Allataala. Sining tau tarungku laingngè mèngkalingai mennang makkèlong. 26 Tappa mpèwang muni tanaè masero senna', angkanna pandamènna iyaro tarungkuè maccowèto taggottang. Tattimpa' maneng sininna tange'na tarungkuè sibawa sining rantè iya balengguèngngi sininna tau tarungkuè leppe'to. 27 Moto sèlenni iyaro kapala tarungkuè. Wettunna naita tattimpa' sining tange'na tarungkuè, narampuni peddanna maèlo mpunoi alèna nasaba nasenni lari maneng tau tahanangngè. 28 Iyakiya gorai Paulus siullè-ullèna, "Aja' muwunoi alèmu! Engka maneng muki kuwaè!" 29 Mèllauni lampu iyaro kapala tarungkuè nainappa lari muttama', natènrèna suju' ri yolona Paulus sibawa Silas. 30 Nainappa natiwi mennang massu sibawa makkeda, "Bapa'-bapa', aga harusu' upogau' kuwammengngi ripassalama'ka?" 31 Nappèbali Paulus sibawa Silas, "Ateppe'no lao ri Puwang Yèsus! Salama'ko matu -- iko sibawa sininna tauwè ri bolamu!" 32 Nainappa Paulus sibawa Silas pakatajangngi ada-adanna Puwangngè lao ri kapala tarungkuèro sibawa lao ri sininna tau iya engkaè ri bolana. 33 Iyatoro tengnga benniè, naritiwi mennang ri kapala tarungkuèro nainappa ripaccingi sining lona mennang. Natteruna ricemmè iyaro kapala tarungkuè silaong sininna tauwè ri lalempolana. 34 Nainappa natiwi Paulus sibawa Silas ri bolana sibawa patalangengngi mennang inanrè. Masennang senna'ni silaong sininna kaluwargana saba' mateppe'ni makkekkuwangngè lao ri Allataala. 35 Pappa bajana èlèè, kirinni pajaba'-pajaba'na pamarènta Roma polisi lao ri tarungkuè untu' palettu'i parèntaè kuwammengngi Paulus sibawa Silas naripaleppe. 36 Iyaro kapala tarungkuè napaissengiwi gau'èro lao ri Paulus. Makkedai, "Bapa'-bapa', pajaba'-pajaba'na pamarèntaè pura mabbèrè parènta untu' leppessangngi Bapa'-bapa'. Weddinni Bapa'-bapa' lisu makkekkuwangngè. Salama'ki ri lalengngè!" 37 Iyakiya makkedai Paulus lao ri patugas-patugasna polisièro, "Idi'è tau warga wanuwa Roma. Purani ribarasa' ri yolona tau maègaè sibawa riputtama' ri laleng tarungkuè, sibawa dè' nariadèlèkiki. Na makkekkuwangngè nasuroki lao sibawa mammekko-mekko? Dè' tamaèlo! Suroi iyaro alèna pajaba'-pajaba'na pamarèntaè lao kuwaè leppessakki. " 38 Nalaporo'ni iyaro patugas-patugasna polisiè gau'èro lao ri pajaba'-pajaba'na pamarènta Roma. Wettunna iyaro pajaba'-pajaba'è naèngkalinga makkedaè Paulus sibawa Silas warga wanuwa Roma, mètauni mennang. 39 Nainappa lao mèllau addampeng ri Paulus sibawa Silas, nainappa nantara mennang iya duwa massu polè ri tarungkuè, enrengngè naèllaunna kuwammengngi nalao mennang polè ri kotaèro. 40 Nasalaini Paulus sibawa Silas iyaro tarungkuè nainappa lao ri bolana Lidia. Puranana siruntu' sining tau mateppe'è kuwaro, sibawa mpèrèngngi mennang sumange', joppani Paulus sibawa Silas.
